Zrěčenje nimale spjelnjene
Trjebin (AK/SN). Vattenfall je w lěće 2008 podpisane zrěčenje z gmejnu Trjebin w dalokej měrje spjelnił. Tole płaći tež za wobłuki wjesne wuwiće, komunalne rjadowanje a komunalnu jednansku koncepciju. „Trjebinske zrěčenje je hač na dowutwar pućow z přisłušnymi naprawami sadźenja štomow spjelnjene“, podšmórny wjesnjanostka Kerstin Antonius (Trjebinske wolerske zjednoćenstwo) zawčerawšim na wobydlerskej zhromadźiznje. Wjace hač 40 zajimcow z Trjebina a Miłoraza je bilancu wjesnjanostki sćěhowało.
Staršich do dźěła zapřijeć
Budyšin (SN/BŠe). Kak a w kotrej měrje móhli so starši w šuli angažować, bě wčera hłowna tema zeńdźenja wokrjesneje staršiskeje přirady w Budyšinje. Tam předstajichu maćerje, skutkowace jako moderatorki (EEM) swoje dźěło. Zaměr jich dźěła je, staršich posylnjeć a prawa a nadawki staršiskim přiradam wujasnjeć. Tež třeća kubłanska konferenca lětsa w juniju wěnuje so staršiskemu skutkowanju na šulach. Jens Frühauf z wokrjesneho wuwićoweho zarjada je přitomnych hižo nětko namołwił, zo bychu so na njej wobdźělili.
Policija (21.04.16)
Diesel kradnyli
Lejno. Tři skowanske nastroje kaž tež 1 300 litrow diesela pokradnychu njeznaći w nocy na wutoru z twarnišća w Lejnom w gmejnje Halštrowska Hola. Škoda wučinja něhdźe 13 000 eurow.
Chcedźa nowu pěstowarnju
Prócowanje wosady bjez wuspěcha – nětko ma město pomhać
Salow (AK/SN). Město Kulow prócuje so wo nowotwar pěstowarnje. K tomu je so měšćanska rada na swojim wčerawšim posedźenju w Salowje wuznała. Měšćanosta Markus Posch (CDU) ma nětko nadawk, za kmanym městnom a za móžnosćemi financowanja pytać.
Pozadk je wulka ličba porodow w měsće a wokolnych wsach. Z tym stej Krabatowa zakładna a wyša šula „Korla Awgust Kocor“ zawěsćenej. „Trjebamy pak runje tak dołhodobnje zawěsćene zastaranje dźěći w pěstowarni a w horće“, podšmórny Markus Posch. „Nimo toho je naša winowatosć, zo zaručamy hladanje dźěći předšulskeje staroby a dale hač do 4. lětnika.“
Na zbožo bjez zranjenych sta so wobchadne njezbožo wčera wječor w ...
Gmejna trjeba noweho partnera
Wjele lět je stawnistwo Wulkodubrawskeje gmejny tež za Radwor přisłušne było, dokelž tam swójske stawnistwo nimaja. Nětko pak dyrbja so w Radworju za nowym partnerom rozhladować.
Radwor (SM/MkWj). Hižo dlěši čas bědźa so we Wulkodubrawskim gmejnskim zarjedźe z personalnymi problemami, štož so přiběrajcy tež na dźěło tamnišeho stawnistwa wuskutkuje. Nětko pak je so problem přiwótřił, po tym zo bě poslednja sobudźěłaćerka stawnistwa wupowědźiła, Radworski wjesnjanosta Wincenc Baberška (CDU) na wčerawšim posedźenju gmejnskeje rady informowaše. Jako Baberška w tym zwisku zhoni, zo chcedźa Wulkodubrawčenjo dźěło stawnistwa – a z tym tež Radworske naležnosće – do Malešec delegować, so jemu takrjec kornar pukny. „To rozsudźimy přeco hišće my“, wón Serbskim Nowinam rjekny. Gmejnskim radźićelam wón tuž wčera naćisk wobzamknjenja předpołoži, z kotrymž so zaměrowe zrěčenje z Wulkej Dubrawu wo zhromadnym stawnistwje wupowědźi, zo móhli sej nowu partnersku gmejnu za stawnistwo pytać.
Krótkopowěsće (20.04.16)
Swětowe mišterstwa w Drjowku
Drjowk. Swětowe mišterstwa dwukonjacych zapřahow wotměwaja so lěta 2019 w Drjowku pola Choćebuza. Tole zdźěli dźensa mjezynarodna třěšna organizacija konjaceho sporta Fédération Équestre Internationale. Berlinsko-braniborski zwjazk konjaceho sporta je zamołwitym w Drjowku mjeztym k tutomu „njewšědnemu zbožu“ gratulował.
W juliju wjace renty
Berlin. Něhdźe 20 milionow rentnarjow dóstanje w lěću čujomnje wjace pjenjez. W zapadnej Němskej maja so renty 1. julija wo 4,25 procentow zwyšić, we wuchodnych krajach wo 5,95 procentow. Tole je zwjazkowe knježerstwo dźensa rozsudźiło. Rozrost je wuslědk dobreho połoženja na dźěłowych wikach a z tym zwjazanych wyšich dochodow ludźi.
Myto LEX wuwołane
Choćebuz. Hižo 13. raz je łužiska hospodarska iniciatiwa (WiL) k wubědźowanju wo myto załožerjow swójskeje eksistency namołwjało. Wo nje móža so ludźo, kotřiž su w zašłych štyrjoch lětach swójske předewzaće załožili, hišće hač do kónca awgusta požadać. Nimo pjenježnych mytow profituja zajimcy tež z najwšelakorišich zarjadowanjow WiL.
Policija (20.04.16)
W kupjeli kradnyli
Łaz. Zawrjenu Łazowsku kupjel su sej paduši minjeny kónc tydźenja jako cil wupytali. Kaž sobudźěłaćer gmejny policiju informowaše, běchu so njeznaći tam namócnje zadobyli. W sanitarnym twarjenju wočinichu woni wjacore durje, pokradnychu z rumnosćow někotre armatury z dušow a wotšrubowachu ručicy wot durjow nuznikow. Z techniskeje rumnosće, kotraž słuži mjez druhim tomu, chlorowy płun do wody měšeć, wotstronichu zawěstki a wzachu hłowny milinowy kabel sobu. Hódnotu rubizny trochuja na něhdźe tysac eurow, runje telko wučinja wěcna škoda.
Wokoło pomnika zaso wšitko čiste
W rozmołwje druheho zeznali
Budyšin (CS/SN). W rjedźe Budyskich rozmołwow dźěše zawčerawšim w Kamjentnym domje wo to, zhonić kak so ćěkancy w sprjewinym měsće čuja, što su dožiwili a što sej přeja. Kaž moderator Christian Schramm rjekny, chcedźa so woni rady z Budyšanami rozmołwjeć. Jenož při mjezsobnym zetkanju, hdyž so jako čłowjek a susod zbližiš, móže jedyn wot druheho něšto zhonić.
Zo bychu tajke rozmołwy zmóžnili, wutworichu cyłkownje dźesać rozmołwnych kołow, w kotrychž tu bydlacy wukrajnicy domoródnych zetkaja. Do toho rozprawještaj před wšitkimi něhdźe sto wopytowarjemi zarjadowanja Khalid Butt a Samira Doudak wo swojich nazhonjenjach. Khalid Butt je mnohim Budyšanam znaty jako mějićel indiskopakistanskeho hosćenca Shalimar. Pakistančan bydli hižo 27 lět w Němskej, z toho 17 lět w Budyšinje. W tym času je wón tolerancu a zhromadne žiwjenje z tu bydlacymi ludźimi nawuknył. Jeho nazhonjenje je, zo je jenož čłowjek wažny, nic pak nabožina a pochad.
