To a tamne (03.05.23)
„Dźeń rybičkaceje całty“ woswjeća přichodny kónc tydźenja – mjeztym 13. króć – na sewjeru Němskeje. Podłu Baltiskeho morja planuja wustupy shanty-chórow, kolesowarske jězby, originalnu hudźbu, dźěćace programy a akcije nadróžnych wuměłcow. Tež w Hamburgu chcedźa pomórskej kulinariskej chłóšćence česć wopokazać. Prěni króć přihotuja zarjadowanja na Dnju rybičkoweje całty tež nad Sewjernym morjom.
Chrobłe worakawstwo je sej student wuměłstwa w Južnej Koreji dowolił: Wón hrabny sej z instalacije italskeho wuměłca Maurizija Cattelana w stolicy Seoulu bananu, zo by ju nablaku zjědł. Na wideju je widźeć, kak młody muž přilěpjenu bananu wottorhnje, ju woběli a zjě. Po tym běliznu zaso přilěpi. Spočatnje student rjekny, zo bě prosće hłódny, dokelž njebě snědał, pozdźišo rěčeše wo „akciji“.
To a tamne (02.05.23)
Bjez wuspěcha wostało je pytanje za pozdatnym pokładom w hódnoće wjacorych milinow eurow, kotryž běchu němscy wojacy pječa kónc Druheje swětoweje wójny w Nižozemskej zaryli. Zjednoćenstwo stawiznarjow je wčera w Ommerenje w prowincy Gelderland posledni króć pod zemju za kistami pytało, bjez toho zo bychu něšto namakali. Němscy wojacy běchu 1944 kisty połne złota a debjenkow zaryli, po tym zo běchu bomby banku w nižozemskim Arnheimje trjechili.
Hłódny třilětny hólc je so we Wienje samlutki do podzemskeje železnicy sydnył, zo by k znatemu fastfood-hosćencej dojěł. Pachoł bě so z hrajkanišća zminył, jako mać wokomik njekedźbowaše. Sobujěducemu hólc bjez staršeju w železnicy napadny. Wón přepoda jeho policiji. Mać bě so mjeztym hižo pola zastojnikow přizjewiła a móžeše syna zaso wobjimać.
To a tamne (28.04.23)
To a tamne (27.04.23)
Nowa wosa nosy wot dźensnišeho mjeno ministerskeho prezidenta Badensko-Württembergskeje Winfrieda Kretschmanna (Zeleni). W Stuttgartskim přirodowědnym muzeju su nowu družinu wosy „Aphanogmus kretschmanni“ w přitomnosći knježerstwoweho šefa předstajili. Muzej hódnoći po tutym puću tež prócowanja Kretschmanna wo zachowanje mnohotnosće překasancow. Nowu wosu běchu w Tübingenje našli a w Stuttgarće přeslědźili.
Dźiwnu namakanku je policija w Šotiskej wuhladała. Při kontroli awta namakachu zastojnicy jehnjo – a wulke mnóstwa drogow. Zwěrjo přepodachu ratarjej. Dotal njewědźa, čehodla je w awće sobu jěło. Při kontroli awta reagowaše na drogi trenowany psyk. Na to namakachu tam kokain a heroin w hódnoće 11 300 eurow. Policija je třoch dealerow zajała.
To a tamne (26.04.23)
„Zakaz čakanja“ na wšelakich městnach sewjeroitalskeho kupanišća Portofino zbudźa diskusije. Wjesnjanosta bě we wsy, kotraž přićahuje kóžde lěto syły turistow, „čerwjene pasma“ postajił. Tam njeje dowolene, stejo wostać. Potrjechene su městna, z kotrychž maš wosebje krasny wuhlad na zaliw. Wukaz měri so přećiwo turistam, kotřiž přijědu z wulkimi łódźemi. Woni wuliwaja so do městačka, zatykaja hasy a zawostajeja swoje wotpadki.
Awstriski listonoš je w Salzburgskim kraju něhdźe 4 000 listow składował, město toho, zo by je rozdźělił. Listy ležachu w jeho awće, doma abo w kamorje předrasćernje w póstowym centrumje Seekirchen, awstriscy nowinarjo rozprawjeja. Póst je muža mjeztym pušćił, rěčnik zdźěli. Wón bě dlěje hač dźesać lět słužbu wukonjał. Čehodla je swoje dźěło nětko zanjechał, chcedźa pruwować.
To a tamne (25.04.23)
Wjacore zasadźenja w zwisku ze zwěrjatami su kónc tydźenja policiju zaběrali. Sobotu rano bě kruwa z rězarnje w Zemicach-Tumicach ćeknyła. Zwěrjo běhaše po kolijach a haćeše železniski wobchad. Tohorunja sobotu reagowaše alarmowa připrawa w Ćichońcy. Pozdatny paduch pak bě jenož wowca, kotraž bě so přez płót předrěła. Njedźelu čampaše kača swójba po dróze w Žitawje. Policisća kačku z młodźatami k hatej přewodźachu.
Raketu z časa Druheje swětoweje wójny su dźěći při zběranju wotpadkow w lěsu w braniborskim Oranienburgu namakali. Fachowcy policije su eksploziwnu namakanku mjeztym zrumowali. Dźěći běchu při nalětnim rjedźenju w lěsu ležacy předmjet wuhladali a na kromu dróhi donjesli. Jednaše so wo amerisku raketu M-8. Policija před tym warnuje, so namakaneje municije dótkać.
To a tamne (24.04.23)
Hrajkace zwěrjo je minjeny kónc tydźenja w Lübeckskim zaliwje tójšto kedźbnosće zbudźiło. Pječa bě to delfin. Jara aktiwne zwěrjo skakaše sobotu a njedźelu stajnje zaso z wody a so na to zaso w Baltiskim morju zminy, wodoškitna policija zdźěli. Samo nowiny wo wopyće delfina rozprawjachu. Naposledk běchu 2018 delfiny w Lübeckskim zaliwje wobkedźbowali. Wosebite škitne naprawy na dobro delfina policija njeplanuje: „Zwěrjo płuwa tak a tak, dokal runje chce.“
Snadnje zdrasćeny muž z wulkim hadom wokoło šije je wčera w porynsko-pfalcskim Bitburgu zasadźenje policije zawinował. Swědcy běchu zastojnikow informowali, po tym zo běchu pěška z hadom wuhladali. Policisća móžachu ludźi změrować: Muž chcyše swojemu domjacemu hadej čerstwy powětr popřeć: běło-žołty pyton je njestrašny a legalny.
To a tamne (21.04.23)
Při kramosćenju w „kisće darjenych wěcow“ je muž w Kielu tójšto pjenjez namakał. Policija rěči wo wysokej třicyfrowej sumje, kotruž bě 22lětny namakar wotedał. Nětko pytaja zastojnicy za wobsedźerjom pjenjez a jendźelskorěčneje knihi, kotraž jedna w 19. lětstotku.
Z cyłym kófrom kradnjeneje drasty je policija w kupnicy na Berlinskim Hermannowym naměsće paducha lepiła, kiž bě tež hišće pjany. 43lětny bě drastu minjenu nóc w kupnicy w měšćanskim dźělu Kreuzberg nahromadźił a do kófra stykał. Dokelž pak bě při tym alarm zawinował, ze swojej rubiznu daloko njepřińdźe. Wěstotna słužba kupnicy wołaše policiju, kotraž paducha na to zaja.
To a tamne (20.04.23)
Při hrajkanju čłowjesku kósć namakał je pjećlětny hólc w sewjerorynsko-westfalskim Beelenje. Zamołwići z toho wuchadźeja, zo pochadźa něhdźe 30 centimetrow wulka kósć z bliskeho pohrjebnišća a zo je mylnje na deponiju wotpadkow přišła. Tam bě pjećlětny kósć wuhladał a hordźe sobu do pěstowarnje přinjesł. Pěstowarkam hakle pozdźišo do mysli přińdźe, zo njeje to snadź kósć zwěrjeća, ale snano tola čłowjeka. Kósć chcedźa nětko znowa na kěrchowje pochować.
Po awtodróze spěchacy kóń je w Italskej njeměr zbudźił. Na měšćanskej awtodróze južnoitalskeho Neapela kóń w rańšim powołanskim wobchadźe mjez awtami błudźeše, po tym zo bě z konjenca ćeknył. Šoferojo zwěrjo z mobilnym telefonom filmowachu a tole w socialnych medijach rozšěrjowachu. Skónčnje móžeše policija konja z dróhi wjesć a popadnyć.
To a tamne (19.04.23)
Chětro sylnje wonjacy durian – z Aziskeje pochadźacy płód – je w Mnichowje zasadźenje wohnjoweje wobory zawinował. Pomocnikow běchu wołali, dokelž w běrowowym a nakupowanskim kompleksu za płunom wonješe. Před płunom warnowace nastroje njereagowachu. Najebać to pomocnicy dom přeslědźichu a skónčnje sylnje wonjacy płód namakachu. Tón drje bě alarm zawinował.
Pozdatna ručna granata je na Hannoverskim hłownym dwórnišću chaos zawinowała. Sobujěduca bě policiju informowała, zo je žona granatu mjez sedłami połožiła a ćah wopušćiła. Policija je na to nastupnišća ewakuowała a dźěl hłowneho dwórnišća zaraćiła. Fachowcy za znješkódnjenje municije „granatu“ skónčnje namakachu: Jednaše so wo bateriju za nabiwanje elektriskich nastrojow, tak mjenowanu powerbank.
