Washington (dpa/SN). Prezident USA Donald Trump je dekret podpisał, po kotrymž ma so zwjazkowe kubłanske ministerstwo kraja rozbić. W dekreće namołwja wón ministerku za kubłanje Lindu McMahon wšo za to činić, zo bychu so funkcije ministerstwa na minimum redukowali. Hižo před něhdźe tydźenjom bě knježerstwo USA nimale połojcu přistajenych ministerstwa pušćiło. Zo bychu resort dospołnje wotstronili, dyrbi tež kongres planam přihłosować. W USA su za kubłanje hłownje zwjazkowe staty zamołwite, zwjazkowe ministerstwo ma jeničce podpěrace nadawki. Wone rozdźěluje na přikład spěchowanske pjenjezy, kotrež mnohe kubłanišća trjebaja. To ma resort tež w přichodźe činić.

Frankfurt nad Mohanom/London (dpa /SN). Zawrjene Londonske lětanišćo Heathrow ma tež wuskutki na najwjetše lě­tanišćo Němskeje w Frankfurće nad Mohanom. Tola nic masiwne, zdźěli rěčnik lětanišća. Wot dźensa planowanych 1 230 lětow z cyłkownje 170 000 pasažěrami dyrbjachu zamołwići pječa jenož šěsć lětow wot abo do Londona šmórnyć. Zdobom pak dyrbjachu druhe lěta­dła, kotrež běchu po puću do Heathrowa, w Frankfurće nad Mohanom přizemić. Kak so pasažěrojo z Němskeje dale do Londona dóstanu, ma lětanska towaršnosć rozrisać. Pod smužku so tuž ličba lětow w Frankfurće dźensa lědma změni.

Lětanišćo w Londonje Heathrow drje budźe z wěstotnych přičin dźensa hač do połnocy zawrjene. Tam je milina wu­padnyła. Přičina toho je woheń w pře­pinarni, kotrež lětanišćo zastaruje. Cyłkownje 1 300 lětow je z toho potrje­chenych, zdźěli britiska powěsćernja.

Drježdźany (dpa/SN). Sakski krajny sejm je wčera na swojim wosebitym pose­dźenju wo financnym pakeće CDU/CSU, SPD a Zelenych w Zwjazku diskutował. Próstwu AfD, paketej znapřećiwić, su zapósłancy z jasnej wjetšinu wotpokazali. Z tym njeje sakski ministerski prezident Michael Kretschmer (CDU) nuzowany to dźensa na posedźenju Zwjazkoweje rady wotpokazać. Kretschmer na wčerawšej debaće krajneho sejma za paket wabješe, kotryž bě zwjazkowy sejm minjenu wutoru wobzamknył. „Dyrbimy do našeje wěstoty inwestować“, wón hladajo na napjate politiske połoženje po cyłym swěće wuzběhny. Předsyda frakcije SPD w sakskim sejmje Henning Homann ofensiwnje za inwesticije pleděrowaše.

Berlin/Podstupim (dpa/SN). Financnemu paketej je dźensa Zwjazkowa rada přihłosowała. Za přesadźenje paketa běštej dwě třećinje hłosow trěbnej, to je 46 wot 69 hłosow. Krajne knježerstwa, na kotrychž su CDU, SPD a Zeleni wobdźěleni, cyłkownje 41 hłosow docpěchu. Nimo toho je knježerstwo w Bayerskej, kotrež měješe šěsć hłosow k dispoziciji, připowědźiło, zo wudawkam přihłosuje. Z tym bě wjetšina hłosow zaručena. „W histo­riskich časach su historiske naprawy trěbne“, bayerski ministerski prezident Markus Söder (CSU) wudawki zakituje.

Braniborska chcyše so dźensa na ­posedźenju Zwjazkoweje rady hladajo na ­financny paket za zakitowanje a infrastrukturu hłosa wzdać. To bě po in­formacijach němskeje powěsćernje dpa wuslědk rozmołwow braniborskeho ­mi­nisterskeho prezidenta Dietmara ­Woidkeho (SPD) a jeho zastupjerja a financneho ministra Roberta Crum­bacha (BSW).