K zahajenju njedawneje fachoweje konferency 2plus w Chróšćanskej „Jednoće“ běchu starši narěčani, z kubłanjom so rozestajeć. Woni dóstachu dohlad do zakładow wjacerěčneho wuknjenja. Na přednošk prof. Olivera Meyera z Mainzskeje uniwersity běštej Budyski regionalny zarjad­ Sakskeje kubłanskeje agentury a Rěčny centrum WITAJ staršich přeprosyłoj, podać jim fachowu pomoc, kak móža swoje dźěći wjacerěčnje kubłać.

Přednošk profesora njebě specielnje na temu 2plus wusměrjeny. Wo tym njebě wón ani informowany, přiwšěm pak je staršim, kotřiž běchu w nahladnej ličbje přichwatali, dosć dobre zakładne prawi­dła sposrědkował. Poskitk diskusije pak woni jenož mało wužiwachu. Na kóždy pad bě prawje tež staršich sylnišo zapřijeć, dźe-li wo to, zaměrnje rěče wuknyć kaž tež kompetency dźěći skrućić. Diskusiju pozbudźiła by zawěsće něšto wobšěrniša informacija wo wobsahu a zaměrje přednoška hižo do toho.

Matematiku lóšo wuknyć

Lipšćanski Institut za sorabistiku je wudał material předewšěm za tych, kotřiž maja w zjawnosći, to rěka před publikumom serbsce rěčeć. Prof. Edward Wornar rěči ze zahoritosću wo tym, kak online-poskitk zmóžnja sej serbske słowa fonetisce wotkryć a wotpowědnje wužiwać. To je chwalobne, wosebje, dokelž je so studentska pomoc profesora na nadawk zwažiła. Při­wšěm kritika na nawodźe samym w internetnych medijach njepřestawa, dokelž sam lědma wědomostnje publikuje. Je to prawje? Kaž Wornar přeradźi, wuńdźe bórze dalši zwjazk w rjedźe literatura w serbskej rěči wo pućowanju Guliwera. Wudaće delnjoserbskeho katechizma porno tomu dyrbi hišće čakać. Klětu chce přewjesć konferencu­ wo ewaluaciji delnjoserbšćiny w šulach Delnjeje Łužicy a chce so ze studentami na studijnu jězbu podać. Wědomostne publikacije wšak dale paruju. Tajke­ bychu zawěsće mnohich zajimowali. Milenka Rječcyna

Chrósćicy (CK/SN/MiR). Zo bychu šulerjo posrědkowanu wědu tež pozdźišo nałožować móhli, je wažne wobstajnje wuknyć a jenož fakty dale njedawać. Na kotre wašnje hodźa so nimo toho koncepty, dźěłowe metody a strategije systematisce we wučbje posrědkować, to rozjasni prof. dr. Oliver Meyer sobotu na „fachowym dnju 2plus“ w Chrósćicach. Wučer za geografiju a jendźelšćinu kaž tež profesor za jendźelsku didaktiku na Uniwersiće Mainz rozkładowaše metody pohłubšowaceho wuknjenja na přikładźe přirodowědnych předmjetow, mjez druhim z přihotom laboroweje rozprawy. „Princip móhł so runje tak za rěče nałožić“, wón rjekny. Pohłubšace wuknjenje ma po jeho wuprajenjach štyri dimensije: fachowu wědu posrědkować, zwólniwosć k wuknjenju wuwabić, zrozumjenje sylnić a wuknjenske procesy přewodźeć. „Šulerjo, kiž so derje nječuja, kotřiž so wučerja abo zmylkow boja, njebudu tak aktiwnje wobdźěleni kaž dźěći, kotrež so wěste čuja“, prof. Meyer podšmórny. Dźěći rědšo zwrěšća, hdyž su systematisce podpěrane, tež hdyž je dosć naročne wšitke štyri dimensije zwoprawdźić.

Zaběraja so z tworjenjom Jurja Brězana a wliwom na swoje žiwjenje

Horni Hajnk (SN/MiR). Kamjenska župa „Michał Hórnik“ ma do swojeho dźěłoweho plana zapřijate, posrědkować wědu wo stawiznach a přitomnosći łužiskich Serbow. W tymle wobłuku dźěłaja čłonojo župy wosebje z dźěćimi a młodostnymi, posrědkujo jim duchowne a kulturne herbstwo wótčincow, kiž su w regionje župy skutkowali. Runje tak zapřijeja dźensa tam na dobro Serbow skutkowacych wobydlerjow.