To a tamne (03.09.21)
Hodźiny dołho do wopačneho směra jěł je 92lětny muž z hessenskeho Bad Hersfelda a je skónčnje do Rostocka nad Baltiskim morjom dojěł. Poprawom chcyše wón do 130 kilometrow zdaleneho Nidderauwa. Syn muža bě policiju informował, dokelž njebě rentnar na šulski zachod wnučki přijěł. Policija pytaše z dowolnosću sudnika za mobilnym telefonom muža a zwěsći, zo je 92lětny w 550 kilometrow zdalenym Rostocku. Prawdźepodobnje bě wón wopačnu adresu do nawija zapodał.
Manipulacije wólbnych plakatow dla ma Greifswaldska zapósłanča Zelenych Katharina Horn wulke mjerzanje z policiju. Zastojnicy běchu ju lepili, jako přelěpješe wólbne plakaty zapósłanca CDU Michaela Sacka z nalěpkami „koruptny“. 23lětna Horn je so pola Sacka mjeztym telefonisce zamołwiła.
To a tamne (02.09.21)
Z překwapjenjom je so wčerawši rekordny pospyt w Zwickauwje skónčił: Na wšě 20 sportowčow město planowanych 19 je so do Trabanta 601 tłóčiło. Runje tři a poł mjeńšiny młode žony trjebachu, zo bychu do nutřkowneje a kófroweje rumnosće zalězli, tak zo móžachu durje awta začinić, kaž sej to předpisy žadaja. Rekord je tuž nětko zaso w Zwickauwje.
Z rekordnymi 305 km/h bě 23lětny na ilegalnym wubědźowanju awtow na awtodróze w Düsseldorfje po puću a je so při tym hišće sam filmował. Tam je spěšnosć poprawom na 120 km/h wobmjezowana. Filmowy material, z kotrymž běchu so wobdźělnicy wubědźowanja w interneće hordźili, je policija mjeztym zawěsćiła. Awtomatiske kamery awtodróhi su to tohorunja dokumentowali. 23lětnemu hrozytej pokuta 700 eurow a sćazanje jězbneje dowolnosće na tři měsacy.
To a tamne (01.09.21)
19 žonow w jednym Trabanće 601 – tónle nowy rekord chcychu dźensa w Zwickauwje nastajić. 1976 bě w telewizijnym wusyłanju „Außenseiter – Spitzenreiter“ 17 wosobow do tajkeho awta zalězło. 18 žonow rejwanskeho towarstwa w braniborskim Altlandsbergu je rekord z lěta 2019 přetrjechiło. Mjetarki Zwickauskeho mustwa BSV chcychu jón dźensa do domizny Trabanta wróćić. Akciju chcedźa filmisce dokumentować a Institutej za rekordy předpołožić.
Zo by morjenje třoch ludźi přiznał, je muž na samym wuchodźe Ruskeje cyły tydźeń na přichodnu policajsku stražu nóžkował, dokelž njebě tam žanych busowych abo železniskich zwiskow. We wsy Ochotsku wón policistam rjekny, zo je pjany najprjedy znateho a po tym dwě žonje zatřělił. Muža, kiž dźěła na dospołnje wotležanej farmje w lěsu, nablaku zajachu.
To a tamne (31.08.21)
Z popjerjowym sprayjom do sobuwobydlerki dała je so rentnarka w starowni w bayerskim Oberstdorfje. Do toho bě so staruška ze 86lětnej zwadźiła. Na to hrabny młódša z njeju za tyzu ze sprayjom. Při atace su so nimo 86lětneje hišće třo dalši wobydlerjo domu zranili, lěkarske zastaranje pak na zbožo trěbne njebě. Přećiwo 79lětnej policija nětko zranjenja ćěła dla přepytuje.
Pjany do policajskeho wozydła zrazył je muž ze swojim awtom w braniborskim Seelowje. Policisća běchu njedźelu rano w zahrodkownišću zasadźeni a běchu swój wóz před zachodom wotstajili. 28lětny do njeho zrazy, jako chcyše kompleks wopušćić, a jón wobškodźi. Policisća naměrichu pola muža 1,97 promilow alkohola. Jězbnu dowolnosć wón žanu njeměješe. Tak sej zastojnicy tež klučiki awta hnydom zdźeržachu.
To a tamne (30.08.21)
Na wšě 380 kilometrow domoj nóžkował je pos w Francoskej. Do toho bě wón při dowolowej jězbje na přestawce při awtodróze twochnył. Po hodźinach čakanja dyrbještaj wobsedźerjej bjez njeho dale jěć. Něšto dnjow pozdźišo dóstaštaj wonaj foto psa wot susodow, kotřiž doma na jeju dom kedźbowachu. Na nim bě „Pablo“ widźeć, słaby, ale strowy. Swój dowol mandźelskaj hnydom skónčištaj, zo byštaj so nawróćiłoj.
Napřemoběh šlinkow su sobotu w Oldenburgu zarjadowali. Dobyćer wubědźowanja bě šlink z mjenom „Speedy Gonzales“. Wón trjebaše za 33 centimetrow dołhu čaru tři minuty a 28 sekundow. Zwěrjo dósta hłójčku solotje jako myto, jeho trenar Rudi trajnu kartu za delnjosakski filmowy festiwal „Fast and Furios – Back to the Culture“. Cyłkownje 25 šlinkow bě so wubědźowało.
To a tamne (27.08.21)
Zwada wopačneje pizzy dla je so w badensko-württembergskim Waghäuselu namócnje skónčiła. Mějićel wobchoda biješe hosća z pizzowej łopaču na hłowu a skónčnje na zemi ležaceho z nožom mjezwoči zrani. Po wšěm zdaću njeje pizza hosćej hódź była.
Inscenacija dweju młodostneju za Instagram z wopačnej třělbu je w sewjerorynsko-westfalskim Bergheimje zasadźenje policije zawiniła. Žona bě policiju wo pozdatnje ćežko wobrónjenym poriku informowała. Zastojnicy přijědźechu z wjacorymi awtami a nańdźechu 14lětneho a 16lětnu při inscenowanju. Hrajkanska trělba bě mašinskej třělbje G36 chětro podobna. Młodostneju přepodachu staršimaj.
To a tamne (26.08.21)
Znajmjeńša 56 króć je 56lětny wodźer Lkw-ja bjez jězbneje dowolnosće po puću był. Zastojnicy zadźeržachu muža tele dny z jeho dwanaće tonow ćežkim wozydłom při kontroli w sewjerorynsko-westfalskim Troisdorfje. Při tym zwěsćichu, zo běchu jemu hižo w měrcu jězbnu dowolnosć wzali. Na zakładźe elektroniskeje dokumentacije, kotraž při kóždej jězbje šofera registruje, móžachu dopokazać, zo bě wón najebać to dale jězdźił. Kajke chłostanje mužej nětko hrozy, njemóžeše policija najprjedy raz rjec.
Ze žumpadła wućahnyli su policisća 81lětneho na brjoze Běłeho Halštrowa w vogtlandskim Adorfje. Pobrjóžne łučiny běchu sylneho dešća dla chětro rozmokane, tak zo njemóžeše so rentnar ze swójskeje mocy sam z hłubokeho błóta wuswobodźić. Pěšcy słyšachu jeho wołać a informowachu policiju.
To a tamne (25.08.21)
Ze syčenjom a pozdatnymi nadpadami je so zabłudźeny wuž (Ringelnatter) policistam spjećował, kotřiž chcychu jeho popadnyć. Za ludźi njestrašny had bě so na hóstny nuznik jednoswójbneho domu w delnjosakskim Bodenfelde zadobył. Jako pomoc při wlečenju słužeštej jemu kij při sćěnje domu a wotewrjene wokno. Skónčnje so policistej poradźi, hada z hóčku popadnyć a jeho do kisty tyknyć. W lěsu wusadźeny so tón spěšnje w kerčinje zminy.
Ze šotrowymi kamjenjemi na kolijach su dźěći na Rujanach jedyn z ćahow zadźerželi, kotrež za čas stawka lokomotiwnikow scyła hišće jězdźachu. Potrjecheny bě regionalny ćah mjez Stralsundom a Bergenom. Lokomotiwnik móžeše runje hišće borzdźić a zastać. Policija přepoda třoch hólcow w starobje wosom, dźewjeć a dźesać lět wustróžanym staršim.
To a tamne (24.08.21)
Wjace hač 600 eurow pokuty płaćić dyrbi kóždy z 30 wěriwych, kotřiž běchu so najebać płaćiwe wobmjezowanja koronawirusa dla w awstralskim Sydneyju na Božej słužbje wobdźělili. Cyrkwi běchu pokutu 3 000 eurow napołožili. Awstralska je korony dla wot měrca 2020 w dalokej měrje izolowana. W městach kaž Sydneyju knježi kruty lockdown. Protesty ludźi pak mjeztym přiběraja.
W stajnej alarmowej hotowosći je wobsedźerka alpaki Geronima, po tym zo je sudnistwo doskónčnje wukazało zwěrjo morić. Geronimo je dwójce na natykliwu tuberkulozu testowany. Jeho wobsedźerka Helen Macdonald pak testam njewěri a ma Geronima za stroweho. Dyrbjało-li „komando mordarjow“ na jeje statok přińć, nochce so wona zakonjej spjećować. „Potom pak móže cyły swět bjezzmyslnemu morjenju přihladować.“
To a tamne (23.08.21)
Hišće w prawym času přeprošenje na dźěćace narodniny dóstał je hólc w Augsburgu – dźakowano policistam. Kriminalna policija bě pad pokradnjenych listow přepytowała a tójšto wočinjenych posyłkow namakała. Mjez nimi bě tež přeprošenje. Bychu-li zastojnicy list z póštu dale słali, njeby přeprošenje wjace w prawym času dóšło. Tuž přiwjezechu je wosobinsce.
Samotwarjene kabrio je francoska policija sćazała. Muž bě z pomocu piły swój 20 lět stary Citroën Xantia přetwarił a třěchu prosće wotrězał. Policisća njewšědne jězdźidło na awtodróze A 20 do směra na atlantiski pobrjóh zadźeržachu a wotpowědujo předpisam sćazachu. Z tym zbudźichu tež tójšto kritiki. Ludźo njerozumja, zo so policisća z tajkim „problemom“ zaběraja, město toho, zo bychu woprawdźitych kriminelnych přesćěhowali.
