Budyšin (SN/MiR). Za durjemi žurle Serbskeho domu a biblioteki Rěčneho centruma WITAJ w Budyšinje knježi wulka ćišina. Njewšědne to začuće, wšako su prózdniny a za durjemi přebywaja dźěći. Samo jako Bianka Rachelic rumnosć wopušći, šćebotanje słyšeć njeje. Nawopak, dźěći, kotrež dožiwja na ferialnym kursu RCW wosebity serbskorěčny rum, wěnuja so z wulkej koncentraciju swojim nadawkam. Bianka Rachelic a Lydija Matikec studujetej na Lipšćanskej uniwersiće wučerstwo, Bianka za gymnazij a Lydija za wyšu šulu. Runja jimaj wuwučuje na kursu RCW Christiana Bukec, kotraž studuje wučerstwo za zakładnu šulu na Drježdźanskej Techniskej uniwersiće. Wšitke tři wěnuja so dźěćom wot 1. do 6. lětnika, kotrež zaběraja so wot wčerawšeho hač do pjatka z tym, so w serbskej rěči wukmanjeć a ju dožiwić. Za to su přichodne wučerki zhromadnje z Michaelu Hrjehorjowej, kotraž je ze stron RCW za projekt zamołwita, wotpowědny program přihotowali. Dwójce je so wona do toho ze studentkami zetkała a jim koncept kursa předstajiła.
Budyšin (MaU/SN). Na lětušim 18. čitanskim wubědźowanju Rěčneho centruma WITAJ minjenu sobotu na žurli Serbskeho muzeja Budyšin wobdźělichu so wosom šulerkow a sydom šulerjow 3. lětnika. Někotři běchu so na swojej šuli w castingu přesadźili, a tak z podpěru wučerja abo wučerki kaž tež doma ze staršimi zwučowali. Druhim běchu wučerjo poručili so přizjewić a so na wubědźowanje přihotować. Wurisanje dobyłoj staj z rjadu dźewjeć serbskich wobdźělnicow/kow Paul Čuška z Worklec a z rjadu šesćoch, kotřiž serbšćinu wuknu, Helena Piwarcec z Wojerec. Měritka, po kotrychž jury, kotrejž přisłušachu Manuela Smolina, Sylwija Wjeńcyna, Ludmila Wićazowa, Janina Mikławškowa a Lucijan Kubica posudźowaše, njeběchu připosłucharjam wozjewili.