Přećiwo katastrofalnym wuskutkam
Woni sej žadaja wobmjezowanja koronapandemije dla zběhnyć. Što konkretnje, to napisachu Budyscy měšćanscy radźićeljo w apelu, kotryž su na wčerawšim posedźenju schwalili.
Budyšin (CS/SN). Budyska měšćanska rada wothłosowaše wčera wo dwěmaj poziciskimaj papjeromaj, kotrejž běchu radźićeljo hižo dźeń do toho dwě hodźinje dołho rozjimali. Schwalili su katalog naprawow jako dalewjedźenje wobzamknjenja z lěta 2020. Z nim přilubjeja wot koronakrizy potrjechenym předewzaćam bjezdanjowe nachwilne wusadźenje płaćenja dawkow a popłatkow najprjedy raz hač do lětušeho 30. junija. Nimo toho móža wone swoje poskitki darmotnje na internetnu stronu města stajić. Popłatki za wabjenske nawěški na webstronje firmam tohorunja hač do junija 2021 spušća. Popłatki wosebiteho wužiwanja dla za hospodarske zahrody, stejaki, markizy a podobne lětsa na minimalnu měru pomjeńša.
Krótkopowěsće (25.02.21)
Kubłanski personal nětk šćěpić
Budyšin. Kubłarjo a kubłarki w dźěćacych přebywarnjach kaž tež wučerki a wučerjo w zakładnych a spěchowanskich šulach słušeja nětko do skupiny wyšeje priority a móža so šćěpić dać. W Budyskim wokrjesu zwěsćichu wčera 63 natyknjenjow z koronu, incidenca wučinješe 83. Wo 40 infekcijach a wosom smjertnych padach informowaše Zhorjelski wokrjes. Incidenca tam bě 71,62.
Olympiada znowa wotprajena
Budyšin. Serbske šulske towarstwo je šulam dźensa zdźěliło, zo wot njeho wuhotowana Olympiada serbskeje rěče lětsa wupadnje. To wobkrući koordinatorka SŠT Marlis Młynkowa na naprašowanje. Dale njewěsteje situacije w zwisku z koronapandemiju dla njemóže towarstwo wubědźowanje kaž planowane w aprylu přewjesć. Olympiadu dyrbja tuž druhi raz za sobu wotprajić.
Brošurka znowa wudata
Kubłanišći dale digitalizuja
Kulow (AK/SN). Město Kulow Krabatowu zakładnu šulu kaž tež wyšu šulu „Korla Awgust Kocor“ w swojim nošerstwje tež dale z načasnej kompjuterowej techniku wuhotuje, kaž měšćanosta Markus Posch (CDU) potwjerdźa. 9. februara, tak wón informuje, stej wobě kubłanišći cyłkownje 36 tabletowych PCjow a dalšu techniku dóstałoj, kotrež móža wosebje šulerjo wužiwać. Mjez wuknjacymi a wuwučowacymi bě wjeselo wulke.
Kulowske předewzaće Tobiasa Mänzela Metocom kompjuter a telekommunikacija je nastroje wobstarało a w nadawku města instalowało. „Financowane bu wšitko ze spěchowanskich srědkow po wukazu Sakskeje, mobilne nastroje spěchować. Markus Posch dodawa: „Nakup dalšich tablet-PCjow kaž tež interaktiwnych taflow zmóžnjamy ze srědkow digitalneho pakta za šule. Předdźěła, z kotrymiž smy předewšěm trěbnu infrastrukturu we woběmaj kubłanišćomaj wutworili, běchu hižo wšelake předewzaća loni w lětnich prózdninach wukonjeli.“
Policija (24.02.21)
Drogi a pjenjezy namakali
Wojerecy. Policija je we Wojerecach podhladneju zajała, kotrajž měještaj cyły kilogram marihuany při sebi. Po wobšěrnych slědźenjach běchu zastojnicy póndźelu awto marki BMW na Thomasa Müntzerowej zadźerželi. 31lětny sobujěducy hišće spyta titu z drogami schować. W bydlenju měješe muž dalše sto gramow marihuany. W jeho kaž tež w bydlenju 35lětneho šofera namakachu nimo toho 1 500 eurow.
Wjacezaměrowu halu w Rownom chcedźa bórze wotewrěć
Rowno (AK/SN). Saněrowanje wjacezaměroweje hale w Rownom najebać koronakrizu dale postupuje. Hižo w juliju chcedźa ju zaso wužiwać, kaž potwjerdźa to wjesny předstejićer Matthias Jainsch w aktualnym hamtskim łopjenu Slepjanskeho zarjadniskeho zwjazka.
Loni w třećim kwartalu běchu z twarskimi naprawami saněrowanja a sporjadkowanja započeli. Byrnjež předpisy a postajenja korony dla wobkedźbować měli, dźěła derje postupuja. „Tak bu mjeztym třěcha wobnowjena a ćopłotna izolacija připrawjena, tež nowe elektrowody leža“, Jainsch pisa. „Zatwarjeny je dale nutřkowny wjerch, a mamy nětko wobswětlenje, kotrež perfektnje funguje.“
Nalětni postrow z klóštra
Kino za cyłu swójbu
Budyšin. Swójbna schadźowanka Rěčneho centruma WITAJ lětsa njebudźe. Město njeje su wšitke serbske swójby na kinowy wječor přeprošene. Sobotu, 27. februara, w 17 hodź. pokazaja na stronje www.schadzowanka.de swójbny film „Gilles“, kotryž hodźi so za dźěći wot wosom lět. Wot lěta 2010 pask w serbskej rěči předleži. Wón powěda stawiznu wo sonach a wužadanjach wobdarjeneho dwanaćelětneho koparja Gillesa. Hłowneho rjeka rěči Jan Brězan.
Jutrowne wubědźowanje
Budyšin. Hišće hač do 19. měrca móža so dorosćeni zajimcy na 68. wubědźowanju wo najrjeńše jutrowne jejko wobdźělić. Kolekcije maja tři jejka, w jednej ze znatych serbskich technikow debjene, wopřijeć a z póštu zapodate być.
Poskići nowy wukubłanski směr
Fleksibelne, moderne a swójbne kubłanišćo we Wojerecach
Wojerecy (SiR/SN). Na kubłanišću za medicinske a socialne powołanja (BMS) na Wojerowskej Friedricha Löfflerowej hasy chcedźa wot měrca nowy wukubłanski směr zahajić. Wučerjo a nawodnistwo zarjadnišća maja najebać masiwne wobmjezowanja nowe ideje a wudźeržuja wobstajny zwisk k šulerjam, zo bychu mjezsobnosć a swójbnu atmosferu dale hajili. Njedawno hakle su młodej maćeri dalokowuwučowanje sobotu dopołdnja zmóžnili, dokelž njehodźeše so wuknjenje hinak zrjadować. „Wažne nam je, zo smy fleksibelni a zo so dźěłowym a wukubłanskim wikam z načasnymi wuměnjenjemi a motiwaciju přiměrjamy“, měni zastupowacy šulski nawoda Torsten Rentsch. Tak posrědkuje Wojerowska BMS šulam regiona nadal tak mjenowane powołanske pakety, zo bychu přichodnych absolwentow wo wukubłanskich poskitkach informowali. „Čas lockdowna zmysłapołnje wužiwamy“, praji sobudźěłaćerka za zjawnostne dźěło BMS Claudia Barthel. Klětu wobsteji šula 30 lět. Mjeztym su tam wjacore sta šulerjow za hladanske powołanja wukubłali.
Młodźinske socialne dźěło za čas krizy wosebje wažne
Budyšin (SN/bn). Pod hesłom „Pro Chance“ skutkujetaj socialnaj pedagogaj Sofija Delanec a Benno Auras w nadawku města wot lěta 2017 jako streetworkeraj w Budyšinje. Jeju najwažniši wobłuk je w teamje mobilne młodźinske dźěło wukonjeć. Mobilny aspekt wšak tuchwilneje pandemije dla wulce wobkedźbować njemóžetaj. Ćim bóle wjeselitaj so nad nowym běrowom, do kotrehož staj spočatk lěta přećahnyłoj.
„Rumnosće na Wonkownej Lawskej, hdźež dotal dźěłachmoj, njeběchu drje njekmane. Přiwšěm skići nowa adresa na Hošic hasy jasne lěpšiny. Běrow je na trochu centralnišim městnje a tuž widźomniši. Na tamnym boku móža młodostni naju nětko přez poměrnje schowany zachod takrjec anonymnje wopytać. Tak hodźa so ewentuelne haćenja a strach wobeńć“, Sofija Delanec powěda.
Poćeženje wobchada dla pomjeńšić
Wojerecy chcedźa swój měšćanski dźěl Kinajcht-Wojerecy wuchod přichodnje jasnje wot přechodoweho wobchada wolóžić. Měšćanska rada je so wčera wospjet z naležnosću rozestajała.
Wojerecy (AK/SN). Na mjenje hary, mjenje střasenjow a měrniši wobchad za Kinajchćanow je nětko zdźěłany wobtwarjenski plan „Kinajchtska wobjězdka“ wusměrjeny. Loni 25. februara bě Wojerowska měšćanska rada za to trěbne wobzamknjenje schwaliła. Na jeje wčerawšim posedźenju rozłoži wyši měšćanosta Torsten Ruban-Zeh (SPD) aktualny staw wobdźěłanja.
