To a tamne (09.11.22)
W Indiskej je wosomlětny hólc po medijowej rozprawje jědojtu kobru kusnył, kotraž je na to zemrěła. Had bě so wokoło jeho ruki zwił a kusnył, na čož měješe hólčec wulke bolosće. Jako njeje so had hibał, je wón dwójce kruće do njeho kusnył, kaž rozprawja. Swójba hólca je jeho po podawku do chorownje dowjezła, hdźež dósta napřećiwny jěd. Wón so spěšnje zhraba, dokelž jednaše so na zbožo wo suchi kus, pola kotrehož had žadyn jěd njerozpušći. Tajke kusnjenja su drje bolostne, symptomy pak su potom lokalne.
Z pomocu nalěpkow poskićeja dealerojo w Amsterdamje mjeztym swoju tworu. Zajimcy trjebaja jenož QR-code zaskenować a hižo maja „menijowu kartu“ ze syntetiskimi drogami, ale tež z kokainom a konopju na swojim šmóratku. Předewšěm kołowokoło barow, klubow a kofejownjow su nalěpki připrawjene.
To a tamne (08.11.22)
Transporter z wodźerjom je so w Karlsruhe do rěčki sunył, na čož bě muž w nocy na póndźelu wjace hač pjeć hodźin w jězdźidle zajaty, wohnjowa wobora a policija zdźělištej. Muž bě transporter wječor na parkowanišću wotstajił a zabył, ručne borzdźidło přićahnyć. W nakładowarni spicy wón wosrjedź nocy pytny, kak so transporter do rěčki suwaše.
Stupaca mórska hładźina, suchota a horcota změja tež za město Hamburg sćěhi. Tamniša měšćanska železnica je tuž składnostnje swětoweje klimoweje konferency zastanišća nachwilnje přemjenowała. A tak přistupja ludźo na přikład w Seychellingenje město Stellingenje abo w Kuala Schlumpurje město Schlumpje.
To a tamne (07.11.22)
W Japanskej bu policist dla delikta přećiwo druhemu zastojnikej zajaty. Kaž japanske medije dźensa wozjewichu, je wobchadny policist za čas słužby priwatne awto kolegi pokradnył a wikowarjej předał. Wěstotna kamera bě to připadnje natočiła, tak zo móžachu pad rozrisać.
Pjany muž je w sewjerohessenskim Eschwege starušku w jeje bydlenju chětro nastróžił. Tak njebě 34lětny na dompuću zawčerawšim rano swójski dom spóznał. Dokelž swój kluč njenamaka, rozbi wón škleńcu durjow bydlenja, hdźež 78lětna žona sama bydli. Tuta poćerpi šok a sej přiwšěm zwaži zadobywarja narěčeć, jako chcyše so pola njeje lehnyć. Muž ma nětko z chłostanskim jednanjom kaženja domjaceho měra dla ličić.
To a tamne (04.11.22)
Tójšto piwowych kašćikow je w bayerskim Kulmbachu z nakładneho awta na dróhu padnyło. Cyłkownje 150 kašćikow je zawčerawšim při zajězdźe na zwjazkowu dróhu planu připowěšaka wobškodźiło, policija w nocy zdźěli. Kašćiki njeběchu dosć zawěsćene. Tohorunja je 55lětny šofer najskerje přespěšnje jěł. Piwo so žane njezhubi – bleše běchu prózdne.
Britiska nowina „Daily Star“ je wubědźowanje mjez premierministerku Liz Truss a solotwju přewjedła a na to sadźiła, štó dlěje přetraje. Truss je před něhdźe tydźenjomaj wotstupiła, a tuž je solotej wubědźowanje dobyła. Nětko změjetej wobě zhromadny symboliski wustup na tři metry wysokim wobrazu, kotrež budźe w „Bonfire Night“ w jendźelskim městačku Edenbridge zapaleny.
To a tamne (03.11.22)
Pjeć lawow je so w zwěrjencu awstralskeje metropole Sydney krótkodobnje ze swojeho hajnišća zminyło. K „nuzowej situaciji“ je wčera rano dóšło, zdźěli zwěrjenc Taronga. Dorosćeny law a štyri młodźata su z terena ćeknyli. Krótko po tym su sobudźěłaćerjo zwěrjenca rubježne zwěrjata bjezposrědnje w bliskosći našli a móžachu je bjez wulkich ćežow zaso do za nje postajeneho hajnišća wjesć.
Nowa družina mórskeho raka nosy přichodnje mjeno politikarki Lěwicy Sahry Wagenknecht. Wědomostne pomjenowanje čerwjeneho raka jako cherax wagenknecht je zwěrjeću Christian Lukhaup z Waiblingena pola Stuttgarta spožčił, kiž bě zwěrjo při přebywanju w Indoneskej prěni raz našoł. Politikarka bě jeho inspirěrowała, wón swój rozsud wopodstatni.
To a tamne (02.11.22)
Dokelž je so šoferka awta minjeny pjatk w Badensko-Württembergskej wulkeho pawka nabojała, je wona policiju zawołała. Wona trjeba nuznje pomoc a njemóže hižo dale jěć, 33lětna rozprawješe. Zastojnicy přepytowachu jeje awto, ale zwěrjo njenańdźechu. Wočiwidnje pak je to dosahało, žonu změrować, wšako móžeše po tym dale jěć.
Bywši britiski strowotniski minister Matt Hancock wobdźěli so na britiskim wudaću telewizijneho dźungloweho campa. Tohodla jeho nětko z frakcije konserwatiwneje strony wuzamknychu. Simon Hart z wjednistwa frakcije wčera wuswětli, zo je naležnosć chutna. Dokładne wopodstatnjenje wón njemjenowaše. Kritikarjo Hancockej wumjetuja, zo chce z wustupom swój image ponowić. Wón zasłuži přidatne pjenjezy, město toho zo by so wo swojich wolerjow starał.
To a tamne (01.11.22)
To a tamne (28.10.22)
To a tamne (27.10.22)
To a tamne (26.10.22)
Ataka radikalneje klimoweje skupiny „Poslednja generacija“ na „Sixtinsku madonu“ 23. awgusta w Drježdźanskej galeriji Stari mištrojo je škody we wobjimje wjac hač 10 000 eurow zawinowała. Kóšty restawracije wučinjeja 3 000 do 5 000 eurow, kaž Statne wuměłstwowe zběrki Drježdźany dźensa zdźělichu. K tomu přińdźe hišće strata 7 000 eurow, dokelž dyrbjachu muzej nachwilnje zawrěć. Młoda žona a młody muž běštaj so ze stajnje jednej ruku na ramiku wuměłskeje twórby přilěpiłoj.
Prěni raz po přewróće su so w Drježdźanskej uniwersitnej klinice srjedź awgusta štwórniki narodźili. Sham, Joud, Ahmad a Ayham wčera chorownju wopušćichu. Posledni raz witachu tam w lěće 1984 štwórniki na swět.
