Pytanje za zhubjenym přetorhnyli
Stróža. Dokelž bě pytanje za zhubjenym 44lětnym w Olbje pola Stróže tež wčera bjez wuspěcha, za nim najprjedy raz dale nurić njebudu, zdźěli policija. Specielnje wukubłane psy su póndźelu na bliskimaj městnomaj reagowali. Na njej su so wčera při nurjenju koncentrowali, bohužel bjez wuspěcha. Olba je tam něhdźe 20 metrow hłuboka, tak zo je nurjenje jara wobćežne. Nimo toho nurjacy pod wodu lědma pjeć metrow daloko widźa. Nětko policija a wuchowanske mocy wo nowej strategiji rozmysluja. Přiwšěm tež přichodne dny čołmiki policije po Olbje dale pojědu.
Lěšće (JoS/SN). Wot minjeneje njedźele su w Lěšćach (Hornow) widźeć wuslědki lońšeho fotoweho wubědźowanja Grodkowskeje regionalneje skupiny NABU. Pod hesłom „Mnohotnosć družin před našimi durjemi“ je 30 fotografow dohromady 69 wobrazow zapodało. Zo běchu k wotewrjenju w dožiwjenskej bróžni šokoladoweje fabriki Felicitas tež swójby z dźěćimi přišli, měješe předsydka regionalneje skupiny Sabine Brückner za dobre znamjo do přichoda. Lěta 2006 załoženej skupinje přisłuša 80 čłonow.
Mnozy z wobdźělenych fotografow zapopadnychu na swojich wobrazach insekty najwšelakorišeho razu. Tohodla rěčeše zapósłanc zwjazkoweho sejma Klaus-Peter Schulze (CDU) w swojich postrownych słowach wo jara aktualnej wustajeńcy, wšako je dźěl insektow wohroženy. Kak w Lěšćach wotemrěću insektow zadźěwać spytaja, móžachu sej wopytowarjo po wotewrjenju fotowustajeńcy na přechodźowanju po wsy k domicilej njetopyrjow, k baćonjacemu hnězdu a k łastojčej wěži wobhladać.
Budyšin (SN/MWj). Něšto tydźenjow diskutuja w Budyšinje intensiwnje wo twarje noweho mosta za pěškow nad Sprjewju. Po tym zo běchu plany wo wisatym mosće z blida, je nětko rěč wo tykowanym mosće. Do měšćanskeho zarjad- nistwa je dotal nimale 200 přispomnjenjow k projektej dóšło. Za měsac, 13. septembra, dóstanu zajimcy wo tym nadrobne informacije takrjec z prěnjeje ruki. Wot 10 do 17 hodź. chcedźa tu njedźelu, hdyž je hewak kóžde lěto dźeń wotewrjeneho pomnika, na dworje Hrodu aktualny staw projekta předstajić. Nimo wyšeho měšćanosty Alexandera Ahrensa (SPD) a dalšich partnerow ze zarjadnistwa budu tež zastupjerjo architekturneho běrowa Ehrlich na městnje, hdźež su studiju wo móžnosći tajkeho mosta zestajeli. Dale tež planowarjo Budyskeje twarskeje firmy Hentschke a zastupjerjo Němsko-Serbskeho ludoweho dźiwadła wo projekće informuja.
Rowno (AK/SN). Wohnjowi wobornicy w Rownom dóstanu modernu gratownju. Spočatk julija su tam zběhanku swjećili, twarske dźěła derje postupuja. Nowotwar płaći něhdźe milion eurow, 70 procentow dóstanje gmejna spěchowane. Gratownja je prěni komunalny objekt, kotryž gmejna Slepo južnje železniskeje čary twari. Tule kónčinu chcyše LEAG něhdy wotbagrować, čehoždla njebu tam wjele lět ničo inwestowane. Ze swojim nowym rewěrowym konceptom pak bě so energijowe předewzaće toho wzdało.
Awto dobyła
Budyšin. We wobłuku PS-loterije Budyskeje wokrjesneje lutowarnje je žona ze Šěrachowa-Korzymja njedawno rjane myto dobyła. 78lětnu běchu do tamnišeje wotnožki pjenježneho instituta přeprosyli a jej tam dobyćerske wopismo přepodali. Rentnarka smě sej nětko awto w hódnoće hač do 29 000 eurow wupytać. Při přichodnym wosebitym wulosowanju spočatk nowembra budźe hłowne myto swójski dom.
Čita z tekstow Brězana
Křesćanske hódnoty su zakład jeje jednanja. „Stajnje znowa dopominaja mje na to, kak wažne je, ludźom připosłuchać a jich starosće a přeća chutnje brać“, měni Claudia Florian w swojim wólbnym programje. 55lětna nastupi k wólbam Wojerowskeho wyšeho měšćanosty za CDU.
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. W serialu Serbske Nowiny tule rjad drobnych a małych projektow předstajeja.
Čarje přepołoženej
Budyšin. Sprjewiny kolesowarski puć a ruta Serbske impresije stej we wobłuku Delnjohórčanskich hatow přepołoženej. Kaž Budyski krajnoradny zarjad zdźěli, je dwulětneje twarskeje naprawy dla wotrězk po hatach zawrjeny. Wobě čarje wjedźetej nětko wot Budyskeho spjateho jězora přez Chwaćicy, Wulku Dubrawu, Zdźěr a Klukš do Brězyny. Rozmysluja samo wo trajnym přepołoženju.
Sakska kritizuje namjet
Drježdźany. Namjet zwjazkoweho sejma, zakoń wo stasijowych aktach změnić, je sakska justicna ministerka Katja Meier (Zwjazk 90/Zeleni) kritizowała. Wotpohlad je, stasijowe akty w kóždym wuchodoněmskim kraju w jednym archiwje centralizować. Njejasny je přichod wotnožkow bjez archiwa w Kamjenicy a Drježdźanach. Meier žada sej, sakske stejnišća wobchować.
Rudne horiny kopate połne
Wojerecy (KD/SN). Na swoje 25lětne wobstaće zhladowaše minjeny kónc tydźenja Wojerowski muzej Konrada Zuseho. Spočatnje bě wón w industrijowej štwórći w rumnosćach Lautech zaměstnjeny. Dźensa ma Zusowy kompjuterowy muzej ZCOM w nowym měsće swój domicil. Na tele wuwiće dopomina w nim wosebita wustajeńca „Zuse zwjazuje“.
Hižo 1993 bě softwareowy předewzaćel Friedrich Genser z Düsseldorfa, kotryž Zuseho jara česćowaše, stare ličaki do Wojerec pósłał. Z nimi wutwori nowozałožene towarstwo prěnju wustajeńcu. Tež Zuse, kotremuž spožčichu tehdy čestne wobydlerstwo Wojerec, je sej přehladku wobhladał. 2017 přećahny muzej na Bonhoefferowu, hdźež so załožba a spěchowanske towarstwo wo njón staratej. 19. a 20. septembra planuja k jubilejej swjedźenski kónc tydźenja.