Franciskus – swědomje swěta
Aachen (B/SN). Bamž Franciskus swojej cyrkwi do swědomja rěči, ale tež Europje a swětej. Za to dósta wón njedawno Karlowe myto. Štó to hižo móže? Swětej do swědomja rěčeć, porokować, warnować runje tak kaž zmužitosć dawać? Awtorita Franciskusa ma swój zakład we wosobinskej ponižnosći. K tomu přińdźe jeho zmužitosć, wěcy direktnje a jasnje mjenować. Tež jeho gesty maja w přiběracym medialnym času wulki wuznam. A Franciskus tole wobknježi: hłuboki pokłon při modlitwje, myće nohow jatym w romskim jastwje, wobjimanje zbrašeneho muža na Pětrowym naměsće, prěnje pućowanje k ćěkancam na kupje Lampedusa. Před Běły dom we Washingtonje je wón z małym awtom přijěł, z kupy Lesbos je ćěkancow sobu domoj wzał atd. Mjez njewěriwymi je wón runje tak woblubowany kaž mjez wěriwymi.
Film wo swjatym Benje
To a tamne (31.05.16)
Z wunamakanej zběrku na dobro noweho kumštneho trawnika na sportnišću sewjerorynsko-westfalskeho Warsteina staj młodostnaj w starobje 13 a 15 lět spytałoj, kapsny pjenjez wuzbytkować. Jedyn z darićelow wšak so w sportowym towarstwje akcije dla naprašowaše, hdźež ničo wo njej njewědźachu. Jako muž młodostneju znowa při zběranju pjenjez lepi, jeju zadźerža a zawoła policiju. Staršemu hrozy nětko skóržba jebanstwa dla.
Z drogowym testom pola policije je 22lětny swojej přećelce w Kölnje dopokazać chcył, zo drogi njebjerje. Jědźeštaj tuž njedźelu na policajsku stražu w Sankt Augustinje, hdźež jemu přeće za testom spjelnichu: Tón pak wujewi, zo bě kokain brał, štož dyrbješe skónčnje přiznać. Dokelž bě pod wliwom drogow z awtom jěł, hrozy jemu nětko sudniske jednanje.
Merkel: Šamałe wuprajenje
Berlin (dpa/SN). Zwjazkowa kanclerka Angela Merkel (CDU) wuprajenje městopředsydy strony AfD Alexandera Gaulanda hladajo na narodneho koparja Jérôma Boatenga raznje zasudźa. „To je šamała a zrudźaca sada“, komentowaše knježerstwowy rěčnik Steffen Seibert dźensa w Berlinje wuprajenje Gaulanda we wudaću Frankfurter Allgemeine Sonntagszeitung. Gaulanda tam ze słowami cituja: „Ludźo sej Boatenga waža, dokelž derje kopańcu hraje, ale za susoda měć jeho nochcedźa.“ Wuprajenje bě po wšěm kraju rozhorjenje a protest zbudźiło.
Kritizuja planowanu rezoluciju
Istanbul (dpa/SN). Turkowske knježerstwo je planowanu rezoluciju Němskeho zwjazkoweho sejma k masakram Osmanow na Armenjanach w lěće 1915 kritizowało. „Njeje nadawk parlamenta, tehdyše podawki wuswětlić. To je nadawk stawiznarjow“, rjekny dźensa wicepremier a rěčnik knježerstwa Numan Kurtulmuş. Zwjazkowy sejm chce štwórtk rezoluciju schwalić, z kotrejž zastopnjuje morjenje Armenjanow jako „ludomordarstwo“.
Nowe lěhwa nastali
Verdun je warnowanje
Třo ludźo při zliwkach žiwjenje přisadźili
Kompromis trěbny
Wagenknecht za swójski puć
To a tamne (30.05.16)
Wjace hač 23 000 cigaretow chcyše swójba z Berlina z Pólskeje do Němskeje pašować, za čož wužiwaše dźěćacy wozyčk a wjacore kófry. Kaž policija zdźěli, su zastojnicy swójbu, porik z dwěmaj dźěsćomaj, w dwórnišćowej hali w Frankfurće nad Wódru kontrolowali. Pěškam běchu zdźěla derje widźomne cigarety napadnyli. Cyłkownje 114 tyzow po dźesać tyzkach pólskich cigaretow zastojnicy z wačokow wućahnychu.
K bijeńcy při wěrowanju je na stawnistwje w Mannheimje dóšło, při čimž so přistajena stawnistwa zrani. Kaž rěkaše, njeběchu přiwuzni nawoženje z njewjestu spokojom. Na to dóńdźe na stawniskej žurli k bijeńcy. Přiwšěm so porik zmandźeli a swjećeše kwas bjez dalšich mylenjow. Přećiwo štyrjom podhladnym přepytuje policija nětko ranjenja ćěła a wobškodźenja wěcow dla.
„Floskle spraskać su wšitcy mištersce wobknježili“
Lětuši Budyski forum zaběraše so ze systemom knjejstwa NDR. Nastupajo jón postajacej komponenće SED a stasi su prof. dr. Rainer Eckert, bywši direktor Lipšćanskeho časostawizniskeho muzeja, wojowar za wobydlerske prawa Wolfgang Templin a wědomostny nawoda NDRskeho muzeja w Berlinje dr. Stefan Wolle na podijowej diskusiji wčera popołdnju w Budyskej piwarni wo swojich nazhonjenjach rozprawjeli.
Wo ćěkancach debatowali
Lipsk (dpa/SN). Wužadanja w zwisku z politiku ćěkancam napřećo běchu ćežišćo dźensnišeho dnja na 100. zjězdźe katolikow w Lipsku. Zwjazkowy nutřkowny minister Thomas de Maizière (CDU) debatowaše wo tym na forumje „Njezabudźće na hospodliwosć“. Prezident zwjazkoweho sejma Norbert Lammert wobdźěli so mjez druhim na zetkanju wšelakich kulturow. Wčera bě zwjazkowy prezident Joachim Gauck ludźi namołwił so ćěkancow njebojeć.
Čołm ćěkancow so podnurił
Rom (dpa/SN). Před libyskim pobrjohom sta so wčera znowa tragedija ćěkancow ze znajmjeńša 20 smjertnymi woporami. Hač do wječora móžachu 88 ludźi žiwych z wody wućahnyć, kaž italska mórska straža zdźěli. Drjewjany čołm z wjace hač sto ćěkancami bě so 30 mórskich milow před Libyskej podnurił. Mnozy spytachu so najebać to čołma dźeržeć. Z helikopterow mjetachu jim płuwanske lacy do wody.
Reaguja na kritiku Gysija
