Štó je normalny?
Trěbne su kubłarki a kubłarjo
W Delnjej Łužicy bychu rady měli wjace kubłarkow a kubłarjow, kotrež dźěći w delnjoserbskej rěči kubłuja. Tuchwilu je jich něhdźe połsta, kotrež w dźěćacych dnjowych přebywanišćach, w žłobikach, pěstowarnjach a hortach skutkuja.
Žadaja sej podpěru za frizišćinu
Zjawny list organizacijow a wučerjow krajnemu knježerstwu na sewjeru
Flensburg (SN). Ze zjawnym listom su friziske organizacije kaž tež wučerki a wučerjo na prekerne połoženje nastupajo wučbu frizišćiny w sewjernej Friziskej skedźbnili a žadaja sej wot politiki konkretnu podpěru za wutwar poskitka frizišćiny na šulach. Hižo w měrcu běchu eklatantne njedostatki składnostnje wopyta poradźowaceho wuběrka Europskeje rady tematizowali.
Ličba frizišćinu wuknjacych dźěći w sewjernej Friziskej je minjenej lětdźesatkaj wo połojcu woteběrała. Frizišćinu poskićuja wokomiknje na přewšo niskim niwowje přewažnje na zakładnych šulach a w dobrowólnych dźěłowych zjednoćenstwach zwonka šule. Pobrachowace móžnosće, přemało wučerkow a wučerjow kaž tež falowace koordinaciske městno k wobstaranju wučbnych materialow problematiku hišće zesylnjeja.
Hižo tři epizody wozjewjene
Drježdźany (SN/JBo). „Serbsce po puću“ je aktualny projekt Daniela Matki a jeho přećelki Joane, kotrajž bydlitaj w Drježdźanach. „Cil našeho projekta je, swójski campingowy mobil wutwarić a proces ze serbsko-němskimi widejemi přewodźeć.
Ideja, kotraž so za tym chowa, je z wotměnjawym, filmowym materialom zdobom wuknjenje serbskeje rěče takrjec wolóžić“ tak Daniel Matka, kiž je mjez druhim tež znaty přez nawod hudźbneho projekta Madstep. Załožba za serbski lud aktiwity rodźeneho Lejnjana z cyłkownje 9 000 eurami spěchuje. Wideja wozjewjataj Daniel a Joane krok po kroku na internetnej platformje YouTube. Dotal staj hižo tři epizody přetwara swojeho campingoweho mobila zjawnosći spřistupniłoj.
Z naročnymi filmami kubłać
Wjace hač 23 000 šulerjow a šulerkow póndu tutón tydźeń bjezpłatnje do kina. W 46 sakskich kinach wotměwaja so šulske kinowe tydźenje. Z něhdźe 300 do 400 wšelakich filmow pokazuja hišće hač do 20. meje w Budyšinje wosom.
Budyšin (SN/MiR). Film z francoskim titulom „Je suis Karl“ režisera Christiana Schwochowa bu w lěće 2021 prěni króć zjawnje předstajeny. Na wšelakich filmowych festiwalach bu wjacekróć nominowany a mytowany. Dowoleny je film za dźěći wot dwanaće lět, poručeny pak je wot 16 lět. Wobsahi su dosć naročne a zaběraja so mjez druhim z temami prawicarski terorizm, radikalizm, ekstremizm, prawicarski populizm, propaganda, namóc, nowe prawicarske hibanje a rěč. W filmje zhonimy wo tym, na kotre wašnje zdobudu ideologojo swojich přiwisnikow. Swój finale ma wón ze zatřělenjom Karla, jednoho z hłownych akterow, z toho wurostu naposledk zběžki, kotrychž namóc so předewšěm přećiwo pozdatnym cuzym měri.
Čitarjam Płomjenja stej comicowej přećelej „Feliks a Florian“ ...
Z informaciskim materialom, rozmołwami a małym dźěćacym ...
Maja wulki zajim studować
Drježdźany (dpa/SN). Dotal zajimowaše so 3 150 ukrainskich ćěkancow za studij w Sakskej. Cyłkownje 1 650 z nich chce studij zahajić, dalšich 1 500 chce swoje w Ukrainje zahajene wukubłanje w swobodnym staće pokročować, zdźěli wčera sakske wědomostne ministerstwo w Drježdźanach. Ličby wobsahuja tež žony a muži z druhich krajow, kotřiž su w Ukrainje studowali a nadpada Ruskeje dla swoje wukubłanje přetorhnyli. Saksku kampanju pod hesłom „Zmištruj swój studij“ su mjeztym na ukrainskich ćěkancow rozšěrili, tak zo dóstawaja ći lóšo přistup k sakskim wysokim šulam.
Po informacijach sakskeho wědomostneho ministra Sebastiana Gemkowa (CDU) je wjele wysokich šulow swój požadanski čas podlěšiło a swoje popłatki za hosći wotstroniło. Sakski Agricola-studij, kotryž měri so předewšěm na zajimcow ze susodneju Pólskeje a Čěskeje, su mjeztym tež na Ukrainjanow rozšěrili. Dale skedźbni Gemkow na projekty, kotrež potrjechenym pomhaja němsce nawuknyć. „Najmjenje Ukrainjanow němčinu wobknježi a samo z jendźelšćinu je ćežko“, minister wujasni.
