To a tamne (02.06.22)
Wulki kenguru je so w Awstralskej wosrjedź dróhi do muža dał a je šěsć mjeńšin z nim wojował. Při tym so muž snadnje zrani. Zwěrjo bě psy 59lětneho na toho ležownosći atakowało. Na to hrabny sej muž retl a chcyše kenguruwa wućěrić. Tón pak do muža kopaše a biješe a jemu do porsta kusny. Po njeskónčnych šěsć mjeńšinach so zwěrjo skónčnje wotsali. Muž jemu ani zły njeje: „Smy swoje sydlišća na jich kraju twarili“, wón rjekny. Nawuknył při wšěm je, zo móže kenguru chětro njemdry a agresiwny być.
Za padustwo su so paduši w Nottulnje pola Münstera zamołwili. Tući běchu so do předawanskeje budki za truskalcy zadobyli a marmeladu a sekt spakosćili. Dwaj dnjej pozdźišo tu rubizna zaso bě, wobsedźerka zdźěli. Připołoženy bě papjerka ze zamołwjenjom za „hłuposć“. Policija pyta nětko za swědkami.
To a tamne (01.06.22)
Zwada wo słónčnik před muzejom daklow w Passauwje zbudźa dale wjele kedźbnosće. Porjadniski zarjad města bě muzejej zakazał, słónčnik ze stólcami a blidom před zachodom nastajić, dokelž pobrachuje za to wurjadna dowolnosć. Mjeztym so wopytowarjo, měšćanska rada a hosćencarjo z muzejom solidarizuja, kotryž přiwabja kóždolětnje wjele turistow. W najhóršim padźe chcyli mějićeljo muzeja do Regensburga přećahnyć.
Wulět swójby nilowych husycow po awtodróze je w Badensko-Württembergskej zasadźenje policije a nachwilne zawrjenje awtodróhi zawinował. Šoferojo běchu policiju wo husycach informowali, kotrež w měrje po dróze čampachu. Policisća na to awtodróhu A98 pola Eimeldingena ma štwórć hodźiny zawrěchu a husaceju staršeju z wosom młodźatami z awtodróhi přewodźachu.
To a tamne (31.05.22)
Ze 103 lětami swětowy rekord nastajiła je parašutistka w Šwedskej. Jako dotal najstarša žona je Rut Larsson njedźelu popołdnju 200 kilometrow južnje stolicy Stockholma tandemowy skok zmištrowała. Na lětanišću čakachu pomocnicy z jeje rolatorom. „Bě krasnje tam horjeka“, wona rjekny. Larsson bě lěta 2009 hižo raz tandemowy skok zmištrowała. Najnowši po boku parašutista Joackima Johnssona bě tuž druhi w jeje žiwjenju. Wo oficialny dźěl rekorda staraše so zastupjerka Guinnessoweje knihi rekordow.
Na wšě 230 kilogramow twarožka pokradnyli su njeznaći w Posaarskej. Skućićeljo spakosćichu kónc tydźenja cyłkownje 15 wulkich paketow Edamskeho. Za to su durje připowěšaka wotewrěli, kiž steješe na parkowanišću při awtodróze A 62. Kak su twarožk wotwjezli a kak wulka je škoda, dotal hišće njewědźa.
To a tamne (30.05.22)
Zamołwiteho za „pjenježny dešć“ w cyłkownej hódnoće 50 000 eurow w Mainzu je policija wuslědźiła. Po informacijach policije je muž srjedźneje staroby we wysokodomje pjenjezy legalnje wobsedźał. Dalše informacije wo nim a k přičinam njewšědneje akcije njejsu hladajo na škit wosoby zdźělili. Po tym je „wosebite wuwzaćne połoženje“ pjenježny dešć zawinowała. Policija ludźi w tym zwisku namołwja, namakane pjenjezy wotedać. Wot 50 000 eurow, kotrež běchu minjenu póndźelu z wysokodomu na dróhu padnyli, přeco hišće dźěl pobrachuje.
Ručnu granatu z Prěnjeje swětoweje wójny namakał je wobsedźer domu w Hornjej Frankskej. 65lětny bě minjeny pjatk kólnju wurumował a bróń namakał. Specialisća policije ju zrumowachu. Rozbuchadło w njej wjace njebě. Kak bě ručna granata do kólnje přišła, muž njewě.
To a tamne (27.05.22)
Lózyski ganzor z mjenom Günther poćežuje ludźi w Northeimje pola Göttingena. Wjacekróć je zwěrjo hižo z burskeho statoka twochnyło, dokelž je płót prawdźepodobnje přeniski. Dokal ganzor chce znate njeje. Wobydlerjo su jeho hižo někotre razy zetkali a policiju zawołali. Zastojnicy ganzora hižo derje znaja a spožčichu jemu mjeno Günther. Kaž pak policija wčera rano zdźěli, so zwěrjo po wšěm zdaću z tamnymi husycami burskeho statoka njeznjese, štož je najskerje přičina ćěkanja.
Z jenož hišće tři fungowacymi kolesami na jězdźidle bě zawčerawšim pjana 56lětna šoferka w porynsko-pfalcowskim wokrjesu Westerwald po puću. Swědka, kotraž w awće za njej jězdźeše a njewěste wodźenje wobkedźbowaše, zawoła policiju. Zastojnicy zwěsćichu pola 56lětneje hódnotu 1,67 promilow.
To a tamne (25.05.22)
Znajmjeńša 50 000 eurow je so w Mainzu z wysokodomu na dróhu „dešćowało“. Kaž policija zdźěli, su so wjacori wobydlerjo přizjewili a wo „njewšědnym njewjedrje“ rozprawjeli. Pjenjezy su ludźo zezběrali a wotedali. Přeco hišće je njejasne, komu pjenjezy słušeja a čehodla su z domu padnyli. Móžne, zo běchu we hłowaku zašite a zo buchu mylnje wutřasene abo pochadźeja z njeskutka.
Rubježnik je w Gelsenkirchenje swoje kluče zhubił, po tym zo bě žonje ručnu tobołu wutorhnył. Napadna je módra wutrobička při klučach a logo koparskeho ligista FC Schalke 04. Policija pyta nětko za swědkami a je foto wonych klučow mjeztym wozjewiła.
To a tamne (24.05.22)
Dołhe přihoty cyrkwinskeho kwasa scyła trjeba njejsu. Znajmjeńša bě tomu minjenu sobotu w Berlinje tak, hdźež wotmě so pop-up kwasny festiwal. W ewangelskej cyrkwi Genezareth su so wjacore poriki spontanje zmandźelili. Hač do soboty wječora bě tomu 72 porikow, zdźěli fararka Susann Kachel. Kwasy běchu na najwšelakoriše wašnje móžne, při čimž poskićachu organizatorojo live hudźbu abo tež elektroniske zynki. Wulkeho naprašowanja dla chcedźa zarjadowanje na kóždy pad wospjetować.
Najprjedy korona a potom njewjedro: Tež nachwatanski termin hodownych wikow w Solingenje minjeny kónc tydźenja steješe na hračkach. Hladajo na připowědźene njewjedro su organizatorojo pjatkowniše zarjadowanje krótkodobnje wotprajili. Sobotu a njedźelu pak móžachu lěćne hodowne wiki, kaž planowane wotměć. A tak ćehnjechu rumpodichojo hakle dźeń pozdźišo po swjedźenišću, hdźež je něhdźe 60 wikowarjow swoje twory poskićało. Dale mějachu tam sněhakowansku čaru přihotowanu a wězo wjeselachu so wopytowarjo tež nad hodownymi spěwčkami, kiž tam live přednjesechu.
To a tamne (23.05.22)
Z jězbu na starej seklowej čarje je danska kralowna Margrethe II jubilej poł lětstotka na trónje woswjećiła. Zhromadnje ze šefinu wólnočasneho parka Tivoli w Kopenhagenje Susanne Mørch Koch a tamnymi hosćimi je wona z wulkej spěšnosću křiwicy zmištrowała. Do toho su kralownu z chorhojemi a balonami w parku witali.
Wulke dźiwje swinjo je zawčerawšim klientow w kosmetiskim salonje pólskeho města Kraków wustróžiło. Skoćo bě so do salona zadobyło, při čimž personal a klienća strachoćiwje z wobchoda ćeknychu a durje zawrěchu. Na to dźiwje swinjo w salonje chětro zachadźeše. Hakle wohnjowym wobornikam, zwěrjećim wuchowarjam a skótnemu lěkarjej so poradźi je popadnyć. Skónčnje dowjezechu swinjo zaso na wěste město zwonka Krakowa.
To a tamne (20.05.22)
Mucha w kabinje šofera nakładneho awta je w Porynsko-Pfalcy zasadźenje policije zawinowała. Šofer bě spytał, muchu z kabiny wuhnać a bě tohodla na awtodróze 65 po seklojtej čarje jěł. Druzy šoferojo tukachu na pjaneho wodźerja a wołachu policiju. Při kontroli zastojnicy ani alkohol ani mučnotu njezwěsćichu. Policija radźi, w tajkim padźe radšo pozastać a zwěrjo z awta wuhnać.
Jeno na drjewjanym stólčku sedźo je šofer wosoboweho awta po puću był, jako jeho zastojnicy w sewjerorynsko-westfalskim Güterslohu kontrolowachu. Stólčk steješe na drjewjanej podłoze, zamk za wěstotny pas tež njeměješe. 33lětny njemóžeše zastojnikam rjec, hdźe je sedło šofera wostało. Nimo toho njeměješe jězbnu dowolnosć. Policisća jemu dalše jězdźenje zakazachu. Muž dyrbi nětko z chłostanskim jednanjom ličić.
To a tamne (19.05.22)
Z namakanymi pjenjezami wulce nakupować šli su dźěći w hornjobayerskim Oberhachingenje. 13lětny bě spočatk meje zabytu aktowku na nastupnišću tamnišeho dwórnišća namakał a w njej wobalku, w kotrejž bě 14 900 eurow. Město toho zo by pjenjezy wotedał, kupi sej z towaršemi debjenki, drasty a e-roler. Skónčnje tole staršim napadny. Kupjene wěcy su mjeztym wróćili. Staroby dla njemóža jich chłostać, na „wujasnjowacu rozmołwu“ pola policije pak su prošeni.
Spektakularne rubježnistwo w cłownym zarjedźe w sewjerorynsko-westfalskim Emmerichu w nowembru 2020 z rubiznu 6,5 milionow eurow je wujasnjene. Policija je wjacorych skućićelow zajała, mjez druhim cłownika. Tón bě skućićelam rozsudny pokiw dał. Cwólba z Pólskeje na to sćěnu trezoroweje rumnosće přełama a pjenjezy pokradny.
