To a tamne (19.04.21)
Projekt wjesnych kokošow so w porynsko-pfalcskim Bleckhausenje jako wulki wuspěch wopokazuje. Kurjenc z wonkownym arealom je mjeztym zetkawanišćo ludźi a komunikaciski centrum. Zastaranje skotu organizuja w „kokošacych skupinach“. Nimo toho maja městno za sedźenje a přihladowanje. Wjesnjanosta Markus Göbel ma projekt za „absolutne dobyće“. Ideju za wjesne kokoše měješe porik, kotryž bě z Essena na wjes přićahnył. Płoninu je gmejna přewostajiła.
Z kolonu bydlenskich mobilow su sej přiwisnicy campinga sobotu w Berlinje wotewrjenje stanowanišćow žadali. Iniciatiwa „camping z wotstawkom“ zliči wjace hač tysac wobdźělnikow. Wona pokazuje z peticiju na to, zo je camping najwěsćiša a na kontakty najsłabša forma wočerstwjenja za swójby. 44 000 podpismow su zezběrali.
To a tamne (16.04.21)
Najwjetši pjenježny dar swojich stawiznow je coo w sewjerorynsko-westfalskim Münsteru dóstał, 750 000 eurow. 82lětny wobydler Münstera spjelni tak přilubjenje, kotrež bě swojej před lětami zemrětej mandźelskej dał. Zwěrjenc chce darićela a jeho žonu z wopomnjenskej taflu počesćić. Muž bě w Awstralskej widźał, kak zwěrjata lěsnych wohenjow dla ćerpja a kelko ludźi jim pomha. Mandźelskaj běštaj sej tuž předewzałoj, zwěrjatam a dźěćom pomhać.
13lětneho z dźěćaceho sydła čumpjele wuswobodźić dyrbjała je policija w porynsko-pfalcskim Bellheimje. Hólčec bě z dwanaćelětnym towaršom po puću był, jako sej wumysli, so na čumpjeli do sydła za małe dźěći tłóčić. Wězo tam tčacy wosta. Tež přećel njemóžeše jemu pomhać. Přiwołanaj policistaj 13lětneho skónčnje ze zhromadnej mocu wućahnyštaj.
To a tamne (15.04.21)
Hišće wyšu postawu Chrystusa hač w Rio de Janeiru twarja tuchwilu w lědma znatym južnobrazilskim městačku Encantado. Postawa ma 43 metrow wysoka być a tak pjeć metrow wjetša hač swětoznaty symbol w metropoli kraja. Kónc lěta chcedźa ju poswjećić, hdyž swjeća w Rio de Janeiru 90. róčnicu poswjećenja tamnišeho monumenta. Twarske kóšty 300 000 eurow chcedźa z pomocu pjenježnych darow financować.
Na schodźe spěšnika sobu jěć chcyše 30lětny z Kölnskeho hłowneho dwórnišća. Sobudźěłaćerka železnicy to widźeše a ćah z nuzowym borzdźidłom zadźerža. Policistam muž rozłoži, zo bě z ćaha wulězł, zo by cigaretu kurił. Při tym bě dalejězbu zapasł a na schodźenk skočił, jako njedachu so durje wjace wočinić. Nětko dyrbi so strašneho zasahnjenja do železniskeho wobchada dla zamołwić.
To a tamne (14.04.21)
Swětowy rekord w skakanju přez rynku nastajił je mały čorny ameriski cockerspaniel Gil w Hannoveru, kaž Němski institut rekordow wobkrući. Trenarka Jutta Gaßmann ma wotnětka wopismo z připóznatymi 43 skokami Gila w běhu 60 sekundow. Žadane bě znajmjeńša 20 skokow w nowowunamakanej disciplinje.
Žarowanskeje swjatočnosće za zemrěteho britiskeho princa Philipa so zdalować, wo to prosy měšćanosta Windsora njedaloko Londona. Ludźo dyrbjeli hladajo na koronapandemiju na swoju strowotu a na strowotu druhich dźiwać, praji měšćanosta John Story. Nimo toho wón na to skedźbnja, zo wotměja so wšitke wobrjady, tež procesion, za murjemi hrodu a zo wopytowarjo ničo njewidźa. Žarowanska swjatočnosć za minjeny pjatk zemrěteho princa budźe sobotu.
To a tamne (13.04.21)
Změna wjedra město wohenja: Ćahata kurjawa a ćmowe mróčele su w Allgäuskich Alpach wjetše zasadźenje wohnjowych wobornikow zawinowali. Muž bě w nocy na póndźelu na horje pola Pfrontena přirodny zjaw wobkedźbował a sej myslił, zo so hórska chata pali. Wjacore jednotki wohnjoweje wobory a policisća na to kónčinu přepytali, bjez toho zo bychu woheń wuhladali. Tak bě prosće wjedrowy zjaw muža zamylił.
Najwjetšeho nukla swěta su wobsedźerce we Wulkej Britaniskej pokradnyli. Darius je po Guinnessowej knize rekordow 129 centimetrow dołhi a wot lěta 2010 nošer titula. Wobsedźerka Annette Edwards paducha prosy, nukla zaso wróćić a přilubja jemu wjace hač tysac eurow. „Darius je za plahowanje mjeztym přestary“, wona zrudna twitterowaše.
To a tamne (12.04.21)
Mylnje eksmatrikulowała je Swobodna uniwersita w Berlinje 2 600 studentow. Přičina bě techniski zmylk. Studenća njeběchu swój studijny popłatk w prawym času přepokazali a běchu hižo napominani. Poprawom dóstawaja potrjecheni w tym padźe druhe napominanje. Město toho pak připósła jim knihowanski system hnydomnu eksmatrikulaciju. Mjeztym su wšitkich wo misnjenju informowali a zmylk w systemje sporjedźeli.
Přepjany za alkoholowy test bě šofer nakładneho awta w badensko-württembergskim Herbrechtingenje. Do toho bě wón ze swojim jězdźidłom na parkowanišću do připowěšaka dalšeho Lkw-ja zrazył, a to tak jara, zo bu připowěšak do pódla stejaceho awta stłóčeny. 31lětny bě tak wopity, zo njemóžeše ani alkoholowy test přewjesć. Policisća dowjezechu jeho tuž do chorownje.
To a tamne (09.04.21)
Wjace hač 20 wopicow je ze zwěrjenca w badensko-württembergskim Löffingenje ćeknyło. Prawdźepodobnje běchu twarske dźěła w zwěrjencu přičina, zo móžachu zwěrjata puć z parka namakać. Wopicy běchu na to we wjetšich skupinach po puću. Sobudźěłaćerjo nětko za primatami pytaja. Policija ludźi prosy, so wopicow zdalować. Poprawom spłóšiwe zwěrjata móhli agresiwnje reagować.
Spódnje cholowy w zahrodach zaryć chcedźa w Šwicarskej. Při tym jedna so wo přepytowanje statneho slědźenišća Agroscope. Institucija je 2 000 spódnich cholowow z bałmy ratarjam a zahrodkarjam rozesłała. Tući měli cholowy do zemje zaryć a po měsacu zaso wuryć. Na zakładźe wobškodźenja płata móža fachowcy kwalitu pódy posudźować. Při tym płaći: Čim wjace je dźěrow w cholowach, ćim strowiša je biologija pódy.
To a tamne (08.04.21)
Piwo pijaceho paducha medikamentow w swojej praksy překwapił je lěkar w Bielefeldźe. Medicinar bě rano zahe do praksy přišoł a při recepciji nakupowansku titu z lěkami wuhladał. Jako słyšeše zwuki w lěkarskej stwě, dźěše pohladać. Tam steješe jemu cuzy muž z blešku piwa napřećo. Po krótkej rozmołwje so paduch bjez swojeje rubizny zminy. Policija zwěsći, zo bě so přez pinčne wokno zadobył.
Do awta bywšeho awstralskeho premierministra zalězła je skupina napitych młodostnych, dokelž mějachu jeho za šofera taksija. Kevin Rudd pytaše runje za parkowanišćom, po tym zo bě swoju dźowku před hosćencom wotsadźił. Při sylnym dešću so na to młodostni do awta tłóčachu. Rudd měješe zrozumjenje a wjesołu skupinu wožeše. Hakle po něšto času skupina zwěsći, zo sedźeše za wodźidłom bywši ministerski prezident.
To a tamne (07.04.21)
Nowy swětowy rekord nahromadźenych pinguinow nastajić chcetaj mandźelskaj Birgit Berends (48) a Stefan Kirchhoff (53) w Cuxhavenje – a potom z hromadźenjom přestać. Mjeztym mataj hižo štyri zapiski w Guinnessowej knize rekordow. Posledni pochadźa z lěta 2011 ze 11 000 pinguinami. Mjeztym trochujetaj wobstatk na 26 000 drjewjanych, metalowych abo pórclinowych eksemplarow. Na wšě 4 000 z nich pokazujetaj w swójskim muzeju w Cuxhavenje.
W poslednim rynku cyrkwje w Karlsruhe je žona jutry njedźelu dźěćo porodźiła. Zwóńk Bonifaciusoweje cyrkwje bě młody porik při zastanišću tramwajki na druhim boku dróhi wobkedźbował. Pola žony běchu so hrona hižo započeli. W cyrkwi so mały hólc po 25 mjeńšinach narodźi. Wuchowanska słužba dowjeze z Afriki pochadźacu mać do chorownje.
To a tamne (06.04.21)
Dokelž su wosebite zwučowanišća wohnjowych wobornikow koronapandemije dla zawrjene, su sej čłonojo z šwabskeho Wemdinga swójsku připrawu do stareje bróžnje twarili. Nimale 100 wobornikow tam prawidłownje trenuje. Ideju za to měješe sobustaw Thomas Hönle. Blisko jeho staršiskeho domu stejace twarjenje bě hižo dlěši čas njewužiwane. Tak je so nawodnistwo wobory wo dowolnosć za přetwar postarało. Kaž čłonojo zdźěla, je jim jónu aspekt zwučowanja wažny. Na tamnym boku pak je čara jara zabawna.
Młody Mnichowski elefant, kiž je po komikarju Otto Waalkesu pomjenowany, lubuje wustupy. Po tym zo bě coologiska zahroda měsacy dołho zawrjena, smědźachu tam nětko wopytowarjow witać. Za pjeć měsacow stareho elefanta bě to nowostka. Spěšnje pak je Otto spóznał, zo ludźo show lubuja, štož jim rady poskića.
