To a tamne (13.05.16)
Mysteriozneho paducha całtow je policija w Sewjerorynsko-Westfalskej wuslědźiła, byrnjež jeho njedosahnyła. Jedna so wo rapaka, štož fota dokumentuja. Muž z Aachena bě so na policiju wobroćił, dokelž běchu so dny dołho całty při durjach zhubjeli. Ta da so do dźěła a nastaji kamery. Wobrazy pokazuja, kak je čorny ptak wušiknje titu wočinił a jednu całtu po druhej spakosćił. Z kóždej całtu je ekstra do swojeho schowa lećał. Jeho přesćěhać bě bjez zmysła.
Bombowy alarm zawiniła je dźěćaca kniha w Berlinskim Domje němskeho hospodarstwa. Twarjenje, w kotrymž maja wodźace gremije hospodarstwa swoje běrowy, dyrbjachu wčera kompletnje ewakuować, zo bychu fachowcy podhladny pakćik přepytowali. W nim bě dźěćaca kniha z bateriju a wótřerěčakom, kotraž čłowječe a zwěrjace hłosy napodobnja.
Nowa raketowa stacija
Deveselu (dpa/SN). Najebać protesty Ruskeje NATO syć raketywotwobaranskich stacijow dale wutwarja. Dźensa su w rumunskim Deveselu w přitomnosći generalneho sekretara NATO Jensa Stoltenberga nowu staciju přepodali. Dalšu chcedźa jutře na sewjeru Pólskeje twarić započeć. Ruska wojerskemu zwjazkej wumjetuje, zo ze stacijemi strategisku a nuklearnu runowahu w regionje myli. Stoltenberg pak dźensa hišće raz potwjerdźi, zo njeměrja so rakety přećiwo Ruskej
Müller: Přilubjenja dodźeržeć
Berlin (dpa/SN). Zwjazkowy minister za wuwiće Gerd Müller (CDU) mjezynarodne zjednoćenstwo statow namołwja, přilubjene pomocne srědki za wopory wobydlerskeje wójny w Syriskej spěšnje wupłaćić. Najpozdźišo na wjeršku UNO k humanitarnej pomocy 24. meje w Turkowskej měli pjenjezy „na blidźe być“, rjekny Müller dźensa w zwjazkowym sejmje. Na Londonskim zetkanju w februaru běchu kraje wjace hač dźewjeć miliardow eurow pomocy přilubili.
Prezidentka wotsadźena
Sta ludźi su so dźensa z bayerskeho Regensburga na najdlěše pěši ...
Rubjene wobrazy prezentowali
Zhubjeny handy namakany
To a tamne (12.05.16)
Faktisce sam popadnył je so paduch w Kamjenicy, chowacy so před policiju. 25lětny bě sej minjenu nóc w běrowowym domje do lifta wućeknył a njemóžeše so z njeho hižo sam wuswobodźić. Policisća běchu rěbl při domje a rozbite wokno wuhladali. Zhromadnje z psom za paduchom pytachu a namakachu jeho w lifće. Durje wočinić pak dyrbješe přiwołana wohnjowa wobora. Jako jeho ze schowa „wuswobodźichu“, paducha zajachu. Pozdźišo jeho zaso pušćichu.
Třilětny šofer awta je w delnjej Bayerskej cyły rjad kolesow wobškodźił. Staršej w starobje 19 a 20 lět běštaj we wobchodźe kolesow w Pfarrkirchenje. W awće čakacy synk widźeše, zo bě nan klučik tčacy wostajił, a zaswěći motor. Awto něšto metrow doprědka zjědźe a wobškodźi před wobchodom stejace kolesa. Cyłkowna škoda wučinja 7 000 eurow.
„Mamy struktury wotewrěć“
Designowany direktor Załožby za serbski lud Jan Budar wo přichodźe
Jako noweho direktora Załožby za serbski lud je jeje rada 12. apryla Jana Budarja z Budyšina wuzwoliła. 41lětny diplomowy inženjer za medijowu techniku bě wot lěta 2011 do 2015 naměstnik čłona załožboweje rady, wot lońšeho jej předsyduje. Tuchwilu dźěła jako teamowy koordinator a wuwiwar software w ličenskim centrumje itelligence O&S w Słonej Boršći. Zastojnstwo direktora wón najzašo 1. oktobra nastupi. Cordula Ratajczakowa je so z nanom třoch dźěći w tutej přechodnej fazy wo minjenych nazhonjenjach kaž tež wo předstawach za přichod rozmołwjała.
Kak wupada rezimej Wašeho dotalneho skutkowanja w załožbowej radźe?
Nadróžny popłatk rozšěrja
Berlin (dpa/SN). Nadróžny popłatk za nakładne awta ma so wot 1. julija 2018 na wšitke zwjazkowe dróhi Němskeje rozšěrić. To je knježerstwo dźensa wobzamknyło. Tak matej so wobchad lěpje rjadować a statna pokładnja z přidatnymi dochodami dweju miliardow eurow napjelnić. Z noworjadowanjom zapřijmu 40 000 dalšich kilometrow dróhow w Němskej. Dotal dyrbja nakładne awta, ćeše hač 7,5 tonow, na 13 000 kilometrach awtodróhow a na 2 300 kilometrach zwjazkowych dróhow popłatk płaćić.
Z předchadnikom wotličiła
Waršawa (dpa/SN). Narodnokonserwatiwna pólska ministerska prezidentka Beata Szydło je předchadźace liberalnokonserwatiwne knježerstwo njewšědnje raznje kritizowała. „Čas tohole knježerstwa hodźi so w třoch słowach zjeć: egoizm, brojenje pjenjez a ignorowanje ludźi“, rjekny Szydło dźensa w sejmje. Wotličiła je wona zdobom z bywšim premierom, dźensnišim prezidentom rady EU Donaldom Tuskom.
Miliony dyrbja ćěkać
