Budyšin (SN/bn). Druhi tydźeń zymskich prózdnin bě tež lětsa Budyskej powołanskej akademiji (BA) składnosć, swoje poskitki šulerkam a šulerjam resp. wučomnicam a wučomnikam we wobłuku proboweho studija prezentować. Wobdźělnicy mějachu składnosć so z jednotliwymi fachowymi směrami zeznajomić, čitanja wopytać, so z docentami kaž tež ze studentami rozmołwjeć a so w laborach kubłanišća wědomostnej praksy wěnować. Zaměr „tydźenja počuchanja“ – tak probowemu studijej tež rěkaja – je, „ewentualnje hišće njerozsudźenym šulskim wotchadnikam móžne puće do powołanja a wukubłancam opcije dalšeje kwalifikacije pokazać“.

Smjerdźaca (aha/SN). Poskitk Serbskeho šulskeho towarstwa, zo móhli dźěći zhromadnje ze staršimi w zymskich prózdninach hornčerić, bu tele dny derje při­wzaty. Cyłkownje 16 dźěći bě so rozsudźiło zhromadnje z maćerju abo wowku sej zakładne kmanosće hornčerjenja přiswojić. Projektowa sobudźěłaćerka SŠT Monika Süßowa so wo to postara, zo móžachu sej wobdźělnicy w dwěmaj skupinomaj z bruneje hliny jutrownu pychu hornčerić, kaž zaječka, ćipki, čajowe swěčniki a dalše wudźěłki.

Nazhonita keramikarka Marion Sperlingowa ze Smječkec, kotraž hižo wjacore lěta hornčerske kursy za dorosćenych a dźěći w Ralbičanskej, Chróšćanskej a Worklečanskej šuli wuspěšnje nawje­duje, je spěšnje zamóhła wobdźělnikow z přećelnym posměwkom a słowom připóznaća za hornčerske dźěło zahorić. Z jeje pomocu a podpěru měješe kóždy mały hornčer na kóncu darik w rukomaj. Zo móhli swoje wudźěłki tež wotpowědnje wužiwać, pak dyrbja wone nětko najprjedy porja­dnje schnyć. Potom budu jednotliwe keramiske dźěle w specielnych kachlach dwójce palene, zo bychu krute dosć byli.

Smjerdźaca (aha/SN). Zo w Smjerdźečanskim kulturnym domje znata rejwanska skupina ze wsy prawidłownje a wobstajnje zwučuje – dalokož je to nastupajo koronapandemiju scyła móžno –, je daloko a šěroko znate. Prawidłownje bu tež wo dźěle Serbskeho kubłanskeho srjedźišća LIPA w Smjerdźacej rozprawjane a zo su tam tohorunja rejwanske kursy poskićeli. Runje tele poskitki stajnje dobry wothłós žněja. Serbske šulske towarstwo (SŠT), kotrež je mjeztym dźěłowe wobłuki LIPY přewzało, je tuž na to nawjazujo znowa tajki poskitk wupisało.

Minjenu póndźelu zetka so tam nětko druhi raz dźesać holcow. SŠT bě so wo profesionalne nawodnistwo noweho rejwanskeho kursa w Smjerdźacej postarało. Wjelelětnemu rejwarjej Serbskeho ludoweho ansambla a pozdźišemu baletnemu mištrej Kornelej Kolembusej je bywša rejwarka SLA Julia Kasyan poboku. Před 22 lětami přińdźe wona z Ukra­i­ny do Němskeje a skutkowaše dźesać lět w Serbskim ludowym ansamblu. Tuchwilu dźěła jako chorobna sotra w ambulantnej słužbje Carity, we wólnym času pak wěnuje so wšelakim zaběram z dźěćimi.

Cyle jednorje: Je wulkotna wěc, zo skutkuje Choćebuske Dźěłanišćo za serbske kubłanske wuwiwanje (ABC) mjeztym na dobro delnjoserbšćinu wuknjacych wšitkich generacijow. Započejo z tym, zo běchu pod nawodom Pětša Janaša wuknjenske materialije zdźěłali, staraše so wón zhromadnje z jeničkej sobudźěłaćerku wo to, spjelnić wočakowanja na jónkrótnu instituciju.

A z problemom so hač do dźensnišeho bědźa. Nadawki wšak su w Delnjej Łužicy trochu hinaše. Přetož tam maćernorěčnych rěčnikow hižo w tak wulkej ličbje nimaja kaž w našich kónčinach. Tak njebě spočatnje lochko fachowcow namakać. A dźensa? To drje maja mjeztym mnohich, kotřiž delnjoserbšćinu wobknježa, tola wo ličbu personalnych městnow wojuje po nawodźe ABCja dr. Frycu Libje nětko tež dr. Christiana Piniekowa. A jeli informacije z ABCja dokładnje čitam, rozumju, zo budźe tomu zawěsće tež přichodnje tak, hdyž změja tam za dwě lěće noweho nawodu abo nowu nawodnicu. Milenka Rječcyna