Choćebuz (dpa/SN). Energijowy zastaraćel LEAG we Łužicy chce swoje industrijne objekty z pomocu trutow lěpje před paduchami a wandalizmom škitać. Lětace nastroje maja samostatnje na patruljowe lěty nad zawodom startować a móžne strachi spóznać. To zdźěla předewzaće. Stajnje zaso so paduši na ležownosće energijoweho zastaraćela měrja, zo bychu kopor a diesel kradnyli. ­Přećiwnicy wuhla běchu so minjeny čas husćišo na teren zawoda předrěli a w brunicowych jamach bagry a běžite pasy wobsadźili. Priwatna stražowanska słužba je z tym stajnje zaso přežadana. Dalši problem su njejapke nadběhi demonstrantow, kotřiž sej městnosće swojich akcijow dokładnje dorěča a chětro spěšnje a njewočakowano postupuja.

Truty móža daty na ležownosći zawoda a wokoło njeho spěšnje zběrać, dale sposrědkować a samo alarm zbudźić, LEAG nastupajo nowy projekt zdźěla. Nastroje maja sensory, kamery a analyzowe kompjutery, kotrež dźěłaja z pomocu kumštneje inteligency. Prěnje pospyty z trutami běchu wuspěšne. Truty chcedźa přichodne měsacy husćišo zasadźić.

Hodowne žiwidła pokradnyli su paduši we wobchodźe w Drježdźanach. Kaž policija zdźěla, spakosćichu woni mjaso kački, kołbaski k praženju a čerwjene wino. Rubizna je něhdźe 250 eurow hódna. ­Dokelž njejsu paduši durje chłódźaka zaso začinili, dyrbjachu přistajeni žiwidła w hódnoće 800 eurow preč ćisnyć. Nimo toho wobškodźichu paduši wokno.

Wólby najrjeńšeje žony w Nižozemskej po 35 lětach skónča. Wubědźowanje njehodźi so hižo do noweho časa, su sej organizatorojo wěsći. Město miss-wólbow zarjaduja internetnu platformu wokoło psychiskeje strowoty, socialnych medijow a mnohotnosće. Nastała je myslička, miss-wólby wotstronić, na zjawnej diskusiji wo prašenju, čehodla towaršnosć ­přeco hišće mjeztym dawno zestarjene ideale wo rjanosći a towaršnostnych ­wočakowanjach na jednotliwca pěstuje.

Berlin (dpa/SN). Kanclerski kandidat Zelenych Robert Habeck nochce so w přihotach wólbow zwjazkoweho sejma na telewizijnym rozestajenju z kanclerskej kandidatku AfD Alice Weidel wobdźělić. Tajki duel je zwoprědka jasnje wuzamknył, zdźěli rěčnik wólbneho bojoweho mustwa Habecka. Sćelakaj ARD a ZDF chcetaj diskusijny dwubój zwjazkoweho kanclera Olafa Scholza a kandidata CDU/CSU Friedricha Merza wusywać. Duel Weidel a Habecka tohorunja planuja.

Warnowanske stawki hroža

Berlin (dpa/SN). W Němskej hroža w nowym lěće warnowanske stawki zjawneje słužby komunow. Dnja 24. januara zahaja tarifowe jednanja za přistajenych wotpadkowych posłužbow, bliskowobchada a pěstowarnjow. Warnowanske stawki njewuzamknjemy, rjekny šef dźěłarnistwa ver.di Frank Werneke. Ver.di žada sej za 2,5 milionow přistajenych wosom procentow wjace mzdy, znajmjeńša pak 350 eurow wob měsac wjace. Dźěłodawarjo poskićuja wo wjele mjenje.

Z nawodu milicy rěčeli