To a tamne (12.09.22)
W spominanju na posledni wustup britiskeje Queen na polu komedije je něchtó w Šotiskej město kwětkow marmeladowy sandwich před palast w Edinburghu połožił. Do plastoweje tity zapakowany chlěb ležeše hromadźe z plyšowym mjedwjedźom před wrotami kralowskeho hrodu. Queen bě so za widejowy klip k swojemu 70lětnemu trónowemu jubilejej lětsa ze znatym barom Paddingtonom na čaj zetkała. K tomu sydachu marmeladowe pomazki.
Dokelž jeho žona njeje přestała rěčeć, je muž w Nußdorfje w bayerskim Chiemgauwje policiju zawołał. Mjeztym zo po informacijach policije „słyšomnje zatrašeny“ muž ze zastojnikami při telefonje rěčeše, ćekny wón z domu na zahrodu. Po słowach policije bě žona po ludowym swjedźenju „wočiwidnje sylnje alkoholizowana“.
To a tamne (09.09.22)
Zakaz nošenja kupanskich črijow w swojej šuli wupraja srjedźna šula Elsa-Triolet šulerjam we francoskim Saint-Denisu. Jako přičinu mjenowaše wučer šule falowacy škit při přewjedźenju chemiskich pospytow. Hačkuli wobsteji na francoskich šulach jenož zakaz nošenja drasty z nabožnymi symbolemi, žada so wot šulerjow korektna drasta. Na naprašowanje so to šulerjam njespodoba.
Wulku plantažu cannabisa z wjace hač 1 000 rostlinami su slědźerjo policije w Grjekskej nadešli a štyrjoch podhladnych zajeli. Wot 3. septembra sem su rostliny poněčim we wotležanej kónčinje na kupje Evia namakali, kaž policija štwórtk zdźěli. Bychu-li so předźěłane rostliny na drogowych wikach zwičnili, bychu skućićeljo něhdźe 2,5 milionow eurow zasłužili. Grjekska a Albaniska matej najwjetšu cannabisowu produkciju.
To a tamne (08.09.22)
Bruna mjedwjedźica bu w sewjeru Italskeje popadnjena a je krótko po tym zemrěła. Sobudźěłaćerjo zarjada gmejny Ledro, njedaloko Gardaskeho jězora, chcychu sćelak wuměnić, kotryž barica nošeše. Prěnje dopóznaća pokazachu, zo zemrě něhdźe štyrilětne zwěrjo w paslach, hdźež bě strašnu poziciju zabrała. Skoćo bě napřećo čłowjekej dowěrliwa, čehoždla ju fachowcy dokładnišo wobkedźbowachu. Stajnje zaso spytachu ju wottrašić.
Na juhu Argentinskeje su wědomostnicy zbytki dotal njeznateje družiny dinosawrijow našli. Elemgasem nubilus słušeše do skupiny Abelisauridae a bě před něhdźe 90 milionami lětami žiwy, Narodna rada za wědomostne a technologiske slědźenje (Conicet) nětko zdźěli. Mjasožračk měješe dwě noze, bě něhdźe štyri metry dołhi a nimale dwaj metraj wysoki.
To a tamne (07.09.22)
Studenća Berlinskeje swobodneje uniwersity wot dźensnišeho zaso wjedrowych kmótrow za wyšiny a nižiny pytaja. Tak su zaso mjena muži a žonow prašane. Přewzaće kmótřistwa za wyšinu płaći 390 eurow, za nižinu jenož 260 eurow. Z pjenjezami podpěruje uniwersita praktiske dalekubłanje studentow. Nimo toho hodźi so 110lětny klimowy rjad Swobodneje uniwersity Berlin dale wjesć, za kotryž wobšěrne daty wo wjedrje hromadźa.
Wowčer ze sewjera Delnjeje Sakskeje njesmě swoje wowcy z brónju před wjelčimi nadpadami škitać. Lüneburgske zarjadniske sudnistwo je wčera skóržbu wowčerja přećiwo městu Winsen wotpokazało. Wowčer Wendelin Schmücker žadaše sej wot města dowolnosć, brónju wobsedźeć a wužiwać směć, štož město wotpokaza. Wowčer chcyše z tutej so bližace wjelki wottrašić a k nuzy tež morić.
To a tamne (06.09.22)
Po zawlečenju Jack Russell Terriera Oskara před lětom w Berlinje njejsu wobsedźerjo swojeho psa přeco hišće namakali. Minjene měsacy drje su ludźo Oskara hdys a hdys wuhladali, tola pytanje za nim bě stajnje njewuspěšne. Loni bě hólc před drogeriju w Pankowje psa pokradnył a w Kreuzbergu zaso pušćił. Powěsć je so spěšnje po socialnych syćach rozšěriła a z tym kedźbnosć zbudźiła.
Po dwójnej přestawce korony dla so někotři ratarjo w bayerskim Allgäuju tradicijow wzdadźa. W septembrje wšak swoje kruwy z pastwow na horach do dołow wjedu, štož su rady woswjećili. Mjeztym skót na wšelake blaki wodźa, zwotkelž jón dale na statoki transportuja. Někotři burja swójski skót samo hnydom z nakładnymi awtami z pastwy na horje wotewzaja. Najebać to, pak ratarjo kónc lěća swjeća a domizniski swjedźeń přewjedu.
To a tamne (05.09.22)
Wěcynjewustojneho kurjenja kołća dla je pčołar w Porynsko-Pfalcowskej něhdźe 400 kwadratnych metrow lěsa zapalił. Při tym je 42lětny pjatk popołdnju přewjele kura zadychał, čehoždla dyrbjachu jeho na městnje lěkować. Nětko přepytuje policija pad njekedźbliweho zadźerženja dla. Cyłkownje 55 wohnjowych wobornikow z jědnaće jězdźidłami je płomjenja hašało.
Dźakowano dokładnemu hladanju je w Šwicarskej nopawa z dwěmaj hłowomaj starobu 25 lět docpěła. Na swojich narodninach zawčerawšim w Genfskim přirodnym historiskim muzeju su hladarjo tam bydlace zwěrjo z mjenom Janus ze zubnej šćětku wumyli. Nopawu wšědnje kupaja, prawidłownje masěruja, ze specielnej dietu zapleńča a wobstajnje na staw derjeměća kontroluja. Amfibija bu po Janusu, romskim Bohu z dwěmaj wobličomaj, pomjenowana.
To a tamne (02.09.22)
16 žnjowych pomocnikow zajała je nižozemska policija, jako tući na ležownosći bywšeho zawoda konop předźěłachu. Po pokiwje swědka běchu zastojnicy hižo před twarjenjom w Oirsbeeku njedaloko němskeje mjezy pola Aachena sylnu wóń konopje registrowali. W hali nańdźechu potom 16 wosobow, kotřiž runje rostliny rozkuskowachu. Mjez zajatymi bě dwanaće wosobow bjez kruteje adresy, policija zdźěli.
Zhubjeny šěsćlětny hólc je w Badensko-Württembergskej na swojim kolesu dźesać kilometrow daloko k hotelej jěł a zasadźenje policije zawinił. Staršej běštaj jeho jako zhubjeneho přizjewiłoj, dokelž njebě so z hrajkanišća wróćił. Na to policisća z helikopterom za nim pytachu. Wječor přizjewi so sobudźěłaćer hotela, rěčo wo „jara młodym hosću“. Što je hólc w hotelu chcył, njewědźa.
To a tamne (01.09.22)
Njehańbity paduch je dobry skutk młodeje žony znjewužił: Jako 28lětna spyta wočiwidnje ćeknjeneho běłeho nukla w Bad Kreuznachu popadnyć, pokradny paduch jeje móšeń. Žona bě tobołu skrótka na chódnik stajiła, zo by zwěrjo popadnyła, policija zdźěla. Tutu składnosć paduch wuži a móšnju z pjenjezami a dokumentami pokradny. Tobołu wón preč ćisny. Nukla su mjeztym zwěrjatowni přepodali. Ta pyta nětko za wobsedźerjom – a policija za paduchom.
Chětro napity šofer nakładneho awta je pola Frankfurta nad Wódru do wopačneho směra na awtodróhu jěł. 48lětny na to spyta, so na awtodróze zawróćić, policija zdźěli. Zastojnicy dirigowachu jeho z awtodróhi na parkowanišćo. Tam zwěsćichu sylnu wóń alkohola a přewjedźechu test, kotryž wunjese 2,9 promilow. Muž dyrbi drje sej nětko nowe dźěło pytać.
To a tamne (31.08.22)
Chory pinguin w zwěrjencu w San Diegu w USA ma wotnětka ortopediske gumijowe črije. Štyri lět stary Lucas, zastupnik južnoafriskich pinguinow, ćerpi hižo dlěši čas zahorjenych nohow dla, zwěrjenc w južnej Kaliforniskej zdźěla. Prěnje wuslědki su wjele lubjace: Lucas móže zaso lěpje běhać a wo wjele lěpje stejo runowahu dźeržeć. Črije su wosebje polstrowane a maja bolosćam zadźěwać.
Młodostnej płuwarce w Sprjewi stej w Berlinje zasadźenje policije a wohnjoweje wobory zawiniłoj. Swědcy běchu holcy wokoło 21 hodź. w Friedrichshainje wuhladali a policiju informowali. Policisća płuwarce po někotrych diskusijach z wody wućahnychu. Płuwanje w Sprjewi w centrumje Berlina je zakazane. Jedna so wo zwjazkowu wodowu dróhu z tójšto nakładnymi a sportowymi łódźemi. Nimo toho je kwalita wody špatna.
To a tamne (30.08.22)
Swój dom wo 150 metrow přesunyć chce bur w Indiskej noweje awtodróhi dla. Nowu čaru chcedźa runje tam twarić, hdźež poměrnje nowy dwuposchodowy dom steji. Knježerstwo bě burej wotškódnjenje 100 000 eurow poskićiło. To pak by mjenje było, hač je muž před lětami za twar domu wudał. Mjeztym su dźěłaćerjo hrjebje wuzběhnyli a z hydrawliskej techniku dom wo něšto metrow přesunyli.
Kłok k pohłušenju wopicy je w Japanskej mylnje žonu trjechił. Žona bě měšćanske zarjadnistwo Tokioskeje susodneje prowincy Shizouka informowała, zo njedaloko dwórnišća wopica dunda. Na to přińdźe fachowc, zo by zwěrjo pohłušił a popadnył. Jako třělbu přihotowaše, njewotpohladnje třěli. Žona bu wot kłoka při ruce trjechena a so zwjeze, móžeše pak chorownju krótko na to zaso wopušćić. Nětko pad přepytuja.
