Frankfurt n. M./Viernheim (dpa/SN). Bjerjer zastajencow we Viernheimje je 19lětny Němc z Mannheima, bydlacy naposledk w Delnjej Sakskej. Tole zdźěli dźensa statne rěčnistwo w Darmstadće. Młody muž wohrožowaše wčera popoł­dnju w kinje štyrjoch přistajenych a 14 wopytowarjow, mjez kotrymiž běchu tež dźěći. Při sebi měješe trašawki a tohorunja atrapy granatow. Wótre brónje pak žane njeměješe. Motiw skućićela je dale njeznaty. Pokazki na teroristiski abo politiski pozadk policija tuchwilu žane nima. 19lětny bě wčera maskěrowany do kina přišoł a tam zastajencow brał. Přiwołana policija jeho pozdźišo zatřěli. Ze zastajencow so nichtó njezrani. Dalše informacije wo skućićelu njeje statne rěčnistwo dotal žane mjenowało.

Drježdźany (dpa/SN). Zeleni a Lěwica Sakskeje zasadźeja so za to, zawěsćić dawkipłaćerjow před rizikami brunicoweho hórnistwa. Čorno-čerwjena koalicija porno tomu žanu potrjebu njewidźi. To je facit wčerawšeje debaty w Drježdźanskim krajnym sejmje. Zeleni běchu sej ju wuprosyli a pokazachu na studiju, z kotrejež wuchadźeja wulke rizika zjawnych etatow. „Nichtó nochce koncernam wumjetować, zo swoje zakonske winowatosće njespjelnjeja“, rozłoži zapósłanc krajneho sejma Gerd Lippold (Zeleni). Prašenje pak je, hač to scyła móža. Lippold skedźbni při tym na rukowanske hranicy w padźe insolwency. Tak su rizika za towaršnosć wulke, zo na kóštach brunicoweho wobchodnistwa prawdźepodobnje sedźo wostanu. Tohodla dyrbi sej Sakska wot brunicowych předewzaćow wěstotne srědki žadać.

Britojo so z wjetšinu za wustup ze zhromadźenstwa EU wuprajili

London/Berlin (dpa/K/SN). Štož bě so za hotowe złonjedobro wudawało, je so stało: Britojo su so z 51,9 procentami za to­ wuprajili, zo Wulka Britaniska z Europskeje unije wustupi – po štyrceći lětach. 17,4 miliony wolerjow je za tak mjenowany „brexit“ hłosowało; 16,1 milion (48,1 procent) chcyše w zhromadźenstwje statow wostać. Wólbne wobdźělenje wučinješe 72,2 procentaj. W Jendźelskej a Waliziskej wupraji so wjace hač 70 procentow za wustup, w Šotiskej a Sewjernej Irskej wjace hač 70 procentow za zwostaće­ w EU. We woběmaj zběhaja so hižo hłosy za wotšćěpjenje wot Wulkeje Britaniskeje a za zwostaće w EU.

Budźe pinguin Flocke kraku Paula naslědować? Zwěrjeći orakl z Błótow bě mjenujcy dotal wšitke tři hry němskich koparjow na europskich mišterstwach prawje wěšćił. A jeli Flocke ze swojim tipom prawje leži, Němcy njedźelu z dobyćom přećiwo Słowakskej do štwórćfinala zaćahnu. Hladarka zwěrjatow bě pinguinej bulej wobeju mustwow před noze połožiła, a tón měrješe so runy puć na němski: jasne dobyće našich potajkim.

Znate čorne durje z čisłom 10 na Londonskej Downing Street zdachu so być dźensa po referendumje Brexita dla kaž z hozdźemi zabite. Nichtó z politikarjow nochcyše do zjawnosće. Jako wosebje zmužity wopokaza so jeničce „słužbny“ kocor Davida Camerona, Larry the Cat. Oficielnje wšak mjenuja jeho Chief Mouser to the Cabinet, dokelž w a wokoło sydła britiskeho premiera myše łóji.