To a tamne (01.04.25)
Chłostanskemu jednanju překročenja dowoleneje spěšnosće dla móže so sakski kultusowy minister Conrad Clemens (CDU) tola hišće wuwinyć. Běłowodźanske hamtske sudnistwo namjetuje jemu dojednanje: Clemens zapłaći pokutu 10 000 eurow. Nimo toho dyrbi wón wobchadny seminar wopytać a 20 hodźin wobchadneje wučby w šulach podawać. Clemens ma tydźeń chwile, so rozsudźić, hač poskitk přiwozmje.
Dwulětny hólc je njezbožo sněhoweho mobila na priwatnym swjedźenju w hornjobayerskim Bischofswiesenje zawinował. 37lětna šoferka bě dźěćo k sebi wzała, jako motor motorowych sanjow hižo běžeše. Hólc zwjertny płunowu ručicu, tak zo mobil z wulkej spěšnosću wotjědźe. Mobil zrazy z wotmachom do zawrjenych wrotow garaže. Pjeć dźěći, šoferka a dalši sobujěducy so zranichu.
Pismo přećiwo wójnje
Rom (B/SN). Italska nowina Corrirere della Sera je pismo swjateho wótca přećiwo wójnam wozjewiła. W nim wón namołwja: „Dyrbimy naše rěče, myslenje, cyły swět wotbrónić. Trjebamy přemyslowanje, nutřkowny měr a zmysł za kompleksnosć, diplomatiju a wozrodźenje mjezynarodnych organizacijow.“ Wšitkich, kotřiž w komunikaciji skutkuja, namołwi wón na skutkownosć słowow dźiwać.
Historiski wopyt přestorčeny
London (B/SN). Składnostnje swjateho lěta za 8. apryla planowany wopyt jendźelskeho krala Charlesa III. a jeho mandźelskeje Camille pola bamža bu chorosće dla krótkodobnje přestorčeny. Buckingham Palace w medijowej zdźělence wuske zwiski mjez katolskej a anglikanskej cyrkwju wuzběhny, kotrejež swětny předstejićel Charles III. je.
Wužiwanje nabožnych twarow
Sudnistwo: Le Pen wina
Paris (dpa/SN). W procesu přećiwo francoskej prawicarskej populistiskej politikarce Marine Le Pen překřiwjenja spěchowanskich srědkow EU dla je sudnistwo rozsudźiło, zo je Le Pen wina. Měru chłostanja chcychu w běhu dnja wozjewić. Statne rěčnistwo žada sej za 56lětnu pjeć lět jastwa a pjenježnu pokutu. Nimo toho chcedźa jej zakazać, k wólbam nastupić. Le Pen chce k prezidentskim wólbam 2027 nastupić. Wona wšitke wumjetowanja wotpokazuje.
Kijew wumjetuje Putinej
Kijew (dpa/SN). Hladajo na dale trajace ruske napady na ukrainske města a na frontu ukrainski prezident Wolodymyr Zelenskyj ruskemu prezidentej Wladimirej Putinej wumjetuje, zo nima žadyn zajim na měrliwym skónčenju konflikta mjez krajomaj. Surowosć ruskich nadpadow pokazuje, kak mało Putina diplomatija zajimuje, rjekny Zelenskyj w swojim widejowym poselstwje.
Steinmeier wopyta Armenisku
Indonescy muslimojo so na přibrjohu Parangkusumo w Bantulu zhromadnje ...
1 700 mortwych zemjerženja dla
Bangkok (dpa/SN). W Bangkoku buchu dźensa rano znowa wjacore wysokodomy ewakuowane, po tym zo bě zemja znowa ržała. Tři dny po ćežkim zemjerženju sylnosće 7,7 ze srjedźišćom w Myanmaru njeje tuž hišće měr zaćahnył. Knježerstwo zdźěli, zo njejsu fachowcy žane střasenja registrowali. Najebać to je mjez wobydlerjemi masowa panika wudyriła. Zamołwići ludźi namołwjeja, dale skedźbliwi wostać a při dalšich střasenjach hnydom twarjenja wopušćić.
W Myanmaru rěča mjeztym wo 1 700 smjertnych woporach zemjerženja. Wjace hac 3 400 ludźi bu zranjenych, wojerske knježerstwo zdźěla. Zemjerženje je tež w susodnych krajach Thailandskej, Kambodźi a Chinje škody zawostajiło.
Hišće raz kandidować?
Rozsudne koło za koaliciju zahajene
Berlin (dpa/SN). CDU, CSU a SPD zahaja dźensa rozsudne koło koaliciskich jednanjow. Předsyda CDU Friedrich Merz zhladuje z wulkim optimizmom na přichodne dny, rjekny wón do zetkanja hłowneje jednanskeje skupiny w centrali SPD w Berlinje. Při tym dźe pak tež wo „někotre wulke zadźěwki“, kotrež chcedźa zhromadnje wotstronić. Hladajo na nowe koaliciske zrěčenje Merz rjekny: „Trjebamy w zasadnych prašenjach němskeje politiki nowy započatk.“ Konkretnje mjenowaše wón wobmjezowanje njeregularneje migracije, sylnjenje hospodarstwa hladajo na mjezynarodne wužadanja a financne planowanje zwjazkoweho etata. „Budźemy wobšěrnje lutować dyrbjeć.“
Předsyda SPD Lars Klingbeil rjekny: „Wšelake dobre žadanja njejsu hišće žane koaliciske zrěčenje. Wažne z wida SPD je modernizowanje kraja a stabilne hospodarstwo a derjeměće tych, kotřiž so napinaja.“ Podobnje rjekny to předsyda CSU Markus Söder. „Dyrbimy zasadne wěcy změnić. To je naš nadawk. To ludźo wot nas prosće wočakuja.“
Trump hrozy Zelenskemu
Prezident USA planuje dalši telefonat z ruskim prezidentom Putinom
Washington (dpa/SN). Prezident USA Donald Trump je ukrainskemu prezidentej Wolodymyrej Zelenskemu z konsekwencami hrozył, jeli so zrěčenju wo wužiwanju ukrainskich surowiznow spjećuje. Trump ma zaćišć, zo chcył Zelenskyj pječa hižo dojednane zrěčenje wupowědźić a nowe žadanja stajeć, rjekny wón žurnalistam w swojim prezidentskim lětadle. „Jeli wón tole čini, dóstanje wón problemy – jara, jara wulke problemy.“ Nimo Zelenskeho je tež ruski prezident Wladimir Putin hněw Trumpa zbudźił, tola z druhich přičin.
