Kozel: Mjeńšiny lěpje škitać
Antiserbske namócnosće tema w sakskim wustawowym wuběrku
Drježdźany (SN/MkWj). Přećiwo Serbam měrjace so njeskutki minjeneho časa běchu jedna tema wčerawšeho posedźenja wustawoweho wuběrka Sakskeho krajneho sejma. Serbski zapósłanc Lěwicy w sejmje Hajko Kozel bě wuběrkej cyłkownje 20 prašenjow k tutej za Serbow dosć wažnej temje zapodał.
Kozel chcyše wot justicneho ministra Sebastiana Gemkowa (CDU) mjez druhim wědźeć, kotre naprawy su na krajnej a zwjazkowej runinje planowane, zo njebychu so w prašenju statistiki antiserbskich njeskutkow stajnje zaso dospołnje rozdźělne ličby jewili. Nimo toho so Kozel prašeše, kelko statnych rěčnikow so z antiserbskimi chłostanskimi njeskutkami zaběra abo je to hižo činiło a kak chcedźa dalšim njeskutkam zadźěwać.
To a tamne (09.06.16)
Na terasy hosćenca hnězdo natwariła je sej kačka w Frankfurće nad Wódru. Mjeztym třeće lěto wona na wulkim kwětkowym horncu hnězdźi, hdźež so po wšěm zdaću wěsćiša čuje hač w bliskim parku. Kačka Agatha njeda so mylić, ani wot wopytowarjow restawranta ani wot rjedźerkow. Jeno přimnyć so njeda. Picu za čas lehnjenja tež wotpokazuje. Loni bě tam dźesać pilatkow wulahnyła.
Wjećba dyrbi być! Tole rjekny sej 24lětna w schwabskim Günzburgu, po tym zo bě ju přećel wopušćił. Z pomocu rezerwoweho klučika wza sej wona awto 30lětneho a je w bliskim jězoru podnuri. Jako muž swoje jězdźidło njenamaka, informowaše policiju a móžeše tež móžnu skućićelku pomjenować. Njetrjebachu tuž dołho pytać. Wohnjowa wobora wućahny awto z jězora.
Wo imunitu přišli
Istanbul (dpa/K/SN). Na počinanje prezidenta Recepa Tayyipa Erdoğana je dobra štwórćina zapósłancow turkowskeho parlamenta wo imunitu přišła. Z wozjewjenjom w hamtskim łopjenu je dwělomny zakoń płaćiwosće nabył. Wot naprawy potrjecheni drje su zapósłancy wšěch štyrjoch stron, hłownje pak prokurdiskeje HDP, kotraž ma pječa zwiski k zakazanej stronje PKK.
NPD so přesadźiła
Weimar. Prawicarskoekstremna strona NPD je so ze swojej wustawowej skóržbu přećiwo durinskemu ministerskemu prezidentej Bodej Ramelowej (Lěwica) přesadźiła. Durinske wustawowe sudnistwo we Weimaru je dźensa rozsudźiło, zo njeje Ramelow ze swojimi wuprajenjemi wo NPD swojej winowatosći k neutralnosći wotpowědował a zo je prawo strony na samsne šansy w politiskim wubědźowanju ranił. Ramelow bě čłonow NPD „nacijow“ mjenował a ludźom wotradźał, tutu stronu wolić.
Železnicarjo protestowali
Dospołnje zaraćeny je wot wčerawšeho Drježdźanski hotel ...
Pólšćina dale wulki problem
Wo mnohich mjezy přesahowacych projektach rěčeli
Podstupim (SN). Zamołwitaj knježerstwow za němsko-pólske zhromadne dźěło, braniborski ministerski prezident Dietmar Woidke (SPD) a statny sekretar pólskeho nutřkowneho ministerstwa Jakub Skiba, chcetaj mjezy přesahowacu kooperaciju dale wuwiwać. Tole je najwažniše poselstwo po prěnim wopyće Skiby pola Woidki, ze zhromadneje medijoweje zdźělenki wuchadźa. Koordinatoraj běštaj do toho lětuše posedźenje němsko-pólskeje knježerstwoweje komisije za regionalne a pomjezne zhromadne dźěło zahajiłoj, kotraž woswjeći lětsa 25. jubilej swojeho wobstaća.
Zakoń zreformowany
Clinton dobyła
Njewjedra móžne
To a tamne (08.06.16)
Trikot koparjow němskeho narodneho mustwa je zwjazkowa kanclerka Angela Merkel tuchwilu woblečena – znajmjeńša jako postawa w Berlinskim kabineće wóskowych figurow, kaž rěčnica kabineta zdźěli. Zo so to ludźom lubi, bě tele dny na fotowym terminje před Braniborskimi wrotami widźeć. Tójšto turistow je sej tam selfie z wóskowej kanclerku třěliło. Po europskich mišterstwach 10. julija dóstanje Angela Merkel zaso swój tradicionalny dwudźělny outfit.
Dobry čuch dopokazała je policija w Mnichowje. W rumnosćach jeje straže a starym měsće wonješe za marihuanu. Rozhladujo so po wokolinje wuhladachu zastojnicy třoch młodostnych na balkonje susodneho domu, kotřiž runje joint kurjachu. Při přepytowanju bydlenja namakachu marihuanu a utensilije. 26lětneho wobydlerja zajachu.
Jědnaće mortwych bomby dla
Istanbul (dpa/SN). Při bombowym nadpadźe w starym měsće turkowskeje metropole Istanbula je dźensa rano znajmjeńša jědnaće ludźi žiwjenje přisadźiło. Wopory su sydom policistow a štyrjo ciwilisća, kaž Istanbulski guwerner Vasip Sahin medijam zdźěli. Na wšě 36 wosobow so zrani, třo z nich ćežko. Bomba rozbuchny pódla policajskeho busa. Tukaja na zakazanu kurdisku stronu PKK. Městno atentata njebě ani kilometer wot wulkeho bazara města zdalene.
Kurdam brónje njedawać
Berlin (dpa/SN). Němske měrowe slědźenske instituty sej žadaja, irakskim Kurdam žane dalše brónje njedawać. Zwjazkowe knježerstwo njeje lěta 2014, jako bě so za dodawanje bróni rozsudźiło, interne boje wo móc mjez Kurdami kaž tež strach, zo brónje dale dawaja, dosahajcy wobkedźbowało, rěka w dźensa wozjewjenej zhromadnej rozprawje wjacorych institutow. Němska bě Kurdam brónje dawała, zo móhli přećiwo teroristiskej milicy Islamski stat wojować.
130 ludźi z 20 krajow
