Rakecy (JK/SN). Rakečanska gmejnska rada je wobzamknyła, přepodać nadawk k wobnowjenju puća mjez Kamjenej a Komorowom Sepičanskej firmje ETD. Za 27 500 eurow ma zawod puć zrunać a skrućić. Hladajo na to, zo je w gmejnje hižo dobre dźěła wukonjał, měnjachu radźićeljo, zo by derje było při dźěłach na kwalitu materiala za powjerch dźiwać, jeli měł so puć wužiwać přewažnje za ko­lesowanje, štož bě wjesnjanosta Swen Nowotny (CDU) namjetował. Njeskrućeny puć steji mjez druhim na prioritnej lisćinje gmejny cyle horjeka a je za zwisk mjez wjeskomaj poměrnje wažny. Tež ­ratarske zawody jón wužiwaja.

Wotpohlad gmejny Rakecy, puć z jedneje strony za wjetše jězdźidła zaraćić, radźićeljo witachu a namjetowachu, z wosebitej připrawu tež ratarjam wužiwanje pod wěstymi wuměnjenjemi dowolić. To budźe gmejna hišće raz pruwować, a wjesnjanosta měnješe, zo hodźał so w tym nastupanju konsens mjez wšěmi puć wužiwacymi docpěć.

Kulow (PS/SN). Mamy lěćo a tak hdys a hdys tež horce dny. Je tuž wažne so derje napić. Najlěpša je mnohim čerstwa, zymna woda. Šulerjo maja husto dołhi a napinacy šulski dźeń. Napitki wot doma, kotrež sobu noša, su spěšnje wupite. Potom so prašeja, hdźe sej něšto wobstarać. Doběhnu sej do wobchoda abo kafeterije. Wšudźe pak to móžno njeje. Šulerjo a wučerjo Kulowskeje Wyšeje šule „Korla Awgust Kocor“ maja nětko swoju wodu z dawaka wody (Wasserspender). Inwesticija bě z pomocu sakskeho projekta „W šuli demokratiju wuknyć“ móžna. Nošer projekta je Sakska załožba za młodźinu. Ta kooperuje ze šulerskej radu a ze statnym ministerstwom za kultus Sakskeje. Před lětom bě so Kulowska wyša šula za projekt požadała a je jako jedna ze šěsć šulow připrajenje za podpěru dóstała. Sumu 1 500 eurow dóstanje w formje šulerskeho etata, a to na tři lěta.

Wiki wuměłstwa w hrodowym parku witana wotměna w času korony

Njeswačidło (JK/SN). Hižo pjaty raz prezentowachu kónc tydźenja durinscy organizatorojo wuměłsko-rjemjeslniske wiki w přewšo přijomnej wokolinje Njeswačanskeho hrodoweho parka. W Sakskej su so wulke prózdniny započeli ­a mnohe swójby wužichu wiki, zo bychu so na dowolowy čas nastajili. Awtowe čisła wo tym swědčachu, zo so tu něšto wotměwa, štož ludźi zbliska, ale tež zdaloka přiwabja.

Wjedro ze wšěmi derje měnješe, a dokelž njeje lětsa tak suche kaž w minjenymaj lětomaj, běchu hrodowe łuki tež hišće rjenje zelene. Tuž so tam tež wjele wikowarjow zhromadźi. Přichwatali běchu zaso mnozy z nich, předewšěm rjemjeslnicy, zdźěla z rjemjesłami, kotrež mnohim hižo znate njejsu. Zastupjene běchu pčołarstwo, hornčerstwo, haj samo plećenje z witkami. Pjekarjo a rěznicy swoje regionalne chłóšćenki runje tak poskićachu kaž zahrodnicy a knihiwjazarjo. Mnozy z nich swoje rjemjesło na městnje praktisce předstajachu, štož wuwabi zajim hosći, wosebje pak dźěći.

Astronawt widejo wozjewił

Budyšin. Jako zazběh noweho hudźbneho projekta je skupina Astronawt wčera prěni hudźbny widejo za spěw „Dwaj hrodaj“ na YouTube a Instagramje wo­zjewiła. Z dalšimi widejemi chcedźa młodźi hudźbnicy serbski poskitk w inter­neće wobstajnje rozšěrjeć. Podpěru maja wot Załožby za serbski lud a wot kam­panje „So geht sächsisch“.

Lions-klub ma nowu prezidentku

Budyšin. Rěčespytnica Serbskeho instituta dr. Jana Šołćina je nowa prezidentka Budyskeho Lions-kluba. Jedne lěto­ chce wona jón nětko nawjedować. Za swój wosebity nadawk ma Šołćina nowych­ čłonow wabić. Zdobom chce wědo­mje za serbšćinu a zajim za druhe rěče budźić, kotrež w kóždym padźe k wulkim rěčam swěta njesłušeja.

Schultze Serbow wopytał