Bydlenske durje zapalił

Kamjenc. Wohnjowu woboru, wuchowansku słužbu a policiju wołachu zawčerawšim popołdnju na Schillowu w Kamjencu. Tam bě 28lětny muž we wjacebydlenskim domje durje bydlenja zapalił. Pozadk běchu najskerje priwatne rozestajenja. W bydlenju běchu w tym času 31lětna žona ze swojimaj dźěsćomaj w starobje jednoho a dźesać lět kaž tež hosćej. Skućićel a žona so znaještaj. Wobornicy płomjenja zhašachu. Wšitke pjeć wosobow z bydlenja dowjezechu do chorownje­. Skućićel bě policiji znaty. Jeho dosahnychu pozdźišo pola znateho w měsće a jeho nachwilnje zajachu. Kriminalna­ policija přepytuje pad nětko jako­ pospyt morjenja.

Bukecy (CS/SN). Změny w tak mjenowanym stawnistwowym wobwodźe Bukecach je tamniša gmejnska rada na swojim zašłym posedźenju wobzamknyła. Dokelž mějachu minjeny čas dale a wjac naprašowanjow za swětnymi mjeno­wymi swjećiznami, móža je starši nětko tež w Bukecach přewjesć dać. Přidatne wudawki za to wučinjeja na dźěćo 100 eurow,­ za kóžde dalše dźěćo 20 eurow.

Dalša změna potrjechi stawniske wěrowanja. Pozadk je, zo dochadźachu pola mějićela Koporskeho (Kuppritz) hrodu wjacore naprašowanja, hač njehodźeli so staw­niske wěrowanja tež tam wotměwać. Tak je Bukečanska gmejna nětko z kruhom přećelow­ hrodu wosebite wužiwanske zrěčenje wotzamknyła. Tuž njejsu wě­rowanja kaž tež mjenowe swjećizny jenož na gmejnskim zarjedźe w Bukecach a na Žornosyčanskim (Sorußig) hrodźe, ale tež na Koporskim hrodźe móžne.

Gmejnska rada Ralbicy-Róžant měła posedźenja efektiwnišo wužiwać

Róžant (JK/SN). Za wothłosowanje předwidźane wobzamknjenja gmejnskeje rady Ralbicy-Róžant dyrbjeli so přichodnje lěpje a dokładnišo přihotować. Za to wupraji so na zašłym posedźenju parlamenta jeho čłon Tomaš Bjeńš.

Poprawom mějachu radźićeljo wo wjacorych nowych wustawkach wothłosować, štož pak so jeno dźělnje a z njewočakowanym wukóncom poradźi. Tak wostanu dotalne wustawki z lěta 2004 wo zarunanju čestnohamtskeho dźěła dale płaćiwe. Gmejnske zarjadnistwo drje bě nowe wustawki přihotowało, wobsah a formulacije pak po słowach Tomaša Bjeńša a dalšich radźićelow njewotpowěduja angažementej čestnohamtsce skutkowacych, wosebje nic dźěłu zastupowaceju wjesnjanostow. Po kontrowersnej diskusiji wjesnjanosta Hubertus Ryćer (CDU) přiwšěm na tym wobsta, wo wustawkach wothłosować, dokelž hižo chwile njeje znowa wo nich wuradźować. Wuslědk wothłosowanja bě, zo njedósta namjet wjetšinu hłosow; a tak wostanje wšitko při starym.

Na mnohich městnach nětko hońtwjerske drustwa hłowne zhromadźizny přewjeduja. Tež Ralbičanske je kónc tydźenja swoje dźěło bilancowało.

Ralbicy (aha/SN). Ralbičanske hońtwjerske drustwo ze swojimi 119 zapisanymi sobustawami je minjeny pjatk w sydarni sportoweho domu hłownu a wólbnu zhromadźiznu přewjedło. Čłonojo drustwa přewostajeja wotnajenskemu zhromadźenstwu, kotremuž přisłuša pjeć hajnikow, cyłkownje 554 hektarow za hońtwu. Je to 335 hektarow pola a 218 hektarow lěsa, hektar płoniny wučinjeja haty a rěčki.

Předsyda drustwa Bjarnat Brězan, kiž je zdobom čłon hońtwjerskeje přirady Budyskeho wokrjesa, wuzběhny, zo maja wobstajnje dobry poměr k wotnajerjam. Při kontrolomaj zwěsćichu snadne brachi na drjewjanych łakańcach hońtwjerjow, kotrež na městnje wotstronichu. Problematiske je, hdyž mějićel płonin předsydstwo drustwa wo změnje wobsydstwa njeinformuje. To poćežuje wupłaćenje najenskeje danje. Dale přednjese Brězan financnu rozprawu a předstaji hospodarski plan. Wón skedźbni mjez druhim na to, zo dyrbja za wjedźenje konta kóždolětnje 111 eurow płaćić.