Zapalerja lepili
Berlin. Policija je minjenu nóc w Berlinje-Lichtenbergu zapalerja awtow lepiła a zajała. Zastojnicy wobkedźbowachu, kak je muž spytał wjacore awta zapalić. Woni pak tomu zadźěwachu. Nětko pruwuja politiski pozadk a prašenje, hač je 26lětny dalše zapalerstwa zawinił. Hakle w nocy na wutoru běchu so w samsnej štwórći tři awta wupalili. Po wuhnaću ilegalnych wobydlerjow z domu w Friedrichshainje 22. junija je lěwicarskoekstremna scena z wjace hač 50 nadpadami na awta a nowotwarske objekty přećiwo akciji protestowała.
Dyrbi šěsć lět do jastwa
Pretoria (dpa/SN). Dlěje hač tři lěta po smjertnych wutřělach na jeho přećelku su něhdyšeho južnoafriskeho načolneho sportowca Oscara Pistoriusa k šěsć lětam jastwa zasudźili. Sudnica Thokozile Masipa wusud dźensa w Pretoriji wozjewi. Statne rěčnistwo je sej 15 lět jatby žadało. Pistorius bě swoju přećelku Reeva Steenkamp lěta 2013 zatřělił, dokelž měješe ju za paducha. Za to zasudźichu 29lětneho k pjeć lětam jastwa. Přećiwo tomu pak zapoda statne rěčnistwo rewiziju.
Dobrowólnje zaso domoj
W parku jendźelskeho města Exeter wopominaja tele dny ze swojoraznej ...
Hara w AfD
Žadaja sej „stresowy test“
Wobmyslenja opozicije hladajo na noweho wobsedźerja łužiskeje brunicy
Podstupim/Drježdźany (dpa/SN/MkWj). Braniborske knježerstwo SPD a Lěwicy chce pruwować dać, hač móhło so stać, zo dyrbi zjawnosć kóšty za sćěhi wudobywanja brunicy přewzać. Za to chcetej wobě stronje studiju zhotowić dać, kaž wčera w Podstupimje zdźělichu. Při tym chcedźa zwěsćić, hač wobsteja zakonske njedostatki w zwisku z trěbnymi nalutowankami, kotrež maja brunicowe předewzaća za tajke přidatne kóšty składować, zdźěli frakciski šef Lěwicy Mike Bischoff. Braniborska a Sakska chcetej so intensiwnje wo to starać, wón rjekny.
Opozicionelni Zeleni žadaja sej porno tomu njewotwisny „stresowy test“ za čěski koncern EPH, kotryž chce łužisku brunicowu wotnožku šwedskeho energijoweho koncerna Vattenfall kupić. Zjawnosć dyrbjała sej wotpowědne wěstosće po hórniskim zakonju wužadać, měnješe frakciski šef Zelenych Axel Vogel. Kraj Braniborska dyrbjał na tym wobstać, zo su prawe pjenjezy składowane a nic jenož wobsydstwowe hódnoty kaž milinarnje abo składźišća brunicy.
Opozicija zwrěšćiła
Nawal přez morjo
Žadaja sej wjace pjenjez
Naćisk etata schwaleny
To a tamne (06.07.16)
Lubowanu ilegalnu plantažu konopje swojeho syna je nan w Awstralskej spalił, po tym zo běštaj so nan a syn zwadźiłoj. Syn zawoła na to policiju. A ta jemu wuwědomi, zo wšak je plahowanje drogi ilegalne, jeje zničenje pak nic. Dokelž bě woheń wšitke dopokazy zničił, njejsu młodeho muža wobskoržili.
Prominentnosć druhdy ničo njepomha – to dyrbješe čěski ministerski prezident Bohuslav Sobotka na filmowym festiwalu w Karlovych Varach bolostnje nazhonić. Wón sedźeše z mandźelskej w kinowej žurli, jako jeho wopytowarka na to skedźbni, zo na jeje městnje sedźi. Jako dopokaz dźeržeše jemu lisćik pod nós. Tak premierej Sobotce ničo druhe njezby, hač sej druhe městno pytać.
Nowu 50eurowku předstajili
Frankfurt n. M. (dpa/K/SN). Europska centralna banka (EZB) je dźensa nowu 50eurowku předstajiła. Do wobběha ma so wona klětu w nalěću dać. 50eurowka je po 5-, 10- a 20eurowce štwórta bankowka, kotruž po lěće 2013 wuměnja. W přichodnych lětach matej tež 100- a 200eurowka sćěhować. 500eurowku chce EZB wotstronić, dokelž ju kriminelni přečasto za manipulowanje znjewužiwaja.
Referendum wo ćěkancach
Budapest (dpa/SN). Madźarojo maja 2. oktobra wo tym wothłosować, hač wot Europskeje unije planowanu nanuzowanu kwotu k rozdźělenju ćěkancow w krajach EU akceptuja abo nic. Statny prezident János Áder wukaza dźensa termin referenduma, kotryž knježerstwo hižo měsacy planuje. Při wothłosowanju maja ludźo na prašenje wotmołwić: „Chceće, zo Europska unija tež bjez dorěčenja z madźarskim parlamentom njemadźarskich staćanow do Madźarskeje sćele?“ Prawicarskopopulistiske knježerstwo kraja kwoty wotpokazuje a zhromadnje ze Słowakskej před Europskim sudnistwom přećiwo tomu skorži.
Ramadan so kónči
