Klětu chcedźa wosebitu lipu sadźić
Njebjelčicy (aha/SN). Njebjelčanska gmejnska žurla bě minjenu sobotu popołdnju derje pjelnjena. Wjesnjanosta Tomaš Čornak (CDU) rozłoži tam zaměr „dnja rejwanskeje lipy“. Na wjacorych přikładach wón pokaza, zo je so poradźiło z ludźimi, kotřiž maja we wšěch wjesnych dźělach gmejny wěstu zamołwitosć, tworić zetkawanišća, zo bychu wjesnu zhromadnosć hajili a skrućeli. W zeskutkownjenju toho nańdźechu z lěta 2016 w Lipsku załoženym towarstwom Serbska reja a jeho předsydu Gregorom Kliemom dobreho partnera. Towarstwo bě so zdobom wo to starało, zo měješe sobotu poprawom prof. Andreas Zehnsdorf z Lipska wo tradiciji rejwanskeje lipy přednošować. Tón pak bohužel přijěł njeje. Čłon předsydstwa towarstwa Serbska reja, wědomostny sobudźěłaćer Serbskeho instituta Fabian Jacobs, pak postara so spontanje wo zajimawe narunanje.
Na mnohich wsach Hornjeje Łužicy swjećachu wčera swjatoh ...
Poselstwo měra a swobody wobchować
Slepo (AK/SN). „Poselstwo měra a swobody je a wostanje dale wulce aktualne. Runje my křesćenjo měli wjace činić, hač jenož dopomnjenki a nostalgiju budźić. Móžemy so prašeć: Kak je Bóh tehdy, před třiceći lětami, skutkował? Kak je nazyma 1989 na našu parochiju skutkowała, kak na našu wěru?“ To rjekny fararka Jadwiga Malinkowa minjenu sobotu w Slepjanskim kubłanskim centrumje we wobłuku spominanja tamnišeje ewangelskeje wosady na 30. róčnicu powalenja Berlinskeje murje. Dale Malinkowa wuzběhny, zo „je naš nadawk, tutu dimensiju – móc měra, swěčkow a modlitwow – wobchować. Móžemy ze swojej wěru něšto wuskutkować. Přetož Bóh je tež Bóh měra a swobody.“
Krótkopowěsće (12.11.19)
Pophudźba ma zaso stejišćo
Berlin. Skupina Silbermond ma dźensa za wažne, towaršnostne stejišćo zabrać. „Bě čas, zo su so pophudźbnicy wróćo sćahnyli, dokelž buchu za swoje měnjenje kritizowani. Mjeztym pak přiběra začuće, zo woni swoje stejišćo zaso ćim bóle zastupuja, a to mam za prawe“, praji bubnar Andreas Nowak. Silbermond wozjewi pjatk šesty album „Schritte“, hdźež wo towaršnostnych temach runje tak spěwaja kaž wo wosobinskich.
Na olympiadu geografije
Drježdźany. 128 šulerjow 7. a 10. lětnika wobdźěla so w nowembru na 3. schodźenku 14. sakskeje olympiady geografije. Na pjeć regionalnych wurisanjach w Drježdźanach, Kamjenicy, Zwickauwje, Budyšinje a Lipsku maja fachowi poradźowarjo stajnje najlěpšich třoch šulerjow zwěsćić. 4. schodźenk a finale budźetej 24. februara 2020 w Drježdźanach.
Škitaja jamu před škodami
Policija (11.11.19)
Domske wurubili
Brězowka. Njeznaći su w minjenych štyrjoch tydźenjach w Brězowce (Halbendorf) tuchwilu njewobydlene domske dospołnje wurubili, kaž policija dźensa zdźěla. Paduši su nimo elektriskich nastrojow kaž ćišćaka a telefona tež nimale kompletnu kuchnju, meble z bydlenskeje stwy a płokawu sobu wzali. To pak jim njedosahaše a dokelž jich po wšěm zdaću nichtó njemyleše, wutwarichu tež hišće tepidła a wulke dźěle koporowych kablow. Z pincy a z garaže spakosćichu paduši aluminijowe zwjena a wotklumpachu něhdźe 200 litrow tepjenskeho wolija. Za to su z namocu dźěru do jednoho z wolijowych tankow nabili.
Skład rěza so palił
Ochranow. Předwčerawšim je so w Ochranowje (Herrnhut) skład rěza w blidarni palił. Płomjenja přeskočichu tež na bliske twarjenje štyristronskeho statoka. Wohnjowa wobora pak zamó je na zbožo spěšnje zhašeć. Přičina wohenja bě techniski defekt. Cyłkownu škodu trochuje policija na něhdźe 250 000 eurow.
„Kastanijowy dwór“ bórze zawru
Trjebin (AK/SN). Trjebin jako čłon turistiskeho teritorialneho zjednoćenstwa (TGG) Nysowy kraj chce so hišće bóle za turizm regiona zasadźeć. Na to bě gmejnski radźićel René Mettke a zastupjer komuny w TGG, na posedźenju tamnišeje gmejnskeje rady minjenu srjedu skedźbnił. „Za Hanza Šusterowy statok w Trjebinje na přikład nastawa tuchwilu memoryjowa hra, kotruž chcemy na turistiskich wikach wupołožić a wšelakim zarjadnišćam a institucijam přepodać.“ Hra, wosebje za dźěći nazornje a originelnje wuhotowana, wabi za turistiski cil, Hanza Šusterowy statok. Dalše motiwy memoryjoweje hry pokazuja mjez druhim Park hrabje Pücklera w Mužakowje, tamnišu lěsnu železnicu, wódne pućowanje po Nysy a dalše atrakcije. „Nadźijamy so, zo móžemy tak bóle na naš region skedźbnić“, René Mettke podšmórny, wopisujo hišće dalše přikłady.
Wo přichodźe ludu rěčeć
Njebjelčicy. Towarški a towaršojo, přećeljo kaž tež zajimowani wobydlerjo su jutře we 18 hodź. na zetkanje serbskopolitiskich kružkow a akterow CDU, SPD a Zwjazka 90/Zelenych w Njebjelčanskim gmejnskim zarjedźe přeprošeni. W rozmołwach a diskusijach a zhladowanju na politiku w Sakskej steji přichod serbskeho ludu w srjedźišću.
Elementarij wopyta hódny
Kamjenc. Kamjenski Muzej zapadneje Łužicy je mnohim, kotřiž su z přirodu a přirodoškitom kaž tež z archeologiju wusko zwjazani, dobra adresa. Tak su zajimcy jutře w 17 hodź. do domu witani, zo bychu swoje namakane kamjenje a fosilije posudźować dali. Jens Czoßek, muzejowy geologa, móže jim pomhać, chcedźa-li wědźeć, kotry kamjeń n. př. su sej z dowola při morju sobu přiwjezli.
Spominanje we wopomnišću
Budyšin. „Ohne Ruhe rollt das Meer“ rěka čitanje a koncert z Gerhardom Bausu a Stephanom Krawczykom srjedu składnostnje wotewrjenja stasijastwa Budyšin II před 30 lětami. Započatk je w 19 hodź., zastup darmotny.
Wo starych časach „sonić“
„Našej chorowni so wuznawamy“
Kamjenc (SN/mwe). Generalny społnomócnjeny pomocneje organizacije maltezow Karl Prinz zu Löwenstein je minjeny štwórtk zjawnje zdźělił, zo změje předań chorownjow maltezow tež w Kamjencu a Zhorjelcu lědma wuskutki za tam přistajenych. Wšitke dźěłoprawniske poměry wostanu, a wot zajimowanych kupcow wočakuja maltezojo nětko konkretne poskitki. Kaž zu Löwenstein tohorunja informuje, njeje žaneje alternatiwy k předani lěkowarnje. Wšako je tež pomocnym organizacijam dale a ćešo chorownje financować.
Krótkopowěsće (11.11.19)
Certifikat zakitowali
Budyšin. Spanskomedicinski labor w Budyskej chorowni Hornjołužiskich klinikow ptzwr (OLK) je certifikat za kwalitu struktury a procesow Němskeje towaršnosće za slědźenje a medicinu spara wuspěšnje zakitował. Wo tym OLK dźensa informuja. Na šěsć lěkowanskich městnach zastaruja spanskomedicinske schorjenja, štyri su za dorosćenych w medicinskej klinice II a dwě w klinice za dźěćacu a młodźinsku medicinu.
Kompetencny centrum wotewrěli
Choćebuz. We Łužicy dźěła nětko „myslenska fabrika“. Minjeny pjatk su kompetencny centrum w Choćebuzu wotewrěli. W nadawku zwjazkoweho wobswětoweho ministerstwa maja tam wědomostnicy rozrisanja wuwić, zo móhła industrija klimoneutralnje dźěłać. Tuchwilu ma centrum šěsć sobudźěłaćerjow, ličba pak ma na 14 rozrosć.
Tež Miłoraz zachować
Liča prěni raz z lochkim minusom
Kulowska měšćanska rada je na swojim posedźenju srjedu tydźenja hospodarski plan za komunalny lěs wobzamkła.
Kulow (AK/SN). Statny zawod Sakski lěs wobhospodarja w nadawku města Kulowa wobstatk měšćanskeho lěsa. „Prěni raz w běhu lět wupokazuje hospodarski plan we wuslědku lochki minus“, rozłoži zastupowacy nawoda Kulowskeho měšćanskeho wotrjada za twarstwo, přemysło a porjad Jurij Brösan, na wuradźowanju měšćanskeje rady. „Planujemy klětu stratu 721 eurow.“
Přičiny kritiskeho wuwića su sylne wichory minjenych měsacow kaž tež rozmnoženje skórnika po cyłych wobstatkach lěsa. „Před tydźenjomaj smy sej aktualny staw ze sobudźěłaćerjemi zawoda Sakski lěs na městnje wobhladali. Wulke škody mamy předewšěm w lěsach priwatnych wobsedźerjow. Ze swojim měšćanskim lěsom mamy hišće zbožo“, Jurij Brösan wuswětli. „Najebać to pak nimamy žane wulke žně drjewa předwidźane, dokelž su jeho płaćizny w pincy.“ Jeničce mjez delnimi Sulšecami a Tradowom, podłu dróhi mjez wsomaj, někotre štomy pušća, zo by wobchadna wěstota zaručena była.
