To a tamne (06.09.23)
Namakane ćelatko pola policije wotedał je muž w sewjerorynsko-westfalskim Geilenkirchenje. Zastojnicy njemóžachu so dodźiwać, jako muž z ćelkom na zadnjej ławce wosoboweho awta na stražu přijědźe. Muž bě zwěrjo we wodowej hrjebi wuhladał a wuchował. Po tym zo běchu so zastojnicy sami wo zwěrjećej namakance přeswědčili, móžachu ju mjeztym zwěsćenemu wobsedźerjej wróćić.
Wopačneho za rubježnistwo wupytał je sej paduch w Pariskej Metro. Muž chcyše sobujěducemu złoćany rjećazk ze šije torhnyć, njewědźo, zo ma policista w ciwilnej drasće před sobu. Hnydom so wjacori zastojnicy na paducha walichu a jeho zajachu. Policisća běchu so wotpohladnje mjez sobujěducych měšeli, zo bychu přećiwo kriminaliće w podzemskej železnicy a na dwórnišćach francoskeje stolicy postupowali.
To a tamne (05.09.23)
Sćazany mobilny telefon dźesaćlětneho hólca je w Bayerskej zasadźenje policije zawinował. Starosćiwy wobydler bě zastojnikow wołał, rozprawjejo wo „chětro brutalnje“ klinčacym žałosćenju dźěsća we wjaceswójbnym domje w Landshuće, policija zdźěla. Mać bě hólcej zakazała, handy wužiwać. Najebać mjerzanje dźěše so dźěsću derje, policija piše. Hač móžachu dźesaćlětneho změrować, njeje znate.
Kmótřa mjenow za wjedrowe wyšiny a nižiny přichodneho lěta móža so jutře pola towarstwa Berlinska karta wjedra přizjewić. Wyšiny maja klětu muske a nižiny žónske mjena. Kmótřistwo za wyšinu płaći 390, za nižinu 260 eurow. Dochody ze zhromadneho projekta ze Swobodnej uniwersitu w Berlinje su na dobro studentskeho wobkedźbowanja wjedra. Tak chcedźa 115 lět trajacy klimowy projekt uniwersity dale wjesć.
To a tamne (04.09.23)
Po zwadźe na awtodróze A 38 wusadźiła je šoferka wosoboweho awta swoju přećelku. 40lětna steješe sobotu wječor w 21 hodź. pola Großkorbetha – bjez mobilneho telefona – na kromje dróhi. Nimo jěducy šoferojo wołachu policiju. Zastojnicy dowjezechu žonu na dwórnišćo. Pjenjezy za ćah wona měješe, kaž rěkaše.
Z perfektnym wotlětom wjace hač sto balonow z horcym powětrom do wječorneho njebja su sobotu wječor 30. Warsteinsku mjezynarodnu Montgolfiadu zahajili. Po přestorčenju špatneho wjedra dla wot pjatka na sobotu njesteješe masowemu startej ničo wjace na puću. Po planje móžeše so 116 balonow před wjace hač 30 000 wopytowarjemi do njebja pozběhnyć. Nawal na zarjadowanje bě „hoberske“. Nachwilnje dyrbjachu swjedźenišćo zawrěć. Festiwal ze 150 mustwami traje hišće hač do soboty.
To a tamne (01.09.23)
Na balkonje spěwaca žona je w hessenskim Hanauwje zasadźenje policije zawinowała. Starosćiwa susodka bě derje słyšomne spěwanje žony jako móžne wołanje wo pomoc interpretowała a policiju wołała. Sobudźěłaćerjo wobchoda w přizemi twarjenja móžachu zastojnikow změrować: Žona je swojeho spěwanja dla po cyłym domje derje znata. Dokelž bě wona mjeztym zaso w swojim bydlenju, policija zasadźenje skónči.
Po wjace hač 50 lětach namakali su w šwicarskich lodowcach zhubjeneho alpinista. Muža z Wulkeje Britaniskeje su mjeztym identifikowali, policija w kantonje Wallisu zdźěla. Krosnowarjej běštaj čłowjeske kosće na lodowcu Chessjen pola Saas Fee wuhladałoj. Brita njebě so w juniju 1971 wot krosnowarskeho wulěta wróćił. Woteběrace lodowcy mjeztym dale a wjace ćěłow zhubjenych wotkrywaja.
To a tamne (31.08.23)
Wopicy z města wućěrić chcedźa w indiskej stolicy New Delhiju do wjerškoweho zetkanja G20 9. a 10. septembra. Tak chcedźa zaručić, zo zwěrjata delegatow wjerška njewobćežuja. Zasadźić chcedźa plakaty z wobrazami znjepřećelenych wopicow a ludźi, kotřiž jich zwuki napodobnja. Je to pospyt a nichtó njewě, hač so wón poradźi, město zdźěla. Wopicy so w New Delhiju ludźi scyła wjace njeboja, štož wjedźe stajnje zaso ke konfliktam.
Pječa so palacy wulki powětrowy balon je w Berthelsdorfje pola Ochranowa zasadźenje wohnjoweje wobory zawinował. Wobydler bě wobkedźbował, zo je so balon na polu zapalił a zo je znjezbožił. Na to přijědźechu wohnjowe wobory wokolnych wsow a chorobne awta: Balon njebě znjezbožił, ale normalnje přizemił. Pilot bě krótko do toho hišće raz palak wužiwał, štož wupadaše kaž woheń.
To a tamne (30.08.23)
Wopity na policajsku stražu přijěł je 41lětny muž w sewjerorynsko-westfalskim Mindenje, zo by swoju přećelku wotewzał. Tu běchu zastojnicy sobu na stražu wzali, po tym zo běchu ju alkoholizowanu za wodźidłom awta lepili. Policistam wona powědaše, zo chcyła z taksijom domoj jěć. Jako přijědźe normalne awto město taksija k straži, zastojnicy šofera kontrolowachu. Za puć domoj napitemu porikej poručichu, sej taksu skazać.
Randalěrowace dźiwje swinjo přesćěhowali su policisća wčera wječor w Heidelbergskim měšćanskim dźělu Neuenheim. Tam bě zwěrjo zahrodu zapusćiło a je potom po łukach podłu Neckara běhało. Skónčnje swinjo přez Neckar płuwajo měšćanski dźěl Bergheim docpě a spěchaše dale do směra na hłowne dwórnišćo. Zastojnicy mějachu swoju lubu nuzu, zwěrjeću slědować.
To a tamne (29.08.23)
Njehańbite padustwo je w Šwicarskej wulke mjerzanje zbudźiło. Njeznaći krosnowarjo su po informacijach towarstwa krosnowarjow na 2 350 metrow wysokej horje jałmožnicu wurubili. Tyza słušeše towarstwu krosnowarjow, kotrež wobćežny hórski puć na tutym městnje na swójske kóšty wudźeržuje a w porjadku dźerži. W kasy bě pječa něšto stow eurow. Paduši su wočiwidnje profesionalnu techniku za rubježnistwo wužiwali.
Přetwarjeny bojowy tank typa Leopard je wohnjowym wobornikam w Grjekskej w boju přećiwo hoberskim lěsnym wohenjam dobry pomocnik. Specialne jězdźidło, kiž su tele dny ze srjedźneje Grjekskeje na sewjerowuchod kraja dowjezli, ma 15 000 litrow wody při sebi. Nimo toho ma wulku bagrowu łžicu, zo by so přez hórsku krajinu předrěł, a wuchowansku komoru za dźesać ludźi.
To a tamne (28.08.23)
Pytanje za potworu Nessie w Šotiskej je nowe pokiwy wunjesło. Wjacori dobrowólni su njewšědne zjawy wobkedźbowali, zamołwići zdźěleja. Rozprawy chcedźa nětko přepruwować. Wčera běchu najwjetše pytanje za swětosławnym monstrom w jězoru Loch Ness zahajili. Při tym su awtomatiske kamery kaž tež wosebity mikrofon pod wodu zasadźili. Z nim su „spodźiwne zwuki“ nahrawali. Naposledk běchu Nessie 1972 pytali.
Spicy z jěduceho bydlenskeho mobila padnył je muž minjenu nóc w Porynsko-Pfalcy. 40lětny je so při tym chětro wobodrěł, policija zdźěli. Muž bě so wopity do łoža we wozu lehnył. Při tym kuli so na durje, kotrež njeběchu začinjene. Muž padny na jězdnju, hdźež jeho swědcy namakachu. Z mobilnym telefonom zazwonichu druhich w awće. Tam njeběchu ani hišće pytnyli, zo 40lětny pobrachuje.
To a tamne (25.08.23)
Na kolesu z Mnichowa do Venediga po puć był je telewizijny moderator Reinhold Beckmann w swojim lětušim dowolu. „Jědnaće dnjow, kotrež njeběchu stajnje přijomne, dokelž bě čara chětro horata“, rjekny 67lětny nowinarjam. Jězba přez Brenner bě jemu wosebite dožiwjenje a jězba z hory dele do Italskeje najrjeńša mzda – „do słónca a k lěpšej jědźi“. Z awtami njeje wjele mjerzanja měł: „Maja tež druhe puće do Venediga, na přikład dróhi starych Romjanow.“
Po inwaziji lětacych mrowjow su na francoskim atlantiskim pobrjoze wjacore kupanske brjohi zawrěli. Potrjechene běchu wotrězki Saint-Hilaire-de-Riez a Saint-Gilles-Croix. Mnozy běchu překasancow dla hižo do hotelow ćeknyli. Prawdźepodobnje běchu horcota a wichory minjenych dnjow njewšědnu koncentraciju mrowjow zawinowali.
Jutřiše wubědźowanje wo najrjeńši wohnjostroj w Drježdźanach je Zwjazk za wobswět a přirodoškit Němskeje kritizował. Zwjazk namołwja, při wšěm wjeselu pyrotechniki dla tež na zwěrjata myslić, kotrež praskotanja dla wosebje ćerpja. Ptački so stróža a zwjetša panisce ćěkaja.
To a tamne (24.08.23)
Něhdźe 20 młodych njetopyrjow je so do bydlenja žony w badensko-württembergskim Oppenauwje zabłudźiło. Starša žona je w nocy na srjedu zastojnikow wołała, dokelž njemóžeše zwěrjata sama z bydlenja wuhnać. Njeprošeni hosćo pak běchu jenož njetopyrje. Prawdźepodobnje bě seniorka wokno wočinjene měła, štož zwěrjata přiwabi. Někotre chowachu so za zawěškami stwy. Skónčnje je policisća wuswobodźichu.
Paducha cholowow su w Bielefeldźe při kradnjenju lepili. Njeznaty pakostnik bě so módro-pinkbarbne cholowy ze sušaka drasty hižo woblekł, jako jeho wobydler wuhlada. Při ćěkancy z wjaceswójbneho domu je so paduch wočiwidnje zranił. Nimo toho je stare cholowy ležo wostajił a tak policiji dosć DNA přewostajił. Zastojnicy pytaja za swědkami, kotřiž su muža w napadnych cholowach wobkedźbowali.
