Slepo/Budyšin (CK/SN/MiR). Wot wčerawšeho su wotchadne lětniki w Sakskej zaso w šuli. Na Wyšej šuli „Dr. Marja Grólmusec“ Slepo je jich 46 šulerjow w dwěmaj rjadownjomaj dźesateho kaž tež w jednej rjadowni 9. lětnika. Jich wuwučuja w pjeć skupinach. Prěnju hodźinu měješe Marcel Rjelka w předmjeće towaršnowěda z dźesać šulerjemi rjadownjow 10 a / 10 b. Fachowy wučer wšak zwěsći, zo dyrbi wšitkich porjadnje motiwować. Tak wón wuknjacym připowědźi, zo změja po tydźenjach domjaceho wuknjenja bórze wukonowu kontrolu pisać.

Šulerjo wotchadnych lětnikow chodźa zaso do šule. Nětko maja dopokazać, hač a što su doma wuknyli. Prěnje dny wjeselo nad tym přewažuje, zo maja skónčnje direktny zwisk. Nadźijomnje změja nětko trajnu móžnosć, zhromadnje wuknyć. Jednu šansu na to skića šulerjam kaž tež wučerjam dobrowólne testy na koronawirus. Wo wobdźělenju su za nich starši kaž tež šulerjo, hdyž su starši hač 18 lět, rozsudźili. Njetrjebamy tuž wo tym diskutować, hač by trjeba było šulerjow najprjedy testować dać a jim potom hakle dowolić so na wučbje w šuli wobdźělić. Wšako nětko wěmy, zo je so jenož něhdźe třećina šulerjow ze serbskich šulow wčera abo dźensa dobrowólnje na koronu testować dała. Argument, zo měli njetestowani šulerjo dale doma wuknyć, je tuž bjez zmysła. Kelko by jich potom w šuli było? Wostanje nadźija, zo njetrjebaja šulscy wotchadnicy znowa doma wostać, dokelž maja mjez sobušulerjemi na koronu schorjeneho, kiž to ani njewě. Milenka Rječcyna

Budyšin (SN/JaW). Přichodnu póndźelu móža so šulerki a šulerjo wotchadnych lětnikow kaž tež jich wučerki a wučerjo serbskich šulow bjezpłatnje na koronawirus testować dać. Kaž sakske ministerstwo za kultus zdźěli, započnu póndźelu na wšitkich sakskich šulskich kubłanišćach wotchadne lětniki zaso wuwučować. „Testy su dobrowólne, winowatosć so testować dać njewobsteji. Při­wšěm bych sej přał, zo so prawje wjele wuknjacych a wučacych testować da – k swójskemu škitej, ale tež k škitej druhich. Testy měli zdobom zaručić, zo po dołhim času lockdowna jeno strowe wosoby do šulow přichadźeja. Jasne pak tohorunja je, zo mamy zakładne prawidła hygieny nuznje dale dodźeržeć“, praji kultusowy minister Christian Piwarz (CDU).

Ludmila Budarjowa so po 30 lětach skutkowanja jako předsydka Serbskeho šulskeho towarstwa rozžohnuje

Jedne ze załoženych towarstwow po měrliwej rewoluciji a wot 5. januara 1991 hač do dźensnišeho wuspěšnje skutkowacych je Serbske šulske towarstwo (SŠT). Milenka Rječcyna je so z Ludmilu Budarjowej, kotraž běše tři lětdźesatki jeho­ předsydka, rozmołwjała.

Što su dźensniše ćežišća skutkowanja SŠT? Wšako je towarstwo w zjawnym zrozumjenju často „jenož hišće“ nošer dźěćacych dnjowych přebywanišćow?

L. Budarjowa: W našich kubłanišćach posrědkujemy něhdźe 600 dźěćom serbšćinu. Z nimale telko staršiskimi domami wudźeržujemy běžny kontakt, a tak smy w zjawnosći na tym polu bóle prezentni. Naš hłowny nadawk njeje so wot załoženja towarstwa změnił: serbsku rěč pěstować, zachować a ju dale wuwić. Stara­my so wo dorost kubłarkow/ku­bła­rjow a wučerjow/wučerkow, wo zakonske zaručenje posrědkowanja serbšćiny na šulach a kubłanišćach, wo lěpše wuwučowanske wuměnjenja a dalše. Dźěło ze staršiskimi iniciatiwami a přiradami chce SŠT w přichodźe hišće zesylnić.