Policija (22.12.16)
Wulku škodu načinili
Mały Wjelkow. W Małym Wjelkowje běchu so njeznaći wčera rano do kupnicy na Wojerowskej dróze zadobyli. Po prěnich dopóznaćach tam drje ničo pokradnyli njejsu, wěcna škoda rozbitych duri dla pak wučinja něhdźe 10 000 eurow.
Wopity z awtom jěł
Wjazońca. Na statnej dróze S 119 sta so wčera pola Wjazońcy ćežke njezbožo. 39lětny wopity šofer bě kontrolu nad jězdźidłom zhubił a na łuku zajěł. Wěcna škoda je něhdźe 5 000 eurow.
Policija (21.12.16)
Bjez jězbneje dowolnosće
Połčnica. Překwapjenku dožiwichu policisća, kotrychž su wčera rano k wobdźěłanju wobchadneho njezboža na awtodróze A 4 pola Połčnicy wołali. Najskerje techniskeho defekta dla bě so ćežke nakładne awto na prawy bok jězdnje dóstało a do nabóčneho wobhrodźenja zrazyło. Wěcna škoda wučinja po prěnim trochowanju wjacore dźesaćitysacy eurow. Při zwěsćenju blišich wobstejnosćow njezboža zastojnikam napadny, zo 30lětny šofer přewodneho awta scyła žanu jězbnu dowolnosć njeměješe. Nimo toho reagowaše wón pozitiwnje na drogowy test. Policisća su 30lětneho na to tuž k wotedaću kreje přewodźeli.
Policija (20.12.16)
Armatury kradnyli
Budyšin. W času wot soboty wječora do njedźele ranja běchu so njeznaći na Budyskej Kolpingowej do twarnišća wjaceswójbneho domu zadobyli. Z jedneje kupjele wottwarichu sanitarne armatury a su je sobu wzali. Škodu trochuja na něhdźe 900 eurow.
Policija (19.12.16)
Hudźby dla so storkali
Budyšin. K rozestajenju mjez šěsć młodymi ćěkancami a runje telko domoródnymi je sobotu wječor na Budyskich Wjacławskich wikach dóšło. Přičina najskerje bě, zo měješe jedyn z migrantow hudźbu z handyja wótře nastajeju. Po werbalnym rozestajenju młodostni do so storkachu. Ćěkancy so na to wotsalichu.
Policija (16.12.16)
W bydlenju kradnyła
Łaz. Lochkomyslnosć wobydlerki je njeznata žona zawčerawšim we Łazu k padustwu wužiła. 87lětna wjesnjanka bě dopołdnja swój dom wopušćiła, zo by po šćěpki šła. Po wšěm zdaću pak durje njezamkny, tak zo móžeše cuza žona zastupić. Jako so rentnarka wróći, wona njeprošeny wopyt wuhlada a jemu kazaše, dom a ležownosć wopušćić. Hakle pozdźišo staruška pytny, zo běchu w spanskej stwě wšitke kamory přeborkane a zo je so mały drjewjany kašćik z wopismami a medaljemi w hódnoće něhdźe 50 eurow zhubił.
Policija (15.12.16)
Psa dračowali
Bórk. Z padom přeńdźenja na zakonju wo škiće zwěrjatow so policija w Bórku zaběra. Tam bě žona srjedź nowembra swojeho psa ke skótnemu lěkarjej donjesła. Tón namaka w črjewje štyrinohača připinawki (Reißzwecke), dźěle wótreho brjenka (Messerklinge) a jěd pře wulke myše. Po wšěm zdaću běchu njeznaći wokoło domu žony w Bórku abo w lěsku sewjernje Sprjewineho hotela zajědojćene wabjenki wupołožili. Pos ćežko zranjeny přežiwi. Nětko pytaja swědkow, kotřiž su něšto podhladne wobkedźbowali, abo wobsedźerjow psow, kotrychž lubuški běchu potrjechene. Pokiwy přijimuja pod telefonowym čisłom 03591/ 35 60.
Zawinowarja wuslědźili
Hamor. Ćeknjeneho zawinowarja wobchadneho njezboža w Hamorje je policija zawčerawšim rano spěšnje wuslědźiła. Muž bě ze swojim Mitsubishijom blisko milinarnje po puću. Byrnjež to tam zakazane było, wón wodźerja mopeda přesćahny a jemu puć wotrězny. 16lětny na to kontrolu nad mopedom zhubi, padny a so snadnje zrani. Wodźer awta ćekny. Zastojnicy Běłowodźanskeho policajskeho rewěra pak 28lětneho wuslědźichu.
Policija (14.12.16)
Woheń ze smjertnym woporom
Wóspork. Při hašenju wohenja su wobornicy wčera rano we Wósporku ćěło muža namakali. Něhdźe w 7.30 hodź. wołachu jich k hašenju wohenja w jednoswójbnym domje na Schillerowej. Na hornim poschodźe namakachu wuchowarjo ćěło 86lětneho wobydlerja. Nuzowy lěkar móžeše jenož hišće jeho smjerć zwěsćić.
Policija (13.12.16)
Grafitije na budki mórali
Budyšin. Wjace hač 22 předawanskich budkow na Budyskich Wjacławskich wikach su njeznaći w nocy na wčerawšu póndźelu z grafitijemi popryskali. Při tym jedna so wo parole, kotrež policija lěwicarskemu spektrumej přirjaduje. Tež fasadu dweju bydlenskeju domow na te wašnje zanjerodźichu. Po wšěm zdaću wužiwachu skućićeljo při tym šablonu. Wěcnu škodu trochuja na 1 500 eurow. Kriminalna policija pad přepytuje.
Policija (12.12.16)
Na awtodróze drastu zběrał
Horni Wujězd. Dokelž bě so jeho třěšny wačok při jězdźenju wočinił, je wodźer Mercedesa sobotu připołdnju na awtodróze A 4 blisko Hornjeho Wujězda wjacore dźěle drasty zhubił. Wodźer na kromje jězdnje zasta a dočaka na policiju. Z jeje pomocu móžeše wón pozdźišo drastu zaso zezběrać.
Policija (09.12.16)
Na čerwjene bankowki kedźbować
Biskopicy. Při rozbuchnjenju pjenježneho awtomata w nocy na štwórtk w Biskopicach (SN rozprawjachu) su njeznaći něhdźe 100 000 eurow rubili. Při tym pak je barbowa patrona bankowki wočerwjeniła. Policija tuž prosy, na tajke z čerwjenej barbu woznamjenjene bankowki kedźbować. Štóž tajke poskićene dóstanje, njech informuje policiju.
