Drježdźany (SN/JaW). „Žana hišće tak dobra distancna wučba prezencnu njenaruna“, měni sakski kultusowy minister Christian Piwarz (CDU), a je tuž plan předpołožił, z pomocu kotrehož chcedźa „dźěry wědy a kompetencow wuknjacych zapłatać“. Wo tym pisa ministerstwo w nowinskej informaciji. „Wospjetne zawěranja kubłanišćow šulerki a šu­lerjow jenož psychisce njepoćežuja, ale wjedu zdobom k njedostatkam wědy a kompetency. Za to drje dźěći zamołwite njejsu, wone pak su ći bići pandemije“, Piwarz wuswětla.

Kaž ze zdźělenki a wozjewjenja ministerstwa wuchadźa, złožuje so plan na tři zakłady. Prěni tajki je wuknjenske deficity zwěsćić, dalši je ćežišća sadźeć a třeći je swobodne rumy we wuwučowanskich planach tworić a tak móžnosće skićić zakomdźene nachwatać. „Plan smy ze šulskimi direktorami a wučerskimi zwjazkami kaž tež z krajnej staršiskej a šulerskej přiradu rozjimali“, zdźěli nowinski rěčnik kultusoweho ministerstwa Dirk Reelfs.

Budyšin/Wojerecy (SN/bn). Wokrjesna hudźbna šula Budyšin je wučbu na městnje za jednotliwcow znowa zahajiła. Wot wčerawšeho móža dźěći a młodostni wjetšinu regularneho poskitka – wuwzatej stej skupinska wučba a předšulske hudźbnopedagogiske kubłanje – w sprjewinym měsće kaž tež w Kamjenskej wotnožce kubłanišća zaso wužiwać. To pak pod wuměnjenjom, zo krute předpisy hygieny dodźerža. Tak dyrbja šulerjo w starobje wot sydom lět do hodźiny pisomne wobkrućenje negatiwneho koronatesta, nic staršeho hač 24 hodźin, předpołožić. Nimo dokumenta, kajkiž wotpowědne centrumy a lěkarnje bjezpłatnje wudawaja, akceptuje šula tež wot staršich wupjelnjeny a podpisany formular, kiž hodźi so z internetoweje strony www.kreismuskischule-bautzen.de/aktuelles dele sćahnyć. Su-li wuknjacy hižo po za powšitkownokubłace šule płaćiwych kriterijach testowani, dosaha w tym zwisku wustajene wopismo.

Miłoćicy (SN/JaW). Křesćansko-socialny kubłanski skutk (CSB) je w minjenych pjeć lětach 90 kubłarkow a kubłarjow přistajił. Z nich bě 23 Serbow. To zdźěli rěčnik CSB Maik Brězan na naprašowanje. Narěčany na wjacore změny personala w běhu krótkeho časa wón zwurazni, zo we wjetšinje zarjadnišćow CSB personal hižo mnohe lěta dźěła. „Minjene lěta smy wjacore wjednicy na wuměnk rozžohnowali a městna znowa wobsadźili.“

Tuchwilu maja w 15 zarjadnišćach CSB dosć kubłarkow a kubłarjow. Perso­nalne změny pak mějachu přede­wšěm w Njebjelčicach, kaž SN z wjacorych žórłow zhonichu. Wjeršk je, zo derje wukubłana młoda serbska kubłarka hižo w Njebjelčanskej pěstowarni „Jan Skala – Barbojte kamuški“ njedźěła, štož mjez staršimi wulke zadźiwanje a zdźě­la hněw zbudźi. Zo wjac za CSB njedźěła, je nam kubłarka wobkrućiła. CSB so škita datow a wosobow dla njewupraji. Tež wo tym, čehodla su derje wukubłanu serbsku pěstowarku hić dali, CSB mjelči.

Što to dyrbi? Na jednym boku sej politikarjo mjeztym w dwanaće zwjazkowych krajach žadaja, zo maja so šulerjo dwójce wob tydźeń sami na koronu testować. Mjez nimi su nětko tež ći ze zakładnych šulow. Na tamnym boku je so němski hospodarski minister Peter Altmeier (CDU) dołho wobarał, zo dyrbja předewzaća swojim sobudźěłaćerjam winowatostny test přicpěwać. Tež mnozy dźěłodawarjo to činja. Prašam so, čehodla protestuja? Kajki je rozdźěl k šulam, hdźež su sej runja předewzaćam ludźo bliscy? Su to w firmach minuty dźěłoweho časa, kotryž testowanja dla zhubja? Abo su to pjenjezy za test, kotrež šulerjam stat přewostaja, přede­wzaća pak měli je same zapłaćić? Ja wšak měnju: Přede­wzaćeljo maja zamołwitosć za swojich sobudźěłaćerjow, kotřiž hódnoty tuchwilu nadźěłuja. Kultusowe ministerstwa maja ju za šulerjow, kotřiž su přichodne lěta předewzaćam perspektiwa. Sym tuž za samsne prawa a winowatosće za wšitkich! Milenka Rječcyna