Kupjele lětsa z rekordnej bilancu
W Budyskej Sprjewinej kupjeli zličichu w lětušej kupanskej sezonje hač do kónca awgusta 34 000 wopytowarjow. Telko hosći mějachu tam posledni króć před dwanaće lětami.
Kulow/Porchow (SN/mwe). Hinak hač w Budyšinje, hdźež maja kupjel tež hišće w septembrje wočinjenu, su kupansku sezonu w Kulowskej lěsnej kupjeli 31. awgusta zakónčili. „Wězo bě to tež za Kulow lěćo, kotrež móžeš z tamnymi lětami lědma přirunować. Njemějachmy cyły čas žadyn dźeń zawrjene“, wěcywobdźěłarka za kulturu, sport a młodźinu na Kulowskim měšćanskim zarjadnistwje Beate Hufnagel Serbskim Nowinam zdźěli.
Pola Rjedźic na Horje zetka so wčera popołdnju horstka wjesnych ...
Wuraznje na serbske korjenje města skedźbnił
Wojerecy (SN/JaW). Z wotewrjenjom wustajeńcy k wuměłstwu we Wojerecach, z rejwanskej pokazku před tamnišej starej radnicu a ze swjedźenskim posedźenjom měšćanskeje rady su we Wojerecach wčera swjatočnosće składnostnje 750. róčnicy prěnjeho naspomnjenja města zahajili. Zdobom dopominachu na 30lětne wobstaće měšćanskeho partnerstwa Wojerec z posaarskim Dillingenom a na 20lětne partnerstwo z finskim městom Huittinen.
Krótkopowěsće (06.09.18)
Rozšěrjena rěčna app
Budyšin. Androidna app za smartphone „Sorbisch leicht – Serbsce lochko“ bu wobšěrnje rozšěrjena, kaž Rěčny centrum WITAJ zdźěla. W aplikaciji su nětko wšitke hornjoserbske wobroty z wobeju CDjow „Serbsce lochko 1“ a „Serbsce lochko 2“ zapřijate. Přistupnych je dohromady 30 krótkolekcijow, kóžda z wobrotami na konkretnu temu. App je w interneće darmotnje k dispoziciji.
Podpěruja wšitke požadanja
Drježdźany. Sakske knježerstwo podpěruje po słowach statneje ministerki za wědomosć a wuměłstwo dr. Evy-Marije Stange (SPD) požadanja Žitawy, Drježdźan a Kamjenicy wo titul „europska kulturna stolica 2025“ w samsnej měrje. Dr. Stange spřećiwja so tak prezidentej sakskeho sejma dr. Matthiasej Rößlerej (CDU), kiž bě so za Kamjenicu wuprajił.
Grabičanski jězor přepodali
Tři dny na kubłanskej jězbje w Namysłowje byli
Dlěje planowana a derje přihotowana bě kubłanska jězba čłonow župy „Michał Hórnik“ do pólskeho Namysłowa. Wšako tam ze wšelakimi zarjadnišćemi hižo lětdźesatki přećelske styki pěstujemy a so tež prawidłownje wopytujemy. Tak je so minjeny pjatk popołdnju skupina čłonow předsydstwa župy„ Michał Hórnik“ kaž tež dalšich zajimcow na wuprawu do susodneho kraja podała. Nazajtra rano witaše serbskich hosći nawodnica měšćanskeho muzeja Jadwiga Kawiec. Wona wodźeše nas po měsće, hdźež sej někotružkuli wosebitostku wobhladachmy. Pobychmy w hakle njedawno ponowjenej bibliotece města, hdźež nas wosebje wulki poskitk dźěćaceje literatury překwapi. Zajimawe tež je, zo maja tam zaběru za holcy a hólcow w času, hdyž jich starši w bliskim wobchodźe nakupuja. Po wopyće Namysłówskeje knihownje rozhladowachmy so po starym młynje města. Wězo pozastachmy jako župny cyłk při pomniku basnika a nowinarja Jana Skale, hdźež počesćichmy jeho z kwětkami a ze serbskej hymnu.
Studničku pitneje wody w zakładnej šuli nochcedźa
Bukecy (CS/SN). Nadawk, wutwarić rěčku Kotečanku wot Wujezda (Breitendorf) hač k statnej dróze S 111 pola Kotec (Kotitz), je Bukečanska gmejnska rada na swojim zašłym posedźenju přepodała zawodej z Friedersdorfa pola Markersdorfa. Předewzaće bě hižo zběrnik dešćikoweje wody w Bukecach w dobrej kwaliće natwariło. Nowy nadawk ma wobjim wjace hač 120 000 eurow. Rěčka ma nowy pobrjóh dóstać. Za to dyrbjachu hižo wulki dub a dalšej štomaj pušćić, dokelž běchu jich korjenje wupłokane.
Za wotstronjenje škodow wulkeje wody při Koporčance pola Něćina (Niethen) dyrbjachu gmejnscy radźićeljo přidatne wudawki wobzamknyć. Při wupisanju w zymje njeběchu wobkedźbowali, zo tam tak mjenowane neofyty rostu, potajkim rostliny, kotrež běchu so z druhich kónčin do našeho regiona dóstali. Te dyrbja nětko fachowje wotstronić. Naprawu dóstanje Bukečanska gmejna stoprocentnje spěchowanu. Nadawk we wobjimje wjace hač 7 000 eurow přepodachu zawodej z Lětonja (Litten).
Čita a hudźi w kniharni
Budyšin. Sakska literarna rada a towarstwo Přećeljo Smolerjec kniharnje přeprošatej jutře, štwórtk, w 19.30 hodź. na čitanski a hudźbny wječor do Budyskeje Smolerjec kniharnje. Tam čita Dieter Kalka z Lipska ze swojeho romana „Sudička“. Kniha jedna před tysac lětami wo serbskej holcy, kotraž ma Słowjanow před smjerću wuchować. Nimo toho zaklinči hudźba na dudlawje. Do toho předstaji dr. Sibille Tröml dźesać twórbow sakskeho knižneho kófra.
Wotewru nowe hrajkanišćo
Chrósćicy. Serbske šulske towarstwo a gmejna Chrósćicy přeprošatej na wote- wrjenje noweho hrajkanišća při Chróšćanskej šuli, a to pjatk, 7. septembra, wot 16 do 18 hodź. Runočasnje wotměja tam čaporowe wiki z někotrymi wosebitostkami ze šulskeje łubje. Wo ćělne derjeměće budźe postarane.
Wobrazy z přirody
Budyšin. „Přiroda jako přirunowanje“ rěka wustajeńca Ansgara Skiby z Düsseldorfa. Ju wotewru zajutřišim, pjatk, w 19 hodź. w Galeriji Budissin na Hrodowskej. W srjedźišću steja wobrazy z přirody.
Policija (05.09.18)
Čołmik zaso namakali
Hamor. Hižo spočatk julija bě so při Hamorskim towarstwowym domje padlowanski čołmik zhubił. Tón wuhlada policajski zastojnik zawčerawšim w swojim wólnym času w zahrodce na Diesterwegowej w Hamoru poł zakryty pod planu. Hromadźe z wobsedźerjom sej policisća tam dojědźechu a zwěsćichu, zo jedna so wo pokradnjeny čołmik. Štó bě jón wotwjezł dyrbja nětko wuslědźić.
Zrěčenje wo přesydlenju hotowe
Gmejnje a energijowy koncern rěča wo dobrym wuslědku
Slepo (AK/SN). Jednanja wo naćisku zakładneho zrěčenja wo přesydlenju Miłoraza do sewjerneho dźěla Slepoho su wotzamknjene. To zdźěli wjesnjanosta Reinhard Bork (CDU) na wčerawšim posedźenju Slepjanskeje gmejnskeje rady. Wot apryla hač do awgusta stej gmejnje Trjebin a Slepo z koncernom LEAG jednałoj.
„To bě wjele dźěła z wjele posedźenjemi“, rjekny wjesnjanosta Bork. „Ale dźakowano zhromadnemu wustupowanju a dźakowano podpěrje našeho komunalneho poradźowarja Klausa Hardratha smy něštožkuli docpěli.“ Zaměr je, zo Slepjanska gmejnska rada w oktobru zrěčenje wo přesydlenju Miłoraza schwali. Posedźenje njewotměje so kaž spočatnje planowane 2. oktobra, ale po wšěm zdaću hakle 23. oktobra.
Energijowy koncern LEAG bě 20. awgusta wo wotzamknjenych jednanjach informował. „Wšitcy jednanscy partnerojo maja wuslědk za wažny měznik nastupajo přihoty přesydlenja“, zdźěli rěčnica LEAG Kathi Gerstner.
„Asimilaciji přihladować njebudu“
Nimo Chróšćanskeje gmejnskeje rady su radźićeljo gmejny Ralbicy-Róžant jeničcy, kotřiž swoje posedźenja w serbskej rěči přewjeduja. Dokelž pak so na zhromadźiznach w Delanach serbšćina dźeń a bóle pozhubja, so jedyn z radźićelow wobara.
Róžant (SN/MWj). Njewočakowanu, ale wažnu naležnosć narězny čłon gmejnskeje rady Ralbicy-Róžant Tomaš Bjeńš (Swobodne wolerske zjednoćenstwo „Delany“) na zašłym posedźenju radźićelow w Róžeńće. Wón dopomni na to, zo je parlament na swojich posedźenjach wjele lět jeničce serbšćinu nałožował, chibazo mějachu k wěstym naležnosćam němskich hosći. W tuchwilnej wólbnej dobje je nětko Eduard Luhmann (CDU) ze Smjerdźaceje čłon gmejnskeje rady. Wón serbsce njerěči, ale po swójskim wuprajenju najwjetši dźěl rozumi. Přiwšěm sej často přeje, zo bychu radźićeljo wo najwšelakorišich naležnosći němsce rěčeli.
