To a tamne (30.11.20)
Listowu wobalku, w kotrejž bě nimale tysac eurow, je šofer na třěše swojeho awta zabył a zhubił, jako wotjědźe. Krótko po tym přizjewi so 57lětny na policajskej straži a přepoda 900 eurow, kiž bě na dróze namakał. Zastojnicy jědźechu z nim na městno namakanki a tam dalše sto eurow a tež 39lětneho wobsedźerja pjenjez nańdźechu. Tón rjekny, zo bě do wotjězda cigaretu kurił a na pjenjezy na třěše zabył. Pjenjezy jemu wróćichu.
Ćěkaceho sobujěduceho wosoboweho awta je policajski pos Ilox našoł. Šofera awta zajachu něšto pozdźišo w toho bydlenju. 26lětny bě ze swojim awtom na A67 pola Raunheima z jězdnje zajěł a do wobhrodźenja twarnišća zrazył. Zhromadnje ze 29lětnym sobujěducym wostajištaj awto stejo a pěši ćeknyštaj. Zastojnicy z psom za nimaj pytaštaj. Ilox sobujěduceho w bliskim lěsu namaka.
To a tamne (27.11.20)
Paducha žwjenkačkowych awtomatow lepiła je policija w badensko-württembergskim Brühlu. Žona bě wobkedźbowała, kak 72lětny spyta, awtomat wotšrubować a informowaše policiju. Zastojnicy namakachu w awće rentnarja wosom dalšich kradnjenych awtomatow, nimo toho grat a tójšto klučow. 72lětny nochcyše dokładnje rjec, wotkal awtomaty pochadźeja. Policisća nastroje sćazachu, muž smědźeše hić.
Mobilny błyskač sobu wzał je šofer wosoboweho awta w Sakskej Šwicy. Po tym zo bě jeho nastroj w Struppenje z přewulkej spěšnosću lepił, 52lětny wospjet při błyskaču nimo jědźeše a aparat skónčnje sobu wza. Jako jeho sobudźěłaćer krajnoradneho zarjada narěči, muž wotjědźe. Policija nětko padustwa dla přepytuje. Błyskač zastojnicy pozdźišo w bydlenju muža namakachu.
To a tamne (26.11.20)
Na wšě 30 000 eurow pokuty nabrěmjenili su žonje w jendźelskim Bradfordźe, dokelž bě wona najebać zakaz koronapandemije dla w swojim frizerskim salonje dale kupcow posłužowała. 9. nowembra běchu ju prěni króć napominali a jej wjace hač tysac eurow pokuty napołožili. Mjeztym je so hoberska suma nakopiła. W interneće žona kritizuje, zo dyrbi tydźenje na statnu pomoc čakać, podruž a zličbowanki pak přiwšěm płaćić.
Wosebity kołk je w Nižozemskej paduchow twarožka přeradźił. Tući běchu 300 wulkich twarožkow w ratarskim zawodźe kradnyli a chcychu rubiznu w hódnoće 40 000 eurow internetnje předać. Skućićelej – 19lětna žona a 21lětny muž – pak njeběštaj wobkedźbowałoj, zo je kóždy z něhdźe dwanaće kilogramow ćežkich twarožkow z indiwiduelnym čisłom woznamjenjeny. Tak móžachu zwěsćić, z kajkeho zawoda twarožki pochadźeja.
To a tamne (25.11.20)
Hajnikej třělbu wotewzał je jeleń w Čěskej. Skupina hajnikow bě w lěsu po puću, jako so jeleń psa nastróži. Na to so zwěrjo na jednoho z hajnikow měrješe. Z rohami šmórny so jeleń kabata muža a roztorha jemu rukawu. Při tym wosta třělba na rohach zwěrja wisajo. Hišće dwaj kilometraj dale wobrónjeneho jelenja wobkedźbowachu. Ludźo su namołwjeni, třělbu policiji wotedać, dyrbjał-li jón něchtó namakać.
Telewizijny wobraz kaminoweho wohenja je w sewjerorynsko-westfalskim Schwelmje wulkozasadźenje wohnjoweje wobory zawinował. Žona bě wobornikow wołała, po tym zo bě w bydlenju susoda woheń widźała. Jako wjace hač 40 wobornikow k městnu wohenja dojědźe, so wěc spěšnje jako wopačny alarm wukopa. Wobydler telewizor hasny a wobornicy zaso wotjědźechu.
To a tamne (24.11.20)
Noze za konopejom stej pytaneho skućićela w hornjofrankskim Kulmbachu přeradźiłoj. Policiju běchu rozestajenja dla do bydlenja wołali. Zwada wukopa so jako łahodna. Při tym pak wuhladachu policisća noze. 32lětny, kotrehož z wukazom zajeća pytachu, bě na wopyće w bydlenju a bě sej pjany za konopejom wusnył. Zastojnicy jeho spóznachu a jemu ruce sputachu. Potom jeho hakle wubudźichu.
Swojorazny foto transportera, kiž dalši transporter transportowaše, na kotrymž steješe wosobowe awto, je Krefeldska policija w interneće wozjewiła. Policija bě awto wažiła a zwěsćiła, zo je wozydło wo 30 procentow přećežke. Bychu-li zamołwići za awto předpisanu maksimalnu wahu dodźerželi, bychu z nim tež w tutej kurioznej formje dale jěć móhli, policija na naprašowanje zajimcow zdźěli.
To a tamne (23.11.20)
Nic do Bayreutha, ale do Beiruta pósłał je Němski póst domjace dźěło studenta prawnistwa. Póst njemóže sej najebać intensiwne slědźenje rozkłasć, kak móžeše so to stać. Student bě dźěło 2. nowembra na pósće w Bayreuthu wotedał, zo bychu je uniwersiće města pósłali. Dokument pak su w Frankfurće „bohužel wopaki do Libanona dale posrědkowali“. Student bě dźěło dwójce wućišćał a je dokument mjeztym wosobinsce wotedał.
Z nanowym přezpólnym awtom w Gelsenkirchenje smalił je 15lětny. Policistam wóz napadny, jako bě ze 100 kilometrami na hodźinu město dowolenych 50 km/h w nutřkownym měsće po puću. Na signal k zastaću hólčec njereagowaše. Jědźechu tuž za nim a wuhladachu awto skónčnje před šulu stejace. Młodostneho, kiž so w kerku chowaše, přepodachu přiwołanemu nanej.
To a tamne (20.11.20)
Hač snano za nim pytaja, chcyše 21lětny wědźeć, jako so tele dny na policajskej straži w Bochumje přizjewi. Po krótkim naprašowanju móžachu zastojnicy wobkrućić, zo tomu tak je. Přećiwo njemu předleži wukaz zajeća. Padustwa a jězdźenja bjez jězbneho lisćika dla bě jeho sudnistwo k połdra lětu jastwa zasudźiło. Policija muža zaja, njewuzamkujo wšak, zo chcyše sej bjezdomny tepjenu jastwowu celu w zymskim času zawěsćić.
Jako rumpodichojo předrasćeni motorscy skupiny „Harley Davidson riding Santas“ chcedźa so lětsa najebać koronapandemiju zaso na puć podać a pjenježne dary zběrać. „Pojědźemy 6. decembra po 29 městach a gmejnach, wězo z hygienowym konceptom“, zdźěli rěčnik skupiny. Lětsa chcedźa za dźěćacy hospicny skutk zběrać. Jězbu na dnju swj. Mikławša přewjeduja wot lěta 2015.
To a tamne (19.11.20)
130 kokosowych worjechow w běhu 60 sekundow jeno z ruku rozbił je Hamburgčan Muhamed „hamorowa ruka“ Kahrimanović a je tak nowy swětowy rekord nastajił. Po informacijach Němskeho rekordneho instituta w Hamburgu by poprawom 124 worjechow za nowy rekord dosahało. W bojowej šuli, hdźež 61lětny Kahrimanović trenuje, běchu sudnicy 151 worjechow spřihotowali. Zamołwity sudnik spočatnje dwělowaše, hač je móžno dwaj worjechaj na sekundu pačić. Dotalny rekord 123 rozpačenych worjechow je tež wot Kahrimanovića.
W lětadle dźěćo porodźiła je młoda žona w Indoneskej. 50 mjeńšin po wotlěće w měsće Sentani běchu so hrona započeli, rěčnik lětanskeho předewzaća Lion Air zdźěli. Mašina bě po puću na kupu Sulawesi. Mjez pasažěrami přitomny lěkar žonje při porodźe pomhaše. Pilot na přichodnym lětanišću přizemi.
To a tamne (17.11.20)
Při wuchodźowanju z psom je so žona njedźelu w lěsu pola bayerskeho Coburga zabłudźiła. Wona zamó policiju hišće wo tym informować, zo je w błóće tčacy wostała. Na to pak njebě hižo docpějomna. Po wulkej pytanskej akciji nańdźechu zastojnicy žonu hač do brjucha stejacu w błóće wotpušćeneho hata a móžachu ju na zbožo wuchować. Swoju słužbnu drastu wšak po tym hižo wužiwać njemóžachu.
Widejo z mrowjemi, kotrež kaž dźiwje wokoło mobilneho telefona běhaja, je na Facebooku wjele kedźbnosće wubudźił, a to pod hesłom „Widejo pokazuje wjace hač kóždažkuli studija“. Zamóža elektromagnetiske pruhi handyja mrowje tak wobwliwować, zo so w kruhu pohibuja? Po analyzy wideja fachowcy měnja, zo jedna so wo manipulaciju. Tak je filmčk po wšěm zdaću na kompjuteru nastał.
To a tamne (16.11.20)
Kradnjenej čisłowej tafličce swojeho awta wuhladał je muž, jako so wčera po Wolfsburgu wuchodźowaše. Přiwołana policija cuze awto přesćěhowaše a skónčnje zadźerža. Kaž so wukopa, njeběštej jenož tafličce pokradnjenej, ale tež awto, w kotrymž třo mužojo sedźachu. Policija wšitkich zaja. Šofer njeměješe ani jězbnu dowolnosć a steješe nimo toho pod wliwom alkohola a drogow.
Wosrjedź puća sedźacy kołp je njedaloko porynsko-pfalcskeho Bad Kreuznacha wobchad na zwjazkowej dróze B 41 nachwilnje haćił. Wobsadka policajskeho awta spyta podarmo jeho z jězdnje zehnać a dyrbješe tuž pomoc kolegow přiwołać, kotřiž dróhu na to do wobeju směrow zawrěchu. Dokelž dobre přirěčowanje njepomhaše, kołpja skónčnje wotnjesechu. Ptak wšak so chětro wobaraše a do zastojnikow kusaše.
