Krok po kroku sej són spjelnjeja (13)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim serialu Serbskich Nowin je předstajamy.
W medijach a socialnych syćach je tež Čłonstwo za integraciju ludoweje akordeonoweje kultury (ČILAK) wo Sakskim fondsu „Čiń sobu!“ zhoniło. „Njejsmy žane zapisane towarstwo a tak wot nikoho pjenjezy njedóstawamy. Fonds bě tuž jónkrótna naležnosć, tež raz fenk za předewzaće dóstać“, rozjasnja Syman Pöpel, kiž je w mjenje cyłka próstwu wo spěchowanje zapodał.
Krótkopowěsće (02.10.19)
Karel Gott njeboh
Praha. Jedyn z najznaćišich čěskich šlagrowych spěwarjow Karel Gott je wčera krótko do połnocy w starobje 80 lět po ćežkej chorosći zemrěł. To wozjewja dźensa powěsćernja ČTK, powołaca so na rěčnicu wuměłca. Karel Gott je nimale 60 lět jako spěwar skutkował a wjele mytow dobył. K jeho najznaćišim pěsnjam słušatej „Babička“ a „Pčołka Maja“.
Do čestneje knihi so zapisali
Choćebuz. Lětušu abituru je na Choćebuskich gymnazijach 21 młodych ludźi z predikatom 1,0 złožiło. Z Delnjoserbskeho gymnazija běchu to třo, Fiona Suffijc, Elias Bisse a Jack-William Šwicaŕ. Po dobrej tradiciji su so woni do čestneje knihi města zapisali, a to na poslednim posedźenju zhromadźizny měšćanskich zapósłancow.
Prěni trening koparkow
W piwarni techniske nowosće rozłožowali
Kulow (UH/SN). Wulce swjećili su minjeny kónc tydźenja na mjeztym hižo 28. piwarniskim swjedźenju w Kulowje. Najstarša priwatna piwarnja Sakskeje bě znowa na woblubowane zarjadowanje přeprosyła. Nimo sobotnych wječornych rejow a njedźelneho kofeja bě sobotu popołdnju piwarniski wjacebój jedyn z wjerškow. Dźewjeć mustwow so na nim wobdźěli.
Wo rewoluciji před 30 lětami
Smochćicy. Na rozmołwu z něhdyšim korespondentom telewizijneho sćelaka ZDF Joachimom Jauerom a něhdyšim Budyskim wyšim měšćanostu Christanom Schrammom přeproša Dom biskopa Bena jutře, srjedu, w 19.30 hodź. do Smochćic. Hłownje póńdźe tam wo podawki měrliweje rewolucije před 30 lětami, wo změny w Budyšinje, Němskej a Europje kaž tež wo sćěhi rewolucije a što je z nich nastało.
Žida z Hornjeje Łužicy?
Stróža. Botanikar Ronny Goldberg porěči jutře w 19 hodź. w Stróžanskim Domje tysac hatow wo tym, kak běchu něhdy tež w Hornjej Łužicy wjacekróć spytali, židźency (Seidenraupe) plahować a je z marušemi (Maulbeere) picować. Na někotrych městnach hišće dźensa maruše na tele pospyty dopominaja.
Diskutuja wo přewróće
Kulow. Na temu „Napjate časy“ přednošuje jutře, srjedu, we 18 hodź. bywši sakski minister Heinz Eggert w Kulowskim Forellowym centrumje. Wón kaž tež Michael Harig a farar Peter-Paul Gregor wobdźěla so na podijowej diskusiji wo podawkach nazymu 1989.
Policija (01.10.19)
Darmotnje tankować chcył
Słona Boršć. Dosć wysoke płaćizny bencina chcyše zawčerawšim muž na awtodróhowym wotpočnišću pola Słoneje Boršće wobeńć a darmotnje tankować. Tónle pospyt pak na zbožo zwrěšći. Wodźer Citroëna drje swoje awto najprjedy za 60 eurow natankowa a z nim bjez płaćenja tež do směra na Zhorjelc wotjědźe. Alarmowani zastojnicy awtodróhoweje policije pak jeho na jednym z parkowanišćow zadźeržachu. 24lětny pólski staćan steješe pod wliwom drogow. Dalšu jězbu jemu policisća wězo zakazachu. Za swój njeskutk wšak změje so młody muž nětko na sudnistwje zamołwić.
Wichor Mortimer je wčera tež w Hornjej Łužicy slědy zawostajił. ...
Wokrjesne wuběrki wolili
Wincenc Baberška (CDU) naměstnik Budyskeho krajneho rady
Budyšin (SN/mwe). Na 2. posedźenju Budyskeho wokrjesneho sejmika je wčera 85 z 98 gremijej přisłušacych radźićelow wokrjesne wuběrki, zastupjerjow do dohladowanskich radow a dalšich gremijow woliło. Na dnjowym porjedźe steješe 35 wólbnych dypkow. Dohromady měješe so w zjawnych a w tajnych wólbach 175 městnow wobsadźić. Njezadźiwa tuž, zo so jako „wólbny marathon“ wopisane posedźenje přez hodźiny ćehnješe a skoro hač do połnocy traješe.
Krótkopowěsće (01.10.19)
Za Słowjanski rěčny atlas
Kraków. Lětuša konferenca komisije za Słowjanski rěčny atlas je so zańdźenu sobotu w Krakowje zakónčiła. Rěčespytnicy z jědnaće słowjanskich krajow, mjez nimi Sonja Wölkowa a Thomas Menzel ze Serbskeho instituta, spřistupnichu sej aktualne dialektologiske slědźenja a dźěłachu dale na nowych zwjazkach rěčneho atlasa, mjez druhim na zwjazku wo kajkosćach čłowjeka, kotryž ma klětu w Moskwje wuńć.
Druha stacija w Słowjenskej
Slovenj Gradec. Přehladku „Wobrazy krajiny. Podobe pokrajine“ wotewru 3. oktobra w Koroška galeriji likovnih umetnosti w słowjenskim Slovenjim Gradecu. Hač do 8. decembra budźe to druha stacija třikrajoweho wuměłskeho pućowanskeho projekta w nošerstwje Załožby za serbski lud a w zhromadnym dźěle z Budyskim Serbskim muzejom.
Zhubjenu wjes wobnowić?
Mała wjes 625lětne wobstaće swjećiła
Lichań (aha/SN). Wšitke štomy na woběmaj kromomaj puća wot Klukša do Lichanja běchu wčera z pisanymi bantami pyšene a witachu tak wopytowarjow swjedźenja składnostnje 625. róčnicy prěnjeho naspomnjenja wsy. Lichań měješe wot srjedź 19. lětstotka stajnje něhdźe 200 ludźi. Arnošt Muka bě wokoło lěta 1880 jeničce sydom Němcow zličił, dźensa je to runje nawopak. Mjez snadnej horstku Serbow je Milka Maćijowa, kotraž swjećeše njedawno 91. narodniny. Wona chwaleše, zo njepokazuje so jenož na programowym flajeru serbski napis „Zhromadnje jubilejny dźeń dožiwić“, ale zo dopominaja z fotami Jürgena Maćija a Andreasa Steina kaž tež z wjele časowymi dokumentami na něhdy serbski Lichań. Na to je před pjeć lětami załožene domizniske towarstwo z předsydu Alexandrom Golchertom a 35 čłonami sobu dźiwało.
Policija (30.09.19)
Přesćehnjenje sćěhi měło
Lěskej. Zranjenaj šoferaj běštaj wčera dopołdnja wuslědk njewuspěšneho přesćehnjenja na zwjazkowej dróze B 156 pola Lěskeje. 58lětny chcyše před nim jěduce jězdźidło přesćahnyć, njeje pak wobkedźbował, zo jeho hižo dalši 50lětny wodźer awta přesćehnje. Wobaj zajědźeštaj do přirowa a so zraništaj.
