Hoberski wuspěch mjeńšin
Nowy zakoń w Schleswigsko-Holsteinskej zmóžnja němsko-friziske tafle
Flensburg (SN). W Schleswigsko-Holsteinskej su minjeny kónc tydźenja prawniske zakłady za to tworili, zo změja w Sewjernej Friziskej přichodnje dwurěčne tafle. Knježerstwo, wobstejace z SPD, Zelenych a Južnoschleswigskeho wolerskeho zwjazka (SSW), je naćisk wotpowědneho zakonja schwaliło, kaž předsyda SSW Lars Harms w nowinskej zdźělence informuje. „Wjacerěčne napisy su zjawnje widźomne znamjo kulturneje a rěčneje mnohotnosće, kotraž Sewjernu Frizisku a Schleswigsko-Holsteinsku tak jónkrótnu čini“, piše Harms. Naprawa njezaruči jeničce škit a zesylnjenje friziskeje mjeńšiny, je sej Harms wěsty. Wona je zdobom wažny a jónkrótny signal. Za zwoprawdźenje dwurěčnych napisow w Sewjernej Friziskej přewostaji kraj lětsa a klětu cyłkownje 300 000 eurow.
Nětko Sakska na rjedźe
Schnack počesćili
To a tamne (04.05.16)
Palacy so nahłownik je znjezboženemu motorskemu w delnjej Frankskej žiwjenje wuchował. 35lětny bě ze swojej mašinu w Ostheimje z dotal njeznateje přičiny z dróhi zajěł a sydom metrow daloko na polo zlećał. Dokelž móžeše so lědma hibać a tež dróhu njewidźeše, muž swój nahłownik ze zapalakom zapali. Nimojěducy šofer awta je woheń wuhladał a wuchowansku słužbu zawołał. Helikopter dowjeze žiwjenjastrašnje zranjeneho bikera do chorownje.
Chětro njepřećelna kokoš w bayerskim Kitzingenje je tomu zadźěwała, zo ludźo do frizerskeho salona zastupja. K tomu wupěraše so wona kaž stražnik před diskoteku. Kokoš bě tak agresiwna, zo sej nichtó nimo njezwěri. Hakle policija to změni: Wona kokoš z chlěbom wot duri wotwabi a „zaja“. Nětko pyta za wobsedźerjom pjeriteho stražnika.
Žane přidatne prawa
Merkel: Dobre argumenty
Berlin (dpa/SN). Zwjazkowa kanclerka Angela Merkel (CDU) spušća so w rozestajenju z AfD po swójskich wuprajenjach na „dobre argumenty“. „Njeje noweje strategije“, rjekny wona dźensa na wopyće w jednej z Berlinskich šulow. Přiwšěm je wažne, ludźom hišće nazornišo wuswětlić, kotre přeswědčenja nas nawodźeja, Merkel rozłoži. „Mamy dosć argumentow, so z AfD rozestajeć, bjez złeje wole a bjez předsudkow.“ Wolerjow AfD chcyła wona po tymle puću wróćo zdobyć.
Přihłosowanje woteběra
Berlin (dpa/SN). Wjetšina wobydlerjow Němskeje ma demokratiju dale za najlěpšu statnu formu, přihłosowanje pak je minjene lěta woteběrało. Po dźensa wozjewjenym wuslědku woprašowanja instituta Forsa ma 88 procentow woprašanych ideju demokratije porno druhim statnym formam za najlěpšu. Lěta 2008 bě hišće 95 procentow toho měnjenja. Na wuchodźe měješe tehdy 93 proc. ludźi demokratiju za dobru wěc, dźensa jenož hišće 81 proc.
Žurnalisća wohroženi
Něhdźe 35 000 dźěławych je so dźensa w Sewjerorynsko-Westfalskej ...
Dokładniše informacije wočakowali
Budyšin (SN/at). We wobłuku schadźowanja zwjazkoweho dźěłoweho zjednoćenstwa Etniske mjeńšiny w stronje Lěwicy je so minjenu sobotu w Budyšinje iniciatiwa za serbske ludowe zastupnistwo Serbski sejm předstajiła. Po zawodnym přednošku rěčnika dr. Měrćina Wałdy wo pochadźe Serbow a narokach iniciatiwy wuwi so kritiska diskusija. Hdyž je rěčnik dźěłoweho zjednoćenstwa, zapósłanc Hajko Kozel, trěbny mjezsobny dialog do srjedźišća wuměny myslow stajił, njemóžeše jeho korěčnica dr. Renate Harcke přesłapjenje zatajić, zo ze stron Serbskeho sejma dale konkretneho wuprajenja nastupajo jeho přisłušnosće njeje. Dale nima wona zaćišć, zo so iniciatiwa na sakski a braniborski parlament wobroći. Sejmar prof. dr. Klaws Thielmann z Chasowa mjenowaše dramatiske wosłabjenje serbstwa, čemuž maja wšitcy Serbja zhromadnje znapřećiwić. „Njeje přećiwka k Domowinje, wona je wysoko připóznata institucija“, rjekny wón na słowa Hinca Cuški z Budyšina. Tón bě wobmyslenje zwuraznił, zo měli so Serbja pak za Domowinu pak za Serbski sejm rozsudźić.
Hišće wjetša dźěra w kasach
Wjesnjanosća kritizuja tarifowy kompromis za zjawnostnu słužbu
Budyšin (SN/mwe). Dźěłarnistwo ver.di w Sakskej, Saksko-Anhaltskej a Durinskej je minjeny pjatk docpěty tarifowy kompromis w zjawnostnej słužbje jako wuspěch hódnoćiło. Na zakładźe zakónčaceho a płaćiweho postajenja dóstanjetej wjace hač dwaj milionaj přistajenych w Němskej wot Zwjazka a komunow w dwěmaj etapomaj hač do klětušeho 4,75 procentow wjace mzdy.
