Budyšin (SN/bn). Dźeń wotewrjenych duri ma najwšelakorišim institucijam předewšěm zmóžnić, zajimcow wo swojich poskitkach informować. Tež Budyska wokrjesna hudźbna šula bě tajke zarjadowanja prawidłownje wuhotowała. Lětsa pak njeby so kubłanišćo postajenjow pandemije dla w zwučenym ramiku prezentować móhło. Tohodla zdźěłachu dospołnje nowy koncept a su swoje wrota zajimcam minjeny pjatk na ryzy digitalne wašnje wotewrěli.

Za zjawnostne dźěło hudźneje šule zamoł­wita Margitta Luttner wjedźeše wirtuelnje po jednotliwych wotrjadach a rozłoži wobdźělnikam cyłotnje zapo­łoženy pedagogiski poskitk. „Z tak mjenowanym zažnym kubłanjom měrimy so na dźěći wot dweju lět, štož twori wuchadźišćo za pozdźiše kroki wot indiwidualneje abo skupinskeje wučby na instrumentach, reje abo wědy wo hudźbje. Nimo toho šulerjam poskićamy so w rozdźělnych ansamblach, kaž na přikład w dujerskich kwartetach, chórowych cyłkach abo z našej bigband tež před publikumom wuspytać.“

Na Wysokej šuli sakskeje policije w Rózborku a Budyšinje su wobšěrne twarske dźěła za lěpše studijne wuměnjenja zahajili. Tu pak wo wjele wjace wobnowjeja.

Ralbicy (SN/MiR). Po přikazu karanteny w kuchni Ralbičanskeje šule staraja so druhe předewzaća wo wobjed w šulach a dźěćacych dnjowych přebywanišćach. Chróšćanska zakładna šula „Jurij Chěžka“ kaž tež pěstowarnja „Chróšćan kołć“ dóstawatej wot dźensnišeho hač do 10. junija wobjed z Budyskeho předewzaća Laola. Jědź wuzwolić sej dźěći resp. starši njemóža, a skazanka po dnjach tež móžna njeje. Za Ralbičansku zakładnu šulu Nowosličanske Dinarjec catering-přede­wza­će wari. Dale wozy wone tež jědź do Smjerdźečanskeho žłobika a do Ralbičanskeje pěstowarnje „Dr. Jurij Młynk“. „Bohužel su so ze stron šule trochu pozdźe na nas wobroćili. Tak móžemy jim wobjed hakle wot jutřišeje srjedy po­ski­ćeć“, rjekny na naprašowanje mějićel předewzaća Ludwig Dinar. Do Worklečanske­ho dźěćaceho dnjoweho přebywanišća „K wódnemu mužej“ Scharfec předewzaće z Pančic-Kukowa wobjed wozy. Starši maja na dźeń 2,50 eurow za jednu porciju zapłaćić. Wot 9. junija, tak je tuchwilny plan, chcedźa w Ralbičanskej kuchni zaso warić a mjenowane kaž tež dalše kubłanišća wšědnje z wobjedom zastarać.

Choćebuz (SN). Statny šulski zarjad Choćebuz je minjenu póndźelu dźěl projektowych sobudźěłaćerjow Dźěłanišća za serbske kubłanske wuwiće (ABC) wotćahnył, zo bychu woni na Delnjoserbskim gymnaziju mjez druhim skupinsku wučbu w němčinje a jendźelšćinje zawěsćili. Wo tym je načolnica ABC dr. Christiana Piniekowa wčera medije informowała.

Byrnjež tomu kubłanske ministerstwo w Podstupimje hač do kónca šulskeho lěta přihłosowało, „njebě krok ani přihotowany a wothłosowany z wobdźělenymi“, dr. Piniekowa porokuje. Tež po braniborskim šulskim zakonju předpisane přepruwowanje naležnosće wona paruje.

ABC spjelnja nadregionalne nadawki, kaž wučbne a wuwučowanske srědki wuwiwać a wudawać. Z wotćehnjenjom personala njemóža tam 40 procentow projektoweho dźěła dale wjesć. Tak bu natwar online-platformy njejapce přetorhnjeny, na kotrejž maja wučerjam serbšćiny a bilingualneje wučby digitalne wučbne materialije k dispoziciji być. Model, projekty z přidatnymi wučerjemi ze šulow wobdźěłać, je so jako suboptimalny wopokazał, kaž ABC informuje.