Zwiski mjez partnerskimaj gmejnomaj Chósćicy we Łužicy a Leśnica w Pólskej su koronapandemiju přetrali. Tón tydźeń je so zetkanje šulerjow partnerskeju šulow w Chrósćicach wotměło.

Chrósćicy (SŠ/SN). Po słowjanskej tra­diciji witachu šulerjo Chróšćanskeje Serbskeje zakładneje šule „Jurij Chěžka“ skupinu šulerjow a wučerkow z pólskeje Leśnicy z chlěbom a selu. Wottam běchu sej póndźelu připołdnju štyri wučerki a 36 šulerjow 4., 5., 6. a 8. lětnika do Łužicy dojěli, w Pólskej maja na zakładnej šuli 1. do 8. lětnik. Wotpohlad zetkanja běše, wobstejace styki skrućić a nowe ­nawjazać. Po witanju ze spěwom a basnju je sej 16 pólskich dźěći hromadźe ze šulerjemi 4. lětnika z Chrósćic do zelo­weje zahrody klóštra Marijina hwězda w Pančicach-Kukowje dojěło. Wikar Tomaš Dawidowski je jim w pólskej rěči klóšter předstajił. Zdobom su wužili składnosć, změšeć zelowu sel a butru, a sej z tym pomazanu a poselenu pomazku zesłodźeć dali.

Wojerowska měšćanska biblioteka „Brigitte Reimann“ zahaji projekt pod hesłom „Wotewrjena dźěłarnja za demokratiju“. Wobsahowe ćežišća maja być wobydlerstwo, interkulturalita, medijowa kompetenca a digitalizacija kaž tež strukturna změna.

Wojerecy. (AK/SN). Projekt, kotryž spěchuje Sakske statne ministerstwo justicy a za demokratiju, Europu a runostajenje z programa „Městnosće demokratije“, ma trać do kónc lěta 2024. Wojerecy su jedna z 13 městnosćow w Sakskej, hdźež tajku dźěłarnju zarjaduja. „Zaměr je, mnohe městnosće demokratije wutworić. Trjebamy wotewrjenosć“, potwjerdźi statna sekretarka dr. Gesine Märtens z ministerstwa zańdźenu srjedu na zahajenju projekta we Wojerecach. Partnerojo su město, Kulturny zwjazk, Regionalne dźěłanišćo za kubłanje, demokratiju a perspektiwy žiwjenja (RAA), ludowa uniwersita, Kulturna fabrika, kompjuterowy muzej Konrad Zuse, Domowina a Krabatowy młyn Čorny Chołmc kaž tež młodźinska měšćanska rada a młodźinski klub Ossi.

Slepo (CK/SN). Hort Němsko-serbskeho šulskeho centruma w Slepom ma wotnětka swójske mjeno. Minjeny pjatk staj Slepjanski drjeworězbar Tomas Schwarza a rěčnica Domowiny za Slepjanski region Diana Maticowa zhromadnje z dźěćimi we wobłuku swjatočnosće w sportowej hali banćiki při skulpturje „Błudnički“, kotraž njedaloko zachoda do horta přichadźacych wita, roztřihałoj. Něhdźe ­štyri metry wysoka postawa je zdobom dźesata stacija serbskeje šćežki powědkow, kotraž tuchwilu w Slepom nastawa. Na płoće šulskeje ležownosće ma za něšto tydźenjow slědować tafla. Tak móža so tež wonkowni zajimcy wo błudničkach informować.

Zhromadnje z dźěćimi podachu so kubłarjo a kubłarki do swěta powědkow a počachu so za błudnički zajimować. Fosforeskowace swětleška wodźa ludźi po bahnu. „Runje tak chcemy tež my być dźěćom pokazowaki, chcemy jim być ­poboku pomocliwi a wobchad połny mjezsobneho respekta pěstować“, rjekny Christin Becker.