Na zmysłapołnosći naprawy, zasadźić w šulach přidružnikow, lědma hižo něchtó dwěluje. Wuhotowanje pak njeje dotal wšitke přeća spjelniło. Wo tym su wčera w Budyšinje zapósłancy Sakskeho krajneho sejma diskutowali.
Budyšin (UM/SN). „Wumóža nas přidružnicy?“ Po měnjenju Petry Zais hodźi so na prašenje lochka wotmołwa namakać. „Trjebamy přidružnikow, zo móhli wšědne dźěło na šulach po cyłej Sakskej zaručić.“ Zhromadnje z kolegami frakcijow CDU, SPD a Lěwicy diskutowaše kubłanskopolitiska rěčnica frakcije Zwjazka 90/Zelenych krajneho sejma wčera nawječor wo pućach z wučerskeje mizery.
Budyšin (SN/MiR). Nětko je jasne, kotre wyše šule a gymnazije w zjawnym nošerstwje změja wot šulskeho lěta 2018/2019 kelko šulerjow. Budyski regionalny zarjad krajneho zarjada za šulu a kubłanje (LaSuB) je wotpowědne lisćiny wozjewił. List, w kotrymž je zapisane, hdźe budu dźěći přichodnje dale wuknyć, su šulscy nawodźa staršim rozesłali. Kónc zańdźeneho tydźenja su starši list dóstali.
Na Serbskim gymnaziju Budyšin wutworja w 5. lětniku dwě rjadowni z cyłkownje 42 šulerjemi. Na Wojerowskim Lessingowym gymnaziju chce wot noweho šulskeho lěta 85 nowych šulerjow wuknyć, wjacori z nich změja tež serbšćinu.
Jenož hišće někotre tydźenje traje, a za šulerjow Sakskeje zahaja so lětnje prózdniny. Mnozy nošerjo přihotuja poskitki. Mjez nimi tež někotři, zapřijacy serbske dźěći a młodostnych.
Biskopicy (SN/MiR). Biskopičanska Syć za dźěło z dźěćimi a młodźinu (KiJu) je za lětuše prózdniny zaso poskitki při Němskopazličanskim haće přihotowała. Lěhwje za dwanaće- do 15lětnych, kotrejž wusměrjatej so na přirodu, sport a kreatiwitu, běštej hižo bórze po wozjewjenju wuknihowanej. Za dźěćacej, pjeć dnjow trajacej campaj wot 10. do 14. julija a wot 24. do 28. julija, orientowacej so na wobdźělnikow w starobje šěsć do dźewjeć lět, su hišće někotre městna swobodne.
Radwor (SN/BŠe). Woda je najdrohotniša surowizna cyłeho swěta a bjez njeje njemóža ludźo eksistować. Wo tym zhonichu minjene tři dny chowancy Radworskeje zakładneje šule „Dr. Marja Grólmusec“. Pod hesłom „woda je žiwjenje“ přewjedźechu tam předmjety přesahowacu wučbu. „W sporće, němčinje, wěcnej wučbje kaž tež w matematice bě woda tema“, rozkładźe nawodnica kubłanišća Angela Rynčowa. Hižo spočatk šulskeho lěta běchu šulerjo wšelake temy za projektne dny namjetowali. Nazymu zaběrachu so ze srjedźowěkom. Ćopłemu počasej hodźace so hesło woda bě potajkim nětko na rjedźe.
Drježdźany (SN/MiR). Starši kaž tež kubłarjo a nawodźa dźěćacych dnjowych přebywanišćow přeja sej wjace personala w dźěćacych dnjowych přebywanišćach. To wuchadźa z wuslědka naprašowanja sakskeho ministerstwa za kultus. Starši su zwoprědka za wjace personala za swoje dźěći hłosowali. Nawodźa a kubłarjo stajichu wjetšu ličbu personala nimale na samsnu runinu z tym, měć wjace chwile za přihot a wuhódnoćenje dźěła z dźěćimi. To woznamjenja, zo přeja sej wšitcy lěpšu kwalitu kubłanja w zažnym dźěćatstwje. Tak maja žłobiki, pěstowarnje a horty wjace personala měć. Fachowa přirada za naprašowanje poruča wobłuk přihot a wuhódnoćenje pedagogiskeho dźěła z najmjeńšimi zakótwić do zakonja wo dźěćacych dnjowych přebywanišćach.
Sakski kultusowy minister Christian Piwarz (CDU) připraji wčera na předstajenju wuslědkow naprašowanja w Drježdźanach, zo měli wuslědk do dwójneho etata 2019/2020 zapřijeć. Na naprašowanju bě so 36 523 wosobow, starši, kubłarjo a kubłarki a nawodźa dźěćacych dnjowych zarjadnišćow wobdźěliło.
Slepjanska młoda wosada pokaza swjatki póndźelu dźiwadło w němskej rěči wo serbskim fararju Bohuměru Rejslerju (1902–1968), kotrehož běchu nacionalsocialisća wuhnali.
Slepo (AK/SN) „Jako čłon wuznawarskeje cyrkwje wosta wón swojim přeswědčenjam swěrny. Bohuměr Rejsler, kotrehož su nacionalsocialisća 11. apryla 1938 ze Slepoho wupokazali, běše do 1945 posledni serbskorěčny farar Slepjanskeje ewangelskeje wosady“, rozjasnja dźiwadłowy pedagoga Matthias Seidel. Wot spočatka januara hižo wuwiwa wón z młodej wosadu dźiwadłowy kruch „To wčerawše je dźensniše jutřišeho“.
Drježdźany (dpa/SN/MiR). Nowy bonus za serbskorěčnych požadarjow wo studij wučerstwa njesu dotal na sakskich uniwersitach nałožowali. Wot lěta 2017 wobkedźbuja po sakskim zakonju wo přizwolenju wysokošulskeho studija (Hochschulzulassungsgesetz) pohłubšene znajomosće serbšćiny za wšitke předmjety, nic jeno za serbšćinu. Dotal wšak su rěčne kmanosće jeničce při požadanju jako wučer serbšćiny wobkedźbowali.
Kaž naprašowanje Němskeje powěsćoweje agentury wunjese, ma so mjenowany zakoń na Uniwersiće Lipsk wot zymskeho semestra 2018/2019 přesadźić. Dokładne wuhotowanje tuchwilu z akademiskimi gremijemi wothłosuja. Na Techniskej uniwersiće Drježdźany ma bonus tohorunja wot spočatka přichodneho zymskeho semestra płaćić. Na Kamjeničanskej Techniskej uniwersiće kaž tež na sakskich wysokich šulach za wuměłstwo tajki bonus po informacijach sakskeho wědomostneho ministerstwa dotal njenałožuja.