To a tamne (24.01.22)
Do dźesać metrow hłubokeho zastaranskeho šachta padnył je muž w hotelu hessenskeho Hanauwa, při čimž so ćežko zrani. Wězo njemóžeše so hižo sam wuswobodźić. A tak dyrbješe wosebita jednotka wohnjoweje wobory přijěć, kotraž móže ludźi z wulkeje wysokosće wuchować. Na akciji bě 35 wobornikow wobdźělenych. Skónčnje so poradźi, muža z powjazami z wuskeho šachta wućahnyć. Kak móžeše do njeho padnyć, njewědźa.
Z nožom w ruce je wobsedźerka małeho wobchoda w Berlinje-Kreuzbergu dweju rubježnikow wućěriła. Mužej běštaj do wobchoda zastupiłoj a sej z pistolu pjenjezy žadałoj. 53lětna pak njeda so zatrašić a wućahny kuchinski nóž, na čož so rubježnikaj zminyštaj. Jedyn z njeznateju přiwšěm hišće z brónje třěli, kotraž pak wukopa so jaka trašawka. Wobsedźerce wobchoda so ničo njesta.
To a tamne (21.01.22)
Warnowanski lac woblečene kokoše běchu srjedu popołdnju na dróze blisko porynsko-pfalcskeho Haßlocha po puću. Wo tajkim wobrazu chětro zadźiwana je šoferka awta policiju informowała. Kaž so wukopa, bě honač z pjeć kokošemi z ležownosće twochnył. Warnowanskej lacaj dweju kokošow wšak njeběštej jako škit w nadróžnym wobchadźe postajenej. Dokelž honač při teptanju kokošow jara energisce postupuje, bě wobsedźerka za nje ekstra škitne lacy zhotowiła.
Při wobchadnej kontroli awta ćeknył, ale tam swoju móšnju zabył je srjedu popołdnju 29lětny sobujěducy w Berlinje. Jako so wón trochu pozdźišo jeje dla k jězdźidłu wróći, policija hižo na njeho čakaše a jeho nablaku zaja.
To a tamne (20.01.22)
Ćopłota, čaj a mandariny – zamyleny wobydler starownje je w buddhistiskim templu posaarskeho Losheima na zbožo škit před zymskim wjedrom namakał. Buddhist je jako zhubjeneho přizjewjeneho muža tak dołho zastarał, doniž njejsu jeho wohnjowi wobornicy zaso do starownje dowjezli. Lochce zdrasćeny muž bě so ze starownje wotsalił, ale so njewróćił a tak pytansku akciju zawinił. Tak su wobornicy tež wo durje templa kłapali a zhubjeneho skónčnje našli.
Wjace hač 200 awtowych klučikow su njeznaći w awtowym logistiskim centrumje w Bremerhavenje pokradnyli. Nastata škoda wučinja wjacore statysacy eurow. Jězdźidła njemóža kupcam přepodać, ale dyrbja je najprjedy raz znowa programěrować. Na terenje steja tysacy nowych awtow za transport ke kupcam. Motiw skućićelow dotal znaty njeje.
To a tamne (19.01.22)
Potajnstwo spodźiwneho nócneho šumjenja a klepanja z hłubin zemje w dźělu grjekskeho přistawneho města Thessaloniki je wotkryte: Kaž tamniša wodarnja zdźěli, mějachu zwuki něšto z ćišćom we wodowodach činić. Ćišć su mjeztym změnili a problem wotstronili. Tydźenje dołho běchu zwuki ludźi znjeměrnjeli a běchu přičina najhóršich spekulacijow – wo bližacym so zemjerženju hač k zwonkazemskim, kotřiž so na čłowjestwo měrja.
Nadpad njeznatych ze smjerdźatej butrowej kisalinu na stanowanišću w sewjerorynsko-westfalskim Drostenje je pad za policiju. Zastojnicy přepytuja dwě wulkej wodopistoli, kiž běchu ze susodneho kanala wućahnyli a kotrejž tak surowje smjerdźitej, zo móhłoj „bróni njeskutka być“. Stanowanišćo wužiwaja trajni camperojo. Kanal rjedźić płaći po prěnim trochowanju 50 000 eurow.
To a tamne (18.01.22)
Palaca so baterija elektrokolesa je w delnjosakskim Isernhagenje škodu 1,5 milionow eurow zawostajiła. Aku bě so za čas nabiwanja zapalił. Wobydlerjo wosobneho domu buchu přez alarmowu připrawu warnowani a móžachu so wuchować. Płomjenja pak rozpřestrěchu so na biblioteku, w kotrymž aku ležeše. Fachowcy wohnjoweje wobory wšak spěšnje zwěsćichu, zo bě defekt kolesoweje baterije woheń zawinił.
Prěnje narodniny swojeho synka je wopity muž w Ludwigshafenje z wutřělemi woswjećił a so tak wo zasadźenje policije postarał. 30lětny bě z trašawku wospjet do powětra třělał. Přiwołani policisća zhonichu, zo bě muž wjacore salwy składnostnje synkowych narodnin třělał. Wón pak njeměješe žanu dowolnosć, tajku bróń wobsedźeć. Zastojnicy pistolu a municiju sćazachu a delikt přizjewichu.
To a tamne (17.01.22)
Jednotliwu stronu comicoweho zešiwka su w USA za wjace hač tři miliony dolarow přesadźowali. Originalna rysowanka strony 25 wuměłca Mikea Zecka z lěta 1984 wušłeho comica „Secret Wars No. 8“ je 3,4 miliony dolarow (něhdźe tři miliony eurow) wunjesła, kaž awkciski dom Heritage Auctions w texaskim Dallasu zdźěli. Je to najdróša hdy přesadźowana strona comicoweho zešiwka.
Najebać koronapandemiju su so statysacy indiskich wěriwych w rěce Ganges kupali, zo bychu sej hrěchi wotmyli. Mnozy njewužiwachu w zwjazkowym staće Uttar Pradesh žane škitne nahubniki a stejachu wusko hromadźe. Do toho dyrbjachu wšitcy wobdźělnicy negatiwny PCR-test předpołožić. Lěkarjo běchu podarmo spytali swjatočnosć sudnisce zakazać dać. Ličby natyknjenjow z koronu w Indiskej zaso přiběraja.
To a tamne (14.01.22)
Wopity šofer je swoje awto w porynsko-pfalcskim Bernkastelu-Kuesu před policajskej staciju parkował a je sej za wodźidłom wusnył. Zastojnikam wóz napadny, dokelž motor wšón čas běžeše. Zastojnicy zwěsćichu pola 26lětneho šofera 1,72 promilow alkohola a su jeho wopiłstwa w nadróžnym wobchadźe dla hnydom přizjewili.
Z horcotu nad 50 stopnjemi bědźa so tuchwilu wobydlerjo zapadnych kónčin Awstralskeje. W pobrjóžnym sydlišću Onslow bě to wčera z 50,7 stopnjemi lětdźesatki stary rekord a najwyša hdy w zwjazkowym staće Western Australia měrjena temperatura. Samsnu hódnotu běchu 1960 w pusćinowym sydlišću Oodnadatta na juhu kraja naměrili. Tež w druhich městach su podobne temperatury zwěsćili. Z městnami su klimatiske naprawy přežadane a hižo njedźěłaja.
To a tamne (13.01.22)
Dźěćo w busu porodźiła je žona w brazilskej metropoli Rio de Janeiro. Při porodźe jej sobujěducy pomhachu. Do toho běchu woni šofera pohonjeli, spěšnišo jěć. We wideju brazilskeje telewizije je widźeć, kak sanitetar z nowonarodźenym na ruce bus wopušći, młoda mać za nim. Wona so pola pasažěrow hišće zamołwi, zo bě bus jeje dla zapozdźeny. Ludźom pak bě to po wšěm zdaću smorže. Woni jej gratulowachu a so z njej wjeselachu.
Do hajzla ćisnjene spěšnotesty korony dla zatykuja w francoskim Berre-les-Alpes pola Nizzy tamnišu rjedźernju wopłóčkow. Zaso raz běchu železne hrabje, kotrež krute wobstatki z wopłóčkow ćahaja, zatykane, wottam rěkaše. „Myslachmy sej, zo je logiske, zo słušeja trjebane spěšnotesty do wotpadkoweho sudobja.“ Komuna ludźi prosy ničo do nuznika njemjetać, štož do njeho njesłuša.
To a tamne (12.01.22)
Radšo sej z mobilnym telefonom hrajkałoj hač za złóstnikami honiłoj staj policistaj w Kaliforniskej – a staj nětko pušćenaj. Sudnistwo je jeju skóržbu přećiwo tomu zaćisnyło. Wobrazy awtomatiskeje kamery policajskeho awta dopokazuja, zo staj w lěće 2017 hru „Pokemon Go“ dale hrałoj, byrnjež jeju zasadźenska centrala rubježnistwa dla do kupnicy pósłała.
Wjace hač 300 měchow z kradnjenej drastu a hrajkami je policija w delnjobayerskim Vilsbiburgu w bydlenju žony namakała. Wěcy běchu po bydlenju, w pincy a na balkonje rozdźělene. Swědcy běchu 36lětnu we wobchodźe při kradnjenju wobkedźbowali a policiju informowali. Policisća su na to bydlenje jako padušnica znateje žony přepytali a rubiznu namakali. Čehodla žona wěcy kradnješe, ale njewužiwaše, nichtó njewě.
To a tamne (11.01.22)
Homoseksualne amplowe poriki maja wot tohole tydźenja w Braunschweigu za wjace tolerancy wadźić. Cyłkownje wosom amplowych mužikow su ze štyrjomi žónskimi a štyrjomi muskimi porikami z małej wutrobičku narunali. Znački maja „signal tolerancy, wotewrjenosće a akceptancy jenakosplažneje lubosće być“, rjekny wyši měšćanosta Thorsten Kornblum (SPD) k zahajenju akcije.
Přemało spara a napinacy šulski dźeń stej wosomlětnemu pachołej w sewjernej Němskej zjawne pytanje policije wunjesłoj. Hólčec bě po šuli njedaloko Kiela do busa zalězł, doma pak njedojěł. Tak informowaštaj staršej policiju, kotraž zjawnje za nim pytaše. Busowy šofer je hólca skónčnje namakał – spjaceho w zadnim dźělu busa. Policija wosomlětneho na to domoj dowjeze.
