Nowoslicy. Štóž chce sej zajutřišim, njedźelu, snano z kolesom do Delan wulećeć, móže rjanu přestawku na Dinarjec piwowej zahrodźe w Nowoslicach zapołožić. Wot 14 hodź. přeprošeja tam na plincy, kofej a tykanc a wězo na chłódne piwo, a to při hudźbnym wobrubjenju.
Na pišćelowy koncert
Chróstawa. Lubowarjo pišćeloweje hudźby njech njeskomdźa wosebity koncert njedźelu, 14. junija, w 16 hodź. w Chróstawskej cyrkwi. Tam poskićeja pišćelowy koncert na tamnišich Silbermannowych pišćelach. Organista Sebastiana Knebela přewodźa Thomas Friedländer na cinku. Při tym jedna so wo pišćałce podobny instrument, kotryž su předewšěm w zažnym 17. lětstotku wužiwali. Na koncerće zaklinči hłownje španiska hudźba z časa Korle V. a Philippa II. Koncert wospjetuja w 17.30 hodź. Zastup je darmotny, proša pak wo dar.
Kak so přichodnje zežiwjeć?
Hamor (AK/SN). Runja druhim komunam dyrbi tež Hamorska koronapandemije dla lětsa a přichodne lěta z mjenje dochodami ličić. To podšmórny zastupowacy wjesnjanosta Hendryk Balko na zašłym posedźenju gmejnskeje rady, jako je swoju rozprawu wo aktualnym połoženju přednjesł. „Dokładny wobjim deficita tuchwilu wuličamy“, wón rozłoži. „Po prěnich trochowanjach pak dyrbimy z toho wuchadźeć, zo jedna so wo sumu hač do jednoho miliona eurow. Tak a tak hižo napjate hospodarske połoženje so tuž hišće dale přiwótři.“
Wot Zwjazka a Swobodneho stata Sakskeje wobzamknjene pomocne naprawy za města a gmejny, kotrež maja předewšěm pobrachowace dochody z přemysłoweho dawka narunać, drje woznamjenjeja najprjedy raz wolóženje. Cyłkowny wupad dochodow pak wone narunać njemóža. Sakske nutřkowne ministerstwo je kónc meje wolóženja při wobchadźenju z komunalnym hospodarskim prawom wukazało. „Wone pak jeničce dźěłakmanosć komunow zaruči“, praji Hendryk Balko. „Hladajo na wudawki je tuž njewobeńdźomne dale lutować.“
Rěčne lěhwo lětsa wupadnje
Budyšin. Lětuše rěčne prózdninske lěhwo, kotrež měješe so wot 7. do 16. awgusta we Wodowych Hendrichecach wotměć, koronapandemije dla wupadnje. Za nje bě so 61 serbskich dźěći w starobje dźewjeć do 14 lět přizjewiło, kaž Serbske šulske towarstwo zdźěli. Nětko planuja přichodne tajke lěhwo klětu w samsnym času zarjadować.
Žadyn dźeń wotewrjenych duri
Budyšin. Předsydstwo župy „Jan Arnošt Smoler“ Budyšin je za 11. julij planowany dźeń wotewrjenych duri w Domje Měrćina Nowaka w Njechornju z ćežkej wutrobu wotprajić dyrbjało. Na posedźenju srjedu w Budyšinje běchu zwěsćili, zo njehodźi so wot tudyšeho strowotniskeho zarjada schwaleny hygienowy koncept zeskutkownić, dokelž by mocy župy prosće přežadał.
Z krizy za přichod myslić
Holešow. Přichodny tydźeń budźe zwjazkowa dróha B 96 mjez wotbóčkomaj do Holešowa a Šešowa wjacore dny dospołnje zawrjena. Kaž Budyski krajnoradny zarjad zdźěli, chcedźa na wjace hač kilometraj dołhim wotrězku wot póndźele, 15., hač do pjatka, 19. junija, jězdnju z nowej asfaltowej worštu pokryć. Wokołopuć powjedźe w tym času přez Njeswačidło, Šešow a Nižu Wjes do Rakec.
Zarjadaj zaso přistupnej
Budyšin. Při-, pře- a wotzjewjenja móža wobydlerjo města Budyšina po terminowym dorěčenju nětko zaso direktnje we wobydlerskej přizjewjerni resp. na stawnistwje wobstarać. We wobłuku sukelnicy na Nutřkownej Lawskej stej wobaj zarjadaj přećahnyłoj, a to na 2. poschod. Wopytowarjo móža lift wužiwać. Štóž ma w sukelnicy něšto wobstarać, njech wobkedźbuje, zo maš tam škit za hubu a nós nosyć. Najebać terminowe dorěčenje proša wobydlerjow wo zrozumjenje, dyrbja-li w přizjewjerni abo na stawnistwje raz čakać.
Wopyt nachwataja
Znata moped spóznała
Rakecy. Mało wjesela nad pokradnjenym mopedom měještaj předwčerawšim skućićelej w starobje 17 a 39 lět w Rakecach. Po tym zo je wobsedźer popołdnju policiji přizjewił, zo bě něchtó jeho moped pokradnył, wuhlada jeho znata jězdźidło wječor w Psowjach. Přiwołanym zastojnikam spytaštaj skućićelej napowědać, zo běštaj moped online kupiłoj. Kaž so wukopa, bě 39lětny z S 51 jěł, njeměješe pak scyła žanu jězbnu dowolnosć, dokelž běchu ju jemu hižo dawno sćazali. Nimo toho steještaj wón kaž tež młodostna pod wliwom drogow. Policija wobsedźerjej moped zaso wróći. Paduchaj změjetaj so nětko hnydom wjacorych deliktow dla sudnisce zamołwić.
Trjebin (AK/SN). Dźěl pawšale Swobodneho stata Sakskeje k zesylnjenju wjesneje kónčiny chce gmejna Trjebin za wuhotowanje tamnišeje pěstowarnje „Lutki“ a za nowu techniku gmejnskeho dźěłaćerja wužiwać. To su Trjebinscy gmejnscy radźićeljo na swojim wutornym posedźenju wobzamknyli.