Dotal bjez plana dźěłali
Njeswačanska gmejnska rada so z połnej paru do dźěła dała
Njeswačidło (JK/SN). Zo hospodarski plan nastajić a k tomu trěbne wustawki wobkrućić scyła tak jednore njeje, dyrbjachu nowi čłonojo Njeswačanskeje gmejnskeje rady na swojim wčerawšim posedźenju nazhonić. Hakle nětko móže gmejna swoje nadawki a winowatosće po wobzamknjenych a płaćiwych wustawkach zwoprawdźić. Nastajić zahajensku bilancu kaž tež eksterne pruwowanje gmejny běchu přistajenych komuny chětro wužadali a z tym zapozdźene schwalenje hospodarskeho plana zawinyli. Samo na sebi bychu nětko w radźe dyrbjeli hižo wo klětušim planje wuradźować, ale tón nastajić tež lochko njebudźe.
Mała dwurěčna floskla
„W srjedźišću rady njesteji“
Budyšin (SN/at). Štwórć lětstotka bě Christian Schramm měšćanosta, potom wyši měšćanosta Budyšina. Z jeho mjenom je rozkćěw města po towaršnostnym přewróće zwjazany. Jako hłowa komuny ma wón zasłužby. Tohodla je skupina wobydlerjow, mjez nimi dr. Ines Kellerowa a Jan Budar, namjetowała, Christianej Schrammej čestne wobydlerstwo spožčić. Měšćanska rada bě namjetej přihłosowała. Wčera wotmě so swjatočnosć w Dźiwadle na hrodźe.
Wyši měšćanosta Alexander Ahrens (SPD) wobkrući swojemu předchadnikej „njetypiske za mějićela zastojnstwa: wón rady w srjedźišću njesteji.“ Swoje připóznaće wupraji mandźelskej Sabinje Schramm, kotraž jeho jara podpěrowaše. Fotowa pokazka wołaše wokomiki ze skutkowanja Christiana Schramma do pomjatka. Lawdator, wjelelětny financny měšćanosta Michael Böhmer, so jemu dźakowaše. Wón wobswětli žiwjenje a skutkowanje počesćeneho a pokaza z widom přitomnosće na přiběrace polarizowanje w towaršnosći. „Zacpěće demokratiskich institucijow je do towaršnosće kmane“, Böhmer skonstatowa.
Krótkopowěsće (19.09.19)
Mały Muk so rozžohnował
Budyšin. Serbske dźěćace dźiwadło při NSLDź je wčera jědnaty a zdobom posledni raz swoju inscenaciju „Mały Muk“ po přełožku Dorotheje Šołćiny hrało. Dohromady je sej hru 1 275 šulerjow a pěstowarskich dźěći z Chrósćic, Ralbic, Worklec, Pančic-Kukowa a Budyšina wobhladało. 2. oktobra wotměja w NSLDź casting, na kotrymž pytaja nowych hrajerjow za přichodnu hru.
Na naprašowanju so wobdźělić
Budyšin. Dźěłarnistwo rjedźerjow IG BAU namołwja něhdźe 1 470 rjedźerjow a rjedźerki Budyskeho wokrjesa so na po cyłej Němskej zahajenym internetnym naprašowanju wobdźělić. Dźe wo to wuslědźić, štó a hdźe su přeńdźenja dźěłowych wuměnjenjow. Ramikowe zrěčenje je wupowědźene. Mnozy dźěłodawarjo spytaja tuž dźěłowe zrěčenja změnić.
Zarjadowanje tež w Zhorjelcu
Hermančenjo swjeća
Hermanecy (SN). Z „oktoberskim swjedźenjom“ spominaja Hermanecy wot 19. do 22. septembra na swoje 600lětne wobstaće. W lěće 1419 bu wjes přez knježka Metzradta prěni króć naspomnjena. Ze škotowanjom a blidotenisom štyri dny trajacy jubilejny swjedźeń zahaja. Młodźinska wohnjowa wobora organizuje pjatk, 20. septembra, w 16.30 hodź. přezpólnu hru, na kotrejž so tež dorosćacy wobornicy z Bjedrichec, Šćeńcy, Běłeho Chołmca, Kulowa, Rakec a Minakała wobdźěla. Njedźelu budźe přez cyły dźeń dźěćacy swjedźeń. Wotewrjena je wot 10 do 12 hodź. domizniska stwa.
Konstituowanje rady
Worklecy (SN). Worklečenjo a dalši zajimcy su jutře, štwórtk, w 19.30 hodź. do tamnišeje wyšeje šule na zjawnu konstituowacu zhromadźiznu gmejnskeje rady přeprošeni. Po zawjazanju gmejnskich radźićelow slěduja nimo twarskich naležnosćow a k tomu słušacych próstwach wo stejišća tež informacije wjesnjanosty. Zdobom maja přitomni hosćo přiležnosć so naprašować.
Worjołej a sowje přihladować
Policija (18.09.19)
45lětny konop plahował
Hlina. Zastojnicy kriminalneje policije běchu minjeny kónc tydźenja w Hlinje (Gleina) pola Malešec konopjowu plantažu našli a ju znješkódnichu. Wobydler policiji anonymnje zdźěli, zo bě 45lětneho Dana při plahowanju w rostlinarni wobkedźbował. Při pytanju za drogami zasadźichu tež na to specializowane psy. Wone 24 rostlin wučušlichu.
Kóčce čwělnje zahinyłoj
Drječin. Hižo před něšto časom su njeznaći w Drječinje (Dretschen) kóčce zajědojćili. Štyrinohačej grawoćiwje zahinyštej. Skótny lěkar čwělowanje wobkrući, njemóže pak rjec, kotry jěd stej žrałoj. Zo njeby k tomu dóšło, chce policija dračowarja na kóždy pad wuslědźić.
Prěni so hižo přizjewił
Twarske naležnosće a wólby na wčerawšej gmejnskej radźe wobjednali
Radwor (SN/BŠe). Hłownje twarskim naležnosćam wěnowachu so wčera Radworscy gmejnscy radźićeljo a nazhonichu, kak ćežko je wotwažować a rozsudy tworić. Tak dźěše wo puć w Měrkowje. Za projekt su spěchowanske srědki we wysokosći 90 procentow twarskeje sumy přizwolene dóstali. Wuměnjenje pak je, zo naprawu hišće lětsa zwoprawdźa a wotliča, štož je časowje dospołnje njemóžne. Wutwar dróhi měli jónu po zakonju wupisać a zdobom su twarske předewzaća dospołnje wućežene. Postupowanje zarjada, kotrež spěchowanske srědki přizwola, je dospołnje njerozumne, běchu sej radźićeljo wčera přezjedni.
Dale dojednachu so na to, zo puć mjez Radworskej Lilijowej a Kamjenjanskej dróhu ponowja. Dospołny wutwar Měrkowskeho puća pak su přewysokich twarskich płaćiznow dla přestorčili. Zdobom pak skedźbnichu na to, naprawu do prioritneje lisćiny gmejny přiwzać.
Jubilej wjeski woswjećili
Šulerjam Ćišinskeho zbližeć(11)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim lěćnym serialu Serbskich Nowin chcemy je předstajić.
Baseń „Moje serbske wuznaće“ je jedne z najznaćišich twórbow Jakuba Barta-Ćišinskeho. Ale što wědźa šulerjo wo tymle wuznamnym basniku našeho ludu? To su so tež w Domowinskej župje „Michał Hórnik“ prašeli, jako su Ćišinskemu wěnowane projektowe dny za wyše šule koncipowali. „Šulerjam wo nim přemało sposrědkuja“, zwěsći regionalna rěčnica Domowiny Katharina Jurkowa předstajejo swój mytowany projekt na njedawnej nowinarskej rozmołwje Łužiskeho hospodarskeho regiona w Budyšinje. „Chcemy młodostnym Ćišinskeho na našemu časej wotpowědowace wašnje zbližeć, zo bychu so woni ze swójskej identitu a z wosobinskim přichodom rozestajeli“, mjenowaše wona narok.
Krótkopowěsće (18.09.19)
Stipendiatka slědźi wo Pückleru
Budyšin. Freya Schwachenwald je nowa stipendiatka Mättigoweje załožby. Studentku předmjeta Transkulturne studije na uniwersiće w Heidelbergu podpěruja za masterske dźěło wo skutkowanju wjercha Hermanna Pücklera z 1 200 eurami. Stipendiat njedźelu na bohosłužbje w Budyskej tachantskej cyrkwi swjatočnje přepodadźa.
Z nowej wokrjesnej předsydku
Čorny Chołmc. Susann Kolba a Jens Bitzka z Łutow stejitaj na čole Budyskeho wokrjesneho Zwjazka 90/Zelenych. Wokrjesna sobustawska zhromadźizna je jeju wčera w Čornym Chołmcu na turnusowych wólbach wuzwoliła. Nowemu wokrjesnemu předsydstwu dale pokładnik Lukas Mosler z Wojerec a přisydnikaj Katrin Kunath ze Sepic a Andreas von Geibler z Budyšina přisłušeja.
„Wjes lěta“ wuzwolili
