Policija (09.11.16)
Rentnarka so zatepiła
Minakał. Na tragiske wašnje žiwjenje přisadźiła je starša žona w Minakale. Pěšcy wuhladachu zawčerawšim připołdnju jeje ćěło we wjetšej hrjebi při hrodowym parku a wućahnychu je z wody. Přiwołany nuzowy lěkar móžeše jenož hišće smjerć 76lětneje zwěsćić. Po wšěm zdaću bě wona strowotniskeho problema dla do hrjebje padnyła a so zatepiła. Nadrobniše wobstejnosće jeje smjerće kriminalna policija přepytuje.
Policija (08.11.16)
Hajnik so zranił
Skaskow. Po wšěm zdaću ze swojej třělbu je so minjenu sobotu 71lětny hajnik w Skaskowje zranił. Swědce běštej wobkedźbowałoj, kak muž w awće sedźeše a pódla njeho pos šćowkaše. Při tym dóńdźe k wutřělej, kotryž muža na łochću zrani. Hajnik lěkarsku pomoc wotpokaza, na čož žonje policiju informowaštej. Wobsadka policajskeho awta zetka hajnika w jeho bydlenju, hdźež bě sej wón ranu sam zawobalił. Zastojnicy kontrolowachu na to třělby 71lětneho a zwěsćichu, zo stejachu wone zdźěla nabite a hromadźe z municiju w třělbowym kamorje. Po dorěčenju ze zamołwitym krajnoradneho zarjada wzachu zastojnicy pjeć třělbow muža sobu.
Policija (07.11.16)
Zražka při ampli
Pančicy-Kukow. Čerwjeneje ample dla dyrbješe wodźerka Rovera sobotu wječor před nadróžnym twarnišćom w Pančicach-Kukowje zastać. Jako ampla na zelene přeskoči, chcyše 33lětna dale jěć. W tym wokomiku přijědźe wotzady VW a spyta Rover hišće přesćahnyć, při čimž wobě awće do so zrazyštej. Wěcna škoda wučinja něhdźe 8 000 eurow.
Policija (04.11.16)
Swěcu kontrolowali
Budyšin. Při něhdźe 1 300 jězdźidłach je policija w oktobru w Budyskim a Zhorjelskim wokrjesu kontrolowała, hač je z jich swěcowej připrawu wšo w porjadku. W kóždym wosmym padźe zwěsćichu zastojnicy njedostatki. 144 wodźerjow dyrbi swoje awto porjedźeć dać a znowa předstajić. Runje w ćmowym počasu policija radźi časćišo hladać, hač je swěca awta w porjadku.
Policija (03.11.16)
Pytaja swědkow
Chrósćicy. Jako bě minjeny pjatk něhdźe w 20.15 hodź. 14lětna młodostna z Chrósćic do směra na Prawoćicy po puću, šmórny so jeje nimojěducy transporter z wonkownym špihelom. Wodźer jězdźidła zasta, z holcu skrótka porěča a na to wotjědźe. 14lětnu dyrbjachu pozdźišo w chorowni ambulantnje zastarać. Nětko přepytuje policija tónle pad jako wotsalenje z městna njezboža a pyta k tomu swědkow. Štóž je situaciju pjatk wječor wobkedźbował abo štóž móže pokiwy k awtu resp. k jeho wodźerjej dać, njech přizjewi so na Kamjenskim policajskim rewěrje (tel. 03578/ 35 20).
Policija (02.11.16)
Po njezbožu zemrěł
Wóspork. Na statnej dróze S 112 mjez Kotecami a Malećicami blisko Wósporka je zawčerawšim připołdnju wodźer motorskeho znjezbožił a so žiwjenjastrašnje zranił. Na poslednim dnju lětušeje sezony motorskich zajědźe 35lětny w křiwicy na prawy bok jězdnje a zrazy do štoma. Z helikopterom dowjezechu jeho do chorownje, hdźež je wón něšto hodźin pozdźišo zemrěł.
Policija (01.11.16)
Tukanja rozjasnjene
Budyšin. Wot wčerawšeho w interneće a w socialnych syćach kursěrowace tukanja, zo chcedźa požadarjo azyla přichodne dny w Budyšinje njeměr naškarać, su rozjasnjene. Kaž je decernat za statny škit kriminalneje policije wuslědźił, bě tukanje nastało rěčneho njedorozumjenja dla. Nawodnica domu za požadarjow azyla je 17lětneho Syričana po wšěm zdaću wopak zrozumiła.
Policija (28.10.16)
Klawny w Hornjej Łužicy
Kamjenc. Informacije wo agresiwnych wosobach w kostimach klawna so tež w Hornjej Łužicy kopja. Zawčerawšim wołachu policiju do skaterskeho parka na Kamjenskej Goethowej. Tam běštaj hnydom dwaj tak mjenowanaj horor-klawnaj po puću, kotrejuž dla so štyrjo młodostni chětro nastróžichu a ćeknychu. Po jich wuprajenjach klawnaj za nimi spěchaštaj, při čimž měješe jedyn z njeju wjetši hamor w ruce. Na zbožo so ćěkacym młodostnym poradźi hač domoj doběžeć. Policajscy zastojnicy w bliskosći za klawnomaj pytachu, njemóžachu pak nikoho podhladneho lepić. Přiwšěm w tymle padźe dale přepytuja, kaž Zhorjelska policajska direkcija informuje.
Policija (27.10.16)
Z wopačnym busom sobu jěł
Kamjenc. Jako pomocnik we wšitkich žiwjenskich połoženjach wopokazachu so wčera rano policisća w Kamjencu. Wołał bě jich wodźer busa měšćanskeje linije, dokelž sedźeše w jeho jězdźidle dźěćo, kotrež bě po wšěm zdaću do wopačneho busa zalězło. Wobsadka policajskeho awta informowaše mać sydomlětneho a dowjeze hólčeca na to do jeho zakładneje šule. Wón bě čisło busa zaměnił a tak do wopačneho směra jěł. Při tym zhubi orientaciju w měsće. Kak je so wón čuł, jako z policajskim awtom do šule přijědźe, bohužel znate njeje.
Policija (26.10.16)
Awto radšo zamkać
Kamjenc. Po tym zo bě nakupowała, połoži 79lětna žona zawčerawšim w Kamjencu swoju ručnu tobołku do awta. Jězdźidło pak wona njezamkny, dokelž chcyše jenož nakupowanski wozyčk wotstajić. Tule lochkomyslnosć rentnarki bě po wšěm zdaću paduch wobkedźbował. Přetož jako so wona wokomiki pozdźišo k awtu wróći, bě ručna tobołka fuk. Na te wašnje zhubi žona tež swoje wupokazy, wosobinske papjery a něšto stow eurow. Policija tuž radźi swoje awto radšo stajnje zamkać, wšojedne hač steji wone na priwatnej ležownosći, na puću před domom abo na parkowanišću.
