Holešow. Přichodny tydźeń budźe zwjazkowa dróha B 96 mjez wotbóčkomaj ­do Holešowa a Šešowa wjacore dny dospołnje zawrjena. Kaž Budyski krajno­radny zarjad zdźěli, chcedźa ­na wjace hač kilometraj dołhim wot­rězku wot póndźele, 15., hač do pjatka, 19. junija, jězdnju z nowej asfaltowej worštu pokryć. Wokołopuć powjedźe w tym času přez Njeswačidło, Šešow a Nižu Wjes do Ra­kec.

Zarjadaj zaso přistupnej

Budyšin. Při-, pře- a wotzjewjenja móža wobydlerjo města Budyšina po termi­nowym dorěčenju nětko zaso direktnje we wobydlerskej přizjewjerni resp. na stawnistwje wobstarać. We wobłuku sukelnicy na Nutřkownej Lawskej stej wobaj zarjadaj přećahnyłoj, a to na 2. poschod. Wopytowarjo móža lift wužiwać. Štóž ma w sukelnicy něšto wobstarać, njech wobkedźbuje, zo maš tam škit za hubu a nós nosyć. Najebać terminowe dorěčenje proša wobydlerjow wo zro­zumjenje, dyrbja-li w přizjewjerni abo na stawnistwje raz čakać.

Wopyt nachwataja

Znata moped spóznała

Rakecy. Mało wjesela nad pokradnjenym mopedom měještaj předwčerawšim skućićelej w starobje 17 a 39 lět w Rakecach. Po tym zo je wobsedźer popołdnju policiji přizjewił, zo bě něchtó jeho moped pokradnył, wuhlada jeho znata jězdźidło wječor w Psowjach. Přiwołanym zastojnikam spytaštaj skućićelej napowědać, zo běštaj moped online kupiłoj. Kaž so wukopa, bě 39lětny z S 51 jěł, njeměješe pak scyła žanu jězbnu dowolnosć, dokelž běchu ju jemu hižo dawno sćazali. Nimo toho steještaj wón kaž tež młodostna pod wliwom drogow. Policija wobsedźerjej moped zaso wróći. Paduchaj změjetaj so nětko hnydom wjacorych deliktow dla sudnisce zamołwić.

Smochćicy. Wosebity poskitk za swójby z wjace dźěćimi ma nětko Smochčanski Dom biskopa Bena. Jeli swójba tam znajmjeńša tři dny přenocuje, stej nóclěh a zastaranje za třeće a kóžde dalše dźěćo hač do staroby 18 lět darmotnej. Na te wašnje chcedźa swójbam pomhać, kotrež mějachu minjene tydźenje koronoweje krizy dla wosebite wužadanja zmištrować, zo móhli so zhromadnje wočerstwić. Za to skići Dom biskopa Bena ze swojim wulkim parkom a z wólnočas­nymi móžnosćemi w blišej wokolinje wjele móžnosćow. Poskitk płaći za stwy z wjacorymi łožemi hač do kónca lětnich prózdnin. Přizjewjenja přijimuja pod tel. čo. 03 59 35 / 2 20. Hygieniske předpisy maja hosćo wězo wobkedźbować.

Gmejnscy radźićeljo wo wužiwanju spěchowanskich srědkow rěčeli

Trjebin (AK/SN). Dźěl pawšale Swo­bodneho stata Sakskeje k zesylnjenju wjesneje kónčiny chce gmejna Trjebin za wuhotowanje tamnišeje pěstowarnje „Lutki“ a za nowu techniku gmejnskeho dźěłaćerja wužiwać. To su Trjebinscy gmejnscy radźićeljo na swojim wutornym posedźenju wobzamknyli.