Wo změnje wustawy rozsudźić měli
Berlin (dpa/SN). Zwjazkowy sejm je so dźensa zešoł, a to w swojej zestawje z časa do wólbow noweho zwjazkoweho sejma 23. februara, zo by wo planowanej změnje wustawy rozsudźił. Z njej ma so mjeza zadołženja zběhnyć a nowemu knježerstwu hoberske zadołženje we wysokosći jednoho biliona eurow za zakitowanje a infrastrukturu zmóžnić. Na spočatku posedźenja zapósłancy próstwje AfD a FDP wotpokazachu, debatu wotprajić.
Předsyda frakcije CDU/CSU Friedrich Merz (CDU) planowany program zadołženja zakitowaše. Wón argumentowaše z wójnu Ruskeje přećiwo Ukrainje. Tute „wurjadne wobstejnosće“ po jeho měnjenju zadołženje kraja zmóžnja.
Předsyda frakcije SPD Lars Klingbeil wočakuje přez nowe kredity nowy rozmach za Němsku a cyłu Europu. „Inwestujemy do sylnosće swojeho kraja“, wón rjekny. Předsyda AfD Tino Chrupalla apelowaše na swědomje zapósłancow a plany w mjenje swojeje frakcije wotpokaza. Wuslědki debaty hač do kónca redakciskeho časa njepředležachu.
Rozrost minjenych lět nimo
Sakska dyrbi dźěłowe městna w zarjadnistwje kraja redukować
Drježdźany (dpa/SN). Sakska so hladajo na wobćežne pjenježne połoženje na to hotuje, zo dyrbi přichodne lěta personal wottwarić. Kelko z tuchwilu 96 000 přistajenych na kóncu w zarjadnistwje swobodneho stata zwostanje, njemóže financny minister Christian Piwarz (CDU) hišće rjec. „Dyrbimy pak tutón puć kročić. To zwisuje tež z demografiskim wuwićom a z połoženjom dźěłowych a fachowych mocow. Nic naposledk mamy jako zjawny posłužbnik z přikładom być“, rjekny Piwarz powěsćerni dpa.
Poprawom bě Sakska ličbu přistajenych hač do lěta 2020 na 70 000 městnow znižić chcyła. Město toho pak maja nětko wjace sobudźěłaćerjow. Tole kritizuje wosebje krajny zličbowanski zarjad.
Kelko městnow konkretnje wotstronja, Piwarz postajić nochce. Jako přikład mjenuje wón diskusiju wokoło wučerjow, kotrychž ličba stajnje zaso chabła. Wottwar personala njeda so z krutymi ličbami wjazać.
Móža jemu wodać?
Słónco připowědźa nam nalěćo
Fasada na dróhu padnyła
To a tamne (18.03.25)
Njemdry muž je w Magdeburgu tomu zadźěwał, zo jeho awto wotwjezu. Sobudźěłaćerjo zarjada za porjad chcychu wóz wotwjezć dać. Pasy krana běchu hižo přiwjazane, jako so muž do awta sydny. Wón storkaše awto tak dołho doprědka a dozady, doniž so pasy njepušćichu. Potom wón přez chódnik twochny.
Mjenje drjewa su paduši naposledk w Braniborskej pokradnyli. Loni su 257 padow registrowali, 2023 bě jich hišće 328 padow. Policija z toho wuchadźa, zo płaćizna drjewa kriminelnu energiju paduchow wobwliwuje. Mjeztym wobsedźerjo lěsow drjewo z nastrojemi GPS škitaja.
Čas nutřkowneho wobnowjenja
Vatikan (B/SN). Póstny čas křesćanow a ramadan muslimow stej so lětsa nimale w samsnym času započałoj. Tuž je namołwu k mjezynarodnemu dialogej zašły tydźeń indiski kardinal George Jacob Koovakad we Vatikanje podpisał. Póstny čas je za wobě nabožinje čas modlitwy a lubosće k blišemu. „Wonej skićitej wosebitu składnosć nutřkowneho wobnowjenja a zesylnjenja solidarity z potrěbnymi.“
Liturgiska fijałkowa barba
Bonn(B/SN). Fijałkowa barba dominuje w adwentnym a póstnym času, ale tež na žarowanskich Božich mšach w cyrkwi. Wona symbolizuje pokutu, wopor, přihot, měr, wobnowjenje a přemyslowanje. Fijałkowu drastu noša na Božej mši wšitcy, kiž k wołtarjej słuža. Bamž je běłu drastu, kardinalojo čerwjenu a biskopja fijałkowu abo čerwjeno-fijałkowu woblečeni.
Pastyrski list w posće
Zapaler žony zajaty
Gera (dpa/SN). Po nadpadźe z bencinom na žonu w tramwajce w Gerje su pozdatneho skućićela zajeli. Muž je so dźensa rano pola policije přizjewił. 46lětny je mandźelski zranjeneje žony. Wón bě žonu wčera w nadróžnej z bencinom pokidał, zapalił a ćeknył. Sobujěducy nadróžnu z nuzowym kneflom zadźeržachu. Šofer płomjenja z hašakom podusy. Žona so najebać to ćežko zrani. Muž kaž tež mandźelska pochadźataj z Georgiskeje.
EU chce Ukrainje dale pomhać
Brüssel (dpa/SN). Wonkowni ministrojo čłonskich krajow EU wuradźowachu dźensa wo dalšej wojerskej pomocy na dobro Ukrainy. Społnomócnjena EU za wonkowne naležnosće Kaja Kallas je po informacijach powěsćernje dpa namjetowała, wot Ruskeje nadpadnjenemu krajej lětsa pomoc 20 do 40 miliardow eurow přewostajić. Čłonske kraje EU měli wotpowědnje swojej hospodarskej mocy k tomu přinošować. Płaćić měli pak wšitke kraje na dobrowólnym zakładźe.
Demokraća we hłubokim dole
