Njesłyšany podawk
ADAC lonitójšto dźěła měł
To a tamne (11.03.25)
Nimale 150 runje wulehnjenych ćipkow su njeznaći njedaloko Lipska při zymskich temperaturach na polu wusadźili. Pomocnicy su je po pokiwje swědkow zezběrali a do doma za zwěrjata dowjezli, kotryž je na zastaranje tajkeho skotu specializowany. Ćipki drje normalnu starobu klasiskeje kokoše nihdy njedocpěja, kaž nawoda zwěrjatownje rjekny. Za to pak njetrjebaja čwěle znjesć, kotrež bychu je w klětkach wočakowali.
Na wšěch 11 000 litrow mloka je nakładne awto ducy do mlokarnje při wobchadnym njezbožu w Schleswigsko-Holsteinskej njedaloko danskeje mjezy zhubiło. Šofer dyrbješe so napřećo přijěducemu awtej wuwinyć. Připowěšak mlokoweho awta suny so do přirowa, na čož mloko wuběža. Šofer tamneho awta jědźeše dale, bjez toho zo by so wo sćěhi njezboža starał. Policija pad přepytuje.
Dopomnjenki direktora
Drježdźany (B/SN). 81lětny twarski direktor Drježdźanskeje cyrkwje Našeje knjenje Eberhard Burger zhladuje spokojnje na dokonjane dźěło. Ewangelskemu tydźenikej Der Sonntag wón praji: „Sym jara na to dźiwał, zo cyrkej zaso po originalu nastanje. Wězo su kóšty w běhu twara stupali, ale smy tež tójšto z dobrowólnymi pomocnikami zdokonjeli. Smy w dobrej zhromadnosći dźěłali a swjećili, a to je mje stajnje pohonjowało.“
Knižne wuznamjenjenje
Bonn (B/SN). Němska biskopska konferenca je lětsa mjez 139 knižnymi titlemi ze 46 nakładnistwow knihu „Himmelwärts“ awtorki Karen Köhler a ilustratorki Beje Dvies jako dobyćerku wuzwoliła. Dźesaćlětnej holčce, kotrejž je mać zemrěła, so jara za njej styska. Katolske dźěćace a młodźinske myto je z 8 000 eurami dotěrowane a budźe 15. meje 36. raz w Freiburgu spožčene.
Wulke wužadanje
Bas chce posedźenje zwołać
Berlin (dpa/SN). Prezidentka zwjazkoweho sejma Bärbel Bas (SPD) chce najebać kritiku wurjadne posedźenje stareho zwjazkoweho sejma zwołać. Namołwu frakcije AfD, posedźenje wotprajić, wona wotpokazuje. Při tym zepěra so Bas na artikl 39 zakładneho zakonja, kotryž posedźenje předpisuje, hdyž sej to třećina zapósłancow žada. Na posedźenju chcedźa po woli CDU/CSU a SPD nowe kredity sta miliardow eurow za wójsko a infrastrukturu wobzamknyć.
Söder ze Zelenymi njerěči
Berlin (dpa/SN). Na rozmołwach ze Zelenymi nastupajo podpěru planow CDU/CSU a SPD za miliardy eurow wopřijace nowe kredity nochce so předsyda CSU Markus Söder wobdźělić. Je za wobě stronje lěpje, hdyž předsyda CDU Friedrich Merz rozmołwy nawjeduje, rjekny bayerski ministerski prezident w sćelaku ARD. Söder bě we wólbnym boju, ale tež hižo do toho, Zelenych stajnje zaso wótrje kritizował. Nětko apeluje Söder na statnu politisku zamołwitosć Zelenych.
Rutte w Sarajewje
Přistajeni Berlinskeho lětanišća BER su dźensa rano slědujo ...
Wólbny dobyćer wuzamknjeny
Rozmołwy w Sawdi-Arabskej
Tójšto prašenjow wotewrjenych
Berlin (dpa/SN). Nachwilna bilanca sonděrowanskich rozmołwow mjez CDU/CSU a SPD pokazuje, zo su wobdźělnicy zasadnje zwólniwi, koaliciske jednanja wjesć. Powěsćernja dpa je lisćinu temow zestajała, kotrež su přiwšěm dale wotewrjene.
Mjeztym zo maja k financowanju zwjazkoweje wobory zhromadny plan, so prašenje woborneje winowatosće abo słužbneho lěta na lisćinje njejewi. We wonkownej politice njeje jasne, hač dalšemu dodawanju brónjow Ukrainje za tři miliardy eurow přihłosuja. Tež rakety Taurus abo europska měrowa jednotka w Ukrainje tam naspomnjene njejsu.
Što budźe z wjele diskutowanym herbstwom amploweje koalicije – ze zakonjom za tepjenje? CDU bě kruće přilubiła, jón wotstronić. W sonděrowanskej papjerje wostanje to njenaspomnjene. Nastupajo renty běchu slubili, niwow wobchować. Njejasne je, na kajkej runinje. Tež dalše wobstaće atomowych milinarnjow, kiž chcyše CDU „pruwować“, so w zhromadnym dokumenće njejewi.
Seehofer: Něšto běži wopak
Bywši předsyda CSU wumjetuje uniji ranjenje přilubjenjow
Mnichow (dpa/SN). Bywši předsyda CSU a zwjazkowy minister za nutřkowne naležnosće Horst Seehofer wumjetuje uniji CDU/CSU hladajo na planowane přiwzaće nowych kreditow, zo přilubjenja njedodźerži. Plan njewotpowěduje „wot nas připowědźenej sprawnej změnje politiki“, rjekny Seehofer nowinje Bild. „To je runje to napřećiwne toho, štož smy do wólbow rjekli“, wón zwurazni a doda: „Wočiwidnje su SPD a Zeleni wólby přěhrać dyrbjeli, zo bychu na kóncu to dóstali, štož su měć chcyli.“
Z wida Seehofera je wulke zadołženje stajnje riziko, za hospodarsku stabilitu runje tak kaž za inflaciju. „Mali ludźo dyrbja to na kóncu płaćić. Zadołženje je njesocialne“, bywši bayerski ministerski prezident měni.
W lěće 2009 su mjezu zadołženja (Schuldenbremse) do wustawy zapisali. Nětko chcetej ju unija a SPD zběhnyć. „Hdyž njemóžemy swój přichod wjace z gigantiskich dawkowych dochodow financować, kotrež wšak mamy, potom něšto wopak běži.“
