To a tamne (01.08.22)
Roznjemdrjeny paduch je fasadu wobchoda, w kotrymž běchu jeho při kradnjenu lepili, z kamjenjemi wobškodźił a 2 500 eurow škody zawostajił. Muž bě we wobchodźe aprikozy w hódnoće štyrjoch eurow kradnył a hnydom zjědł. Po rozestajenju z přistajenym policija muža zaja. Jako jeho zaso pušćichu, so muž z kamjenjemi w ruce nawróći a je do wokna mjetaše. Znowa jeho policija zaja. Tónkróć tyknychu jeho do přepytowanskeje jatby.
Nócne harowanje w Berlinskim Treptowskim parku je zasadźenje policije zawinowało. Policija nańdźe wjacore skupiny 15 do 50 wosobow, po tym zo běchu so wobydlerjo hóršili. Mnozy mějachu radija sobu, běchu alkoholizowani a zastojnikam napřećo chětro agresiwni. Policija swjedźenje rozpušći. Partijow w ćopłym počasu dla su w někotrych parkach stolicy Němskeje hižo alkohol zakazali.
To a tamne (29.07.22)
Wjacore kilogramow mjasa su cłownicy na Mnichowskim lětanišću sćazali. Wulkoswójba, kotraž bě z afriskeho Toga přilećała, měješe sydom kilogramow mjasa w swojich kófrach, nimo toho howjazu kožu, kopyta a zuby, cłowny zarjad zdźěla. Mjaso bě hižo połne insektow. Cłownicy je sćazachu, zo móhli je zničić.
Dospołnje nahi je pjany pacient intensiwneje stacije w posaarskim Sulzbachu chorownju wopušćił a tak zasadźenje policije zawinił. Jako zastojnicy jeho nańdźechu, dowjezechu jeho do jastwa, dokelž předležeše wukaz zajeća. Lěkar bě zastojnikow informował, zo je so pacient zminył, byrnjež jeho alkohola dla lěkować dyrbjeli. Nahi pacient bě spěšnje namakany, dokelž bě w swojim kostimje kedźbnosć ludźi zbudźił. „W jastwje dóstanje wón nowu drastu“, policija piše. Přičina zajeća njeje znata.
To a tamne (28.07.22)
Pjenjezy na dróze leželi su předwčerawšim, wutoru, w sewjerorynsko-westfalskej gmejnje Kranenburg. Swědcy informowachu policiju, zo je dróha mjez Kranenburgom a Gochom połna pjenjez. Zastojnicy zwěsćichu, zo jedna so wo napodobnjene pjenjezy, kotrež wužiwaja w dźiwadle abo filmach: Mały nalěpk na bankowkach tole přeradźa. Wotkal pjenjezy pochadźeja, njeje znate.
Z awtom nana a bjez jězbneje dowolnosće je 17lětny w Berlinje-Spandauwje spytał, so policajskej kontroli wuwinyć. Policisća chcychu awto kontrolować, młodostny pak jědźeše dale. Na ćěkancy ignorowaše wón wjacore čerwjene ample, smaleše na chódniku a by skoro žonu přejěł. Jězba skónči so w slepej hasy. Třo sobujěducy w starobje 16 a 17 lět spytachu ćeknyć, buchu pak dosahnjeni. Šofera policija nachwilnje zaja.
To a tamne (27.07.22)
Garažu susoda z piłu rozrězał je muž w Bayerskej, dokelž je wona jemu pječa wid na Starnbergski jězor brała. 52lětny je do toho hišće spytał, awtomatisku kameru manipulować, štož pak je so nimo kuliło. Tuž je kamera njeskutk filmowała. Škoda wučinja wjacore sta eurow. Garaža bu minjene lěta wospjet wobškodźena. Tehdy nasta škoda 10 000 eurow. Nětko pruwuja, hač je muž tež za to zamołwity.
Pozdatne ćěło je policiju w Sewjerorynsko-Westfalskej zaběrało. Swědk bě zastojnikow informował, zo leži na skłoninje při dróze njedaloko Ascheberga ćěło žony bjez hłowy. Jako zastojnicy městno namakanki docpěchu, dyrbjachu zwěsćić, zo jedna so wo wulku gumijowu klanku. Čehodla je něchtó nahu klanku do kerkow ćisnył, „drje nihdy njezhonimy“, policija piše. Sobudźěłaćerjo twarskeho zawoda gmejny su klanku zrumowali.
To a tamne (26.07.22)
Pola kriminelnych sćazany Ferrari chce čěska policija zasadźić, zo by wobchadnych hrěšnikow přesćěhowała. Hač do 325 km/h spěšny wóz chcedźa přećiwo „najagresiwnišim šoferam“ na awtodróhach wužiwać, rěčnik policije zdźěli. Za to su awto wotpowědnje přetwarili. Ferrari tutoho typa płaći nimale 200 000 eurow. Wodźić smědźa jón jenož wosebje wukubłani zastojnicy.
Hnydom dwójce je so bjezdomny do domow zadobył, zo by tam jědł a spał. 33lětny bě so minjeny pjatk do jednoswójbneho domu w braniborskim Hennigsdorfje zadobył, so najědł a so do łoža wobsedźerja lehnył. Policija jeho zaja a sobotu zaso pušći. Samsny dźeń zadoby so muž do domu w Oranienburgu, hdźež so wukupa a ćekny. Policija pak móžeše jeho znowa zajeć. Tónkróć dyrbi wón dlěje w jastwje wostać, policija zdźěli.
To a tamne (25.07.22)
Runje zmandźelenaj a hižo w błóće: Pod nawodom kwasneho porika su minjenu sobotu na tradicionalnej „watowej olympiadźe“ w Brunsbüttelu nowy „polonezowy“ swětowy rekord nastajili. 206 wobdźělnikow běžeše před wjacorymi tysac přihladowarjemi w błóće watoweho morja, symbolizujo wulku wutrobu. 150 ludźi by trěbnych było.
Gumijowa ruka je na brjoze Łobja pola Torgauwa wjetše zasadźenje policije zawiniła. Pěšcy běchu pozdatny dźěl čłowječeho ćěła w trawje namakali, ruku a dźěl łochća. Na to městno zaraćichu. Nimo kriminalneje policije přichwatachu zastojnicy wodoškitneje policije, techniskeho pomocneho skutka a psyk k namakanju ćěłow. Přepytowanje wunjese, zo jedna so wo wuběrnu atrapu.
To a tamne (22.07.22)
21 lět dołho zhubjene noticne knižki britiskeho přirodospytnika Charlesa Darwina su namakane. Uniwersitna knihownja w Cambridgu bě knižki w lěće 2000 wupožčiła. Dwě lěće pozdźišo zdźělichu, zo su pokradnjene. Nětko su sobudźěłaćerjo wjacore miliony eurow hódne dokumenty w zjawnje přistupnym dźělu knihownje w darnej tiće wotpołožene namakali.
Třělbowu granatu namakało je dźěćo při hrajkanju při jězoru w braniborskim Petershagenje a je ju sobu domoj wzało. Staršimaj bě na zbožo hnydom jasne, zo jedna so wo strašnu namakanku a zawołachu policiju. Fachowcy granatu wotewzachu a w lěsu rozbuchnychu. Kak bě granata k jězorej přišła, njeje znate.
To a tamne (21.07.22)
Wjele zboža měł je sobudźěłaćer wěstotneje firmy při rumowanju zawostankow rockoweho festiwala Hurricane. 23lětny bě so po kóncu nócneje słužby w delnjosakskim Scheeßelu k spanju do stana lehnył, kiž běchu hosćo festiwala stejo wostajili. Bager stan hrabny a ćisny jón do wotpadkoweho kontejnera. Muž je akciju njezranjeny přetrał. Najebać to dyrbi wodźer bagra z chłostanjom ličić, dokelž njebě pohladał, hač je stan prózdny.
Dokelž njeměješe prěni oficěr wukubłanje na pilota hišće wotzamknjene, je so pasažěrske lětadło po puću z Londona do New Yorka zawróćić dyrbjało. Airbus A330 bě hižo 40 mjeńšin w powětře, jako w cockpiće zwěsćichu, zo njeje prěni oficěr hišće wšě předpisane treningowe lěty zmištrował. Na to lećachu wróćo. Předewzaće Virgin Altantic rěčeše wo słužbnym planowanskim zmylku.
To a tamne (20.07.22)
Z powětrom pjelnjeny papagaj je w Bayerskej pomocnikow a samo helikopter zaběrał. Wobydlerka bě na rěce Regen pola města Cham spodźiwny objekt na wodźe wuhladała. Dokelž móhło so tež wo znjezboženy gumijowy čołm jednać, wołachu wohnjowu woboru, wodowu stražu a helikopter policije. Pomocnicy namakachu gumijowu hrajku, nic pak jeje wobsedźerja.
Hnydom cyły kilogram drogi crystal měješe dealer při sebi, jako jeho policija w Kamjenicy lepi. Zastojnicy namakachu wopojny jěd w nachribjetniku 42lětneho, jako jeho kontrolowachu. Drogi běchu w plastowych tyzach a titkach schowane. Dealer transportowaše drogi z elektriskim rolerom. Sudnik je bjezposrědnje na to zajeće 42lětneho wukazał. Jeho dowjezechu do jastwa, wumjetujo jemu wikowanje z drogami we wulkim stilu.
To a tamne (19.07.22)
Pospytane wotstronjenje wosaceho hnězda je w juhopfalcskim Bellheimje zasadźenje wohnjoweje wobory zawinowało. 39lětny bě spytał, wosy pod třěchu domskeho z bunsenowym palakom wućěrić. Při tym so hnězdo zapali. Přiwołana wohnjowa wobora móžeše woheń zhašeć, prjedy hač tón třěchu wobškodźi. Zamołwići wotradźa, hnězda sami wotstronić. Lěpje je, fachowcow přiwołać.
Kedźbliwy psyk je we Winsenje pola Hannovera wjetšemu wohenjej zadźěwał, swojemu wobsedźerjej pak skóržbu wunjesł. Muž bě woheń w železnym sudobju bjez dohladowanja palić dał, policija zdźěla. Na to so pódla sudobja ležace drjewo zapali. Hakle přez šćowkanje psa so na to dohlada. Susodźa wołachu wohnjowu woboru, kotraž płomjenja podusy. Při tym zwěsćichu, zo paleše so w sudobje wobarbjene drjewo, štož njeje dowolene.
