To a tamne (11.12.24)
Telefonaty z wulkim hłosom, harowaca hudźba a čuwy rubjace wideja z wótřerěčaka šmóratka – přećiwo tomu Berlinske wobchadne zawody nětko postupuja. Z wosebitymi wozjewjenjemi w busach wo to proša, so telefonatow wzdać a wideja njewothrawać. Hižo wot nalěća w busach za to wabja, na sobujěducych wjace kedźbnosće brać, so kruće dźeržeć a hladać, hač snadź něchtó druhi městno za sedźenje nuznišo njetrjeba.
Hrózbna namakanka we Wienje policiju a zjawnosć zaběra: Při twarskich dźěłach běchu w plastowym měše zapakowane ćěło něhdźe 30lětneho muža namakali, kotrež hižo 25 lět w pincy domu ležeše. Slědy na to pokazuja, zo jedna so wo mordarstwo. Kriminalisća nadźijeja so pomocy zjawnosće: Muž w joggingowym wobleku bě 1,70 metrow wulki a strowy.
Nětk móže 1 300 ludźi radu wolić
Dešno (SN/mb). Wjace hač 1 300 ludźi w Braniborskej je so do lisćiny wolerjow za 7. Radu za naležnosće Serbow zapisać dało. To je nam dźensa rano předsydka wólbneho wuběrka Margit Neugebauer na naprašowanje zdźěliła. Kaž z oficielneho wozjewjenja gremija wuchadźa, je so doba za zapisanje zašłu njedźelu skónčiła. Nětko móža so registrowani wolerjo hač do 15. decembra, 12 hodź., na wólbach wobdźělić. Štóž chce hač do poslednjeje minuty dočakać, dyrbi sam swoje wólbne podłožki do póštoweho kašćika tyknyć, w Dešnje na „wohnjowym dworje Tylcyc“, Hłowna dróha 44.
„Wužijće šansu, tych wolić, kotřiž budu w přichodźe naše zajimy w Podstupimje zastupować“, piše Neugebauer w zdźělence. Zdobom skedźbnja na zjawne wuličenje hłosow 16. decembra wot 10 hodź. w rumnosćach wólbneho wuběrka w Dešnje. Samsny dźeń chce wólbny wuběrk wuslědk oficielnje wozjewić.
Wo pjeć městnach w serbskej radźe je so dźesać kandidatow požadało. W Braniborskej móža Serbja zastupjerjow swojich zajimow při krajnym sejmje sami z listowymi wólbami wolić. W Sakskej ma tónle nadawk dotal zwjazkowe předsydstwo Domowiny na starosći.
Zelenskyj: Z Merzom budźe lěpje
Kijew (dpa/SN). Ukrainski prezident Wolodymyr Zelenskyj nadźija so kónca zdźeržliwosće Němskeje nastupajo rakety Taurus z móžnym zwjazkowym kanclerom Friedrichom Merzom. „Móžemy hišće wo wjele wjace činić“, rjekny Zelenskyj w swojim widejowym poselstwje po wopyće nawody opozicije a kanclerskeho kandidata unije Friedricha Merza w Kijewje. Z nim je Zelensky pječa tež wo tym rěčał, Ukrainu do NATO přeprosyć.
Söder ma program přewróta
Mnichow (dpa/SN). Unija CDU/CSU chce Němsku po słowach předsydy CSU Markusa Söder z „programom změnjeneho směra“ zaso k starej hospodarske mocy wjesć. „To budźe program přewróta“, rjekny Söder po posedźenju předsydstwa CSU w Mnichowje hladajo na nowy zhromadny wólbny program CDU/CSU, kiž chcedźa přichodny tydźeń předstajić. Söder so hišće raz jasnje wot Zelenych wotmjezowaše, z kotrymiž nochce dźěłać.
Scholz pola awtotwarcow Ford
Jednanja pola VW bjez wuslědka
Wolfsburg (dpa/SN). W tarifowym rozestajenju pola w krizy tčaceho awtotwarca Volkswagen njeje tež štwórte koło jednanjow žadyn wuslědk wunjesło. Wobě stronje rěčitej wo konstruktiwnej atmosferje. Na wuslědki pak njemóžachu so wobdźělnicy po šěsć hodźinach dojednać. Z tarifowymi jednanjemi chcedźa přichodny tydźeń pokročować.
Přewodźane wot warnowanskich stawkow běchu so zastupnicy dźěłarnistwa IG metal a awtotwarca zetkali. VW žada sej hladajo na wobćežne połoženje koncerna wot swojich sobudźěłaćerjow skrótšenje mzdy wo dźesać procentow. Tež zawrjenja twornjow su dale móžne. Dźěłarnistwo žada sej wobchowanje wšěch zawodow a dalepłaćenje mzdow.
Warnuja před Kennedyjom
Israel nadběhuje wojerske objekty
Tel Aviv (dpa/SN). Israelske wójsko je po powalenju syriskeho mócnarja Bashara al-Assada minjene hodźiny Syrisku masiwnje bombardowało. Tole rozprawjeja syriscy aktiwisća. W běhu dwanaće hodźin su israelske wojerske lětadła wjace hač sto objektow w Syriskej nadběhowali. Nawoda syriskeje wobkedźbowarnje za čłowjeske prawa Rami Abdel-Rahman rěči w tym zwisku wo „najćešich nalětach Israela w stawiznach Syriskeje“.
Ze swojimi nadpadami chce Israel wočiwidnje wšitke wažne wojerske objekty a kompetency syriskeje armeje zničić, zo njemóhli je zběžkarjo přećiwo Israelej zasadźić. Nadpady měrja so na składy brónjow, łódźe syriskeje mariny, lětanišća a wojerske mašiny kaž tež na slědźenske centry. Do nalětow bě Israel syriski powětrowy škit w městach Damaskus, Homs, Latakia a Daraa blokował.
Israelski ministerski prezident Benjamin Netanjahu chce Israel po swójskich wuprajenjach na centralnu móc na Bliskim wuchodźe wutwarić, kotraž wuwiće regiona postaja.
Wysk a strach w Syriskej
Chaotiske poměry w Damaskusu – azylowe jednanja přetorhnjene
London/Damaskus (dpa/SN). Hladajo na połoženje w Syriskej stej Wulka Britaniska a Italska wšitke azylowe jednanja za ludźi z tutoho kraja přetorhnyłoj. Z tym slěduja zamołwići přikładej druhich europskich partnerow, rjekny italska ministerska prezidentka Georgia Meloni. Do toho bě so Meloni z ministrami knježerstwa zetkała. Rěčnik britiskeho nutřkowneho ministerstwa tohorunja zdźěli, zo nastupajo próstwy wo azyl najprjedy raz čakaja. „Runočasnje tuchwilne połoženje pruwujemy“, w Londonje rěkaše.
W Němskej bě zwjazkowy zarjad za migraciju a ćěkancy hižo wčera wšitke rozsudy nastupajo próstwy wo azyl z arabskeho kraja zadźeržało.
Serbja, požadajće so!
Choćebuske adwentne wiki wabjace
To a tamne (10.12.24)
Chrobły sobudźěłaćer tankownje je w Berlinje-Marienfelde rubježny nadpad wotwobarał. Po dotalnych dopóznaćach staj zakuklenaj mužej do tankownje přišłoj a sej z pistolu a popjerjowym sprayjom w ruce wot 29lětneho pjenjezy žadałoj. Přistajeny pak so spjećowaše a wšelake wěcy do rubježnikow mjetaše, doniž su wobaj njezminyštaj. Do toho pryskaštaj hišće spray do tankownje.
Pospyt wudrěwanja swójby bywšeho jězdźerja Formule 1 Michaela Schumachera wot dźensnišeho na Wuppertalskim sudnistwje wobjednawaja. Wobskorženi su třo mužojo. Hłownje wobskorženy, kiž sedźi w přepytowanskej jatbje, bě sej wot swójby 15 milionow eurow žadał a hrozył, zo priwatne fota swójby w interneće wozjewi. 53lětny bě jako sobudźěłaćer wěstotneje firmy pola Schumacherec dźěłał a tam tajnje fota zhotowił.
