Krótkopowěsće (21.10.19)
Mjeńšiny tema byli
Frankfurt n. M. Situacija słowjanskich a němskich mjeńšin bě tema podijoweje diskusije na lětušich knižnych wikach w Frankfurće nad Mohanom. Sobotu dopołdnja rěčeštaj tam mjez druhim dr. Günther Rautz, nawoda Instituta za mjeńšinowe prawo w Bozenje, a nawodnica Budyskeho rozhłosoweho studija MDR Bogna Korjeńkowa.
Njepřiwozmje myto
Mnichow. Spožčenje Myta Rolanda Bergera za čłowjesku dostojnosć dyrbja přestorčić. Dźensa planowane přepodaće wupadnje, dokelž je Adam Bodnar, nawoda pólskeho běrowa za wobydlerske prawa, kotremuž su wuznamjenjenje lětsa připóznali, připowědźił myto njepřiwzać. Přičina wotprajenja je po jeho słowach „njejasna róla nana Rolanda Bergera za čas nacionalsocializma“.
Hotuja so na festiwal DOK
Wo kraju z wójnu a rozmachom zhonili
Skupina Serbow poda so w žnjencu z busom Radworskeho Šmitec wozydłownistwa na putnisku jězbu do Ukrainy. „Po A 4 jědźechmy do směra na Zhorjelc a dale do směra Kraków a Przemyśl přez statnu hranicu do ukrainskeho Lwiwa. Město mjenuja Rusojo Lwow, Polacy Lwów a Němcy Lemberg“, wuwjedźe Baćoński farar Gerat Wornar minjenu wutoru w swojim zajimawym přednošku před Budyskimi katolskimi seniorami. A běše znowa něhdźe 40 wobdźělnikow přewšo rjaneje wuprawy do stareho, na kulturje a stawiznach jimaceho, něhdyšeho kralestwa Galiciska.
Policija (18.10.19)
Katastrofa na kolesach
Słona Boršć. We woprawdźitym zmysle włosy na hłowje stali su zastojnikam awtodróhoweje policije předwčerawšim, jako kontrolowachu nakładne awto, kotrež bě na A 4 do směra na Zhorjelc po puću. Lisćina njedostatkow bě tak dołha, zo móhło katastrofje dóńć, policija wčera zdźěli. Nimo někotrych wottorhnjenych a njefungowacych borzdźidłow zwěsćichu zdobom, zo z motora, kolesynow (Getriebe) a diferenciala chětro wolij kapa. Nimo toho běchu wjacore wobruče hač na tkaniny wotjězdźene a hrožachu kóždy wokomik prasnyć. Samo fachowc DEKRA dyrbješe přiznać, zo tajki „jězdźacy wrak“ dotal hišće ženje widźał njebě. Policisća zakazachu šoferej dale jěć. Zdobom změje so tón tohorunja před sudnistwom wusprawnić.
Cyłotny koncept trěbny
We Łazu pawšalu k sylnjenju wjesnych rumow zaměrnje zasadźeja
Łaz (AK/SN). Gmejna Łaz chce wot Sakskeje připokazanu pawšalu k sylnjenju wjesnych rumow za lěta 2018 do 2020 zmysłapołnje a zaměrnje wužiwać. To podšmórnychu čłonojo tamnišeje gmejnskeje rady na swojim zašłym posedźenju wutoru we Łazu. 50 000 eurow za lětsa nałoža za zdźěłanje cyłotneho koncepta wo potrjebje saněrowanja a inwesticijow w pěstowarnjach gmejny. 20 000 eurow chcedźa za naprawy w jednotliwych wjesnych dźělach komuny wužiwać. Konkretnje přewostaja Koblicam (Koblenz) a Wulkim Ždźaram (Groß Särchen) 5 640 eurow, štož je rada na swojim wutornym posedźenju tež wobzamknyła.
Spottka a drjewo
Budyšin. Měšćanska biblioteka Budyšin prezentuje swojim wužiwarjam nowu wustajeńcu. Wot dźensnišeho pjatka, 18. oktobra, 17 hodź., hač do kónca februara steja tam w srjedźišću přehladki wuměłc Jürgen Spottka a jeho wuměłstwowe wudźěłki z drjewa.
Kreatiwnej dnjej
Chrósćicy. Holcy a młode žony su přichodnu srjedu a štwórtk, 23. a 24. oktobra, na kreatiwnej dnjej na Chróšćanski gmejnski zarjad přeprošeni. Srjedu chcedźa nazymsku pychu paslić. Pokiwy k tomu dawa floristka Diana Mejnowa. Štwórtk steji paslenje filigranych nawušnicow z parličkow, pjelsće, zbytkow płatu a fimo-hliny na programje. Započatk je na woběmaj dnjomaj w 9 hodź. Popłatk wob dźeń a wobdźělnika wučinja dwaj euraj. Přizjewjenja přijimuje socialna dźěłaćerka RCW Marija Koklina telefonisce pod 01520/727 3806 kaž tež e-mailnje pod
Na nazymski koncert
Móst w Běčicach zwuporjedźeja
Krok po kroku chce gmejna Hodźij tež dalše twary saněrować.
Hodźij (CK/SN). Gmejnska rada Hodźij je na swojim njedawnym posedźenju nadawk za planowanske dźěła k zwuporjedźenju mosta w Běčicach (Pietzschwitz) přepodała. Na jězdnej su jasne škałoby rozpukanjow widźeć a wobłoženje chětro zerzawi. „Te a dalše škody pohubjeńšeja wěstotu wobchada. Twarska wěstota pak wohrožena njeje“, rjekny nawoda techniskeho zarjada Hodźijskeje gmejny André Laue. Přez móst wjedźe dróha z Běčic do Čěškec (Zischkowitz). Twarske kóšty za ponowjenje mosta trochuja zamołwići na něhdźe 46 000 eurow. 90 procentow z toho móhli ze spěchowanja zarunać. Próstwu wo spěchowanje z programa k sporjedźenju komunalnych dróhow a mostow pak móže komuna jenož hišće hač do 31. oktobra zapodać. Tohodla a nazymskich prózdnin dla su wuradźowanje gmejnskeje rady prjedy hač planowane přewjedli.
Krótkopowěsće (18.10.19)
Po cyłym zwjazku na 1. městnje
Drježdźany. Prěnje městno je Sakska w IQB-kubłanskim trendźe 2018 za sekundarny schodźenk 1 docpěła. Wuslědki su nad přerězkom Němskeje, kaž kultusowe ministerstwo w Drježdźanach informuje. Po słowach ministra Christiana Piwarza (CDU) stej, najebać pobrachowacych pedagogow, „stołpaj wuspěcha naši wučerjo a stabilny, spušćomny kubłanski system. Sakske šule trjebaja kontinuitu“.
Přewjedu ekskursiju do Wojerec
Budyšin. Towarstwo Serbski kulturny turizm (SKT) poda so na lětušu ekskursiju kónc měsaca do Wojerec, hdźež informuja so wo serbskich poskitkach. Mjez druhim su wjedźenje z Corneliju Schnippowej, wopyt Wjacławkec drastoweho fundusa a wopyt Patokec kładźiteje bróžnje na Horach předwidźane. Runje tak chcedźa čłonojo Krabatowy młyn w Čornym Chołmcu wopytać.
„Effi Briest“ jako opera
Na dobro ludźi z handikapom
Přirada za naležnosće zbrašenych města Wojerec je njedawno měšćanskemu zarjadej a měšćanskej radźe dźěłowu rozprawu minjenych lět předpołožiła.
Wojerecy (AK/SN). Dwórnišćo w starym měsće Wojerec ma bórze bjez barjerow přistupne być. Za to zasadźa so přirada za naležnosće zbrašenych města Wojerec. „Němska železnica namjetuje, to 2024 docpěć. To nam njedosaha. Trjebamy spěšne rozrisanje a dospołnje bjezbarjerny přistup ke kolijam“, podšmórny předsydka přirady Evelin Graf na minjenym posedźenju Wojerowskeje měšćanskeje rady.
Šupy so tež we Łužicy zadomili
Wulka Dubrawa (HN/SN). W minjenym času so tež na wsach Hornjeje Łužicy nócne wopyty šupow (Waschbär) kopja. Wone přeborkaja trawniki a pytaja za picu, mjez druhim za šnakami a zemskimi wosami. Sćěhi tohole pytanja za picu su njerjane – nastawaja wulke dźěry w trawniku, kotrež nichtó měć nochce. Přiwšěm pak móžemy hišće wjeseli być, zo njejsu dźiwje swinje tónle terrain za sebje wotkryli. To by škoda mjenujcy wo wjele wjetša była.
Šupy přiwabja předewšěm tež přepjelnjene kompostowe hromady do wsow. Tuž smy my čłowjekojo tohorunja sobu na tym wina, zo so tele dźiwje zwěrjatka dale a bóle rozmnožeja. Tohodla měli ze žiwidłami, jich składowanjom a předewšěm nastupajo wotbywanje zbytkow žiwidłow jara swědomići być.
Policija (17.10.19)
Motorski ćežko zranjeny
Smječkecy. 24lětny motorski je so předwčerawšim wječor při njezbožu na dróze mjez Róžantom a Smječkecami ćežko zranił. Kaž policija zdźěli, je wón ze swojej KTM w křiwicy z puća zajěł a padnył. Hač bě dalše jězdźidło wobdźělene abo dźiwina na njezbožu wina, zastojnicy pruwuja. Ćežkozranjeneho dyrbjachu z helikopterom do chorownje dowjezć.
