Próstwa wo podpěru
Budyšin. W mjenje Federalistiskeje unije europskich narodnych mjeńšin prosy Domowina po swojich kanalach wo pomoc woporam zemjerženja w Chorwatskej, hdźež je 9. januara k zemjerženju dóšło. Sydom ludźi je při tym zemrěło, mnozy poćerpjechu zranjenja, wjele ludźi zhubi swoje bydlenje. Pjenježne dary přepokazać móžeće na: Pomocna akcija Čěskeje mjeńšiny w Chorwatskej. IBAN: HR 33 2340 0091 1001 1368 9; Privredna banka Zagreb. Přijimowar je: Savez Čeha u Republici Hrvatskoj, prošu ze zapisom: Pomoc — zemětřesení SMŽ, SWIFT: PBZGHR2X. Dalši konto je pomocna akcija Serbskeje narodneje rady w Chorwatskej, IBAN: HR52 2360 0001 5015 3033 4; Bank Zagreb. Přijimowar je Srpskonarodnovijeće, Gajeva 7, Zagreb. Prošu přidajće zapis: For Humanitarian action „Banija is our home“ / za humanitarnu akciju „Banija je naša domizna“ SWIFT: ZABAHR2X.
Chcedźa wo wuspěchu rěčeć
Prěnja jolka 2.0 wuspěšna
Tradicionalny wjeršk spočatk lěta digitalnu premjeru dožiwił
Nuknica (SN/bn). Dospołnje wobsadźena wirtuelna žurla, sta přihladowarjow live na Youtube – digitalna premjera jolka-swjedźenja je so z rekordnej ličbu něhdźe 2 300 přihladowarjow zešlachćiła. Hesło 23. raz wuhotowaneho swjatka bě „Korutanska – Z korejtu po dolinje“.
Narok zarjadowaceho Nukničanskeho wjesneho kluba a režisera Michała Cyža bě, „po móžnosći wšitko po zwučenym wašnju zwoprawdźić, tónraz pak w cyber-swěće“. A tak wodźeše předwčerawšim znowa braška-moderator Marko Jurk swojoraznje po programje, nańdźe pucher składnostnje zarězaneho swinjeća nowu wobsedźerku a rozswětli finalny wohnjostroj poł Łužicy. Z prěnjeho rynka dobreje stwy spěwachu dźěći wjacore štučki pěsnje „Naša wowka je moderna Serbowka“, po tym zo bě Franc Kliman melodiju na trompeće přednjesł.
Ptači kwas lětsa hinak swjeća
Wotrow/Chrósćicy/Ralbicy (SN/MiR). Dźěćace dnjowe přebywanišća w nošerstwje Serbskeho šulskeho towarstwa kaž tež Miłočanskeho Křesćansko-socialneho kubłanskeho skutka (CSB) chcedźa najebać wobmjezowanja korony dla ptači kwas swjećić. „Smy wšitkim našim kubłanišćam poručili temu do swojeho aktualneho planowanja zapřijeć“, rozprawja zamołwity za pěstowarnje CSB Ronny Škoda. „Wšudźe chcedźa spěwać, rejować a paslić. Fakt pak je, zo žane zjawne programy njebudu.“
Zymske wjesela a zymski sport stejachu wčera na programje ...
Darmotne testy
Budyšin (SN/JaW). Strowotniski zarjad wokrjesa Budyšin wot štwórtka, 21. januara, wobydlerjam poskići ze spěšnotestom na koronu so přepytować dać. Darmotny test přewjedu potom po štwórtkach w času wot 13 do 16 hodź., zdźěli wčera krajnoradny zarjad w Budyšinje. Terminy dojednać móža sej zajimcy online pod https://www.terminland.de/lra-bautzen/online/Schnelltest_Buerger.
Testy přewjedu we wotnožce strowotniskeho zarjada na Tuchorskej 23 w Budyšinje. „Maksimalnje móžemy 75 testow wob dźeń přewjesć, tohodla je trjeba sej termin rezerwować“, zamołwići informuja. Wuslědki přepytowanym na městnje zdźěla. Na darmotny test dyrbja sej zajimcy nimo personalneho tež šćěpjenski wupokaz a chipowu kartku chorobneje kasy sobu přinjesć. Ludźo, kotřiž su korony dla abo jako kontaktowa wosoba w karantenje, so na tesće wobdźělić njesmědźa, jich strowotniski zarjad dale na test přeproša.
Krótkopowěsće (18.01.21)
Šule dźělnje wotewrjene
Drježdźany. Po štyritydźenskej přestawce su dźensa wjele šulow w Sakskej za zakónčace rjadownje zaso wotewrěli. Nimale 50 800 holcow a hólcow tam nětko w dźělenych rjadownjach wuwučuja, zo móhli so lěpje na kónčne pruwowanja přihotować. Dźěłarnistwo GEW a wučerski zwjazk matej dźělne wotewrjenje kubłanišćow dale wulkich infekciskich ličbow korony dla za přezažne.
Wšitko zaso po planje
Zhorjelc. Mjezy přesahowacy železniski zwisk mjez Sakskej a Pólskej wot dźensnišeho zaso po planje běži, zdźěli Krajna železnica. Jeje Trilex-ćahi jězdźa nětko mjez Zhorjelcom a Zgorzelecom a tak tež zaso z pólskeho města do Drježdźan startuja. Kónc decembra bě pólske wojewódstwo Delnja Šleska mjezy přesahowace zwiski koronapandemije dla zakazało.
Ptači kwas online
Policija (15.01.21)
Njewšědne postupowanje
Huska. Mjez Mjedźojzom (Medewitz) a Huskej (Gaußig) je so wčera popołdnju wobchadne njezbožo stało. Opel Astra suny so na hładkej dróze z jězdnje a zrazy na prawym boku dróhi do štoma. Šofer pak jědźeše z wobškodźenym awtom dale hač na parkowanišćo w Husce. Hakle tam zawoła wuchowansku słužbu, wohnjowu woboru kaž tež policiju. Po prěnich informacijach su so tři wosoby při njezbožu zranili, kak ćežko, dotal znate njeje. Awto je po zdaću dospołnje skóncowane. Sobujěduceho bě štom wotboka trjechił.
Naprawu skónčnje přizwolili
Šansa dale wobsteji, so za demokratiju zasadźeć
Budyšin (CS/SN). Financny wuběrk Budyskeje měšćanskeje rady diskutuje tuchwilu wo tym, koordinaciske a fachowe městno partnerstwa za demokratiju (KuF) dale wjesć abo nic. Tele fachowe městno ma swoje sydło w Budyskim Kamjentnym domje. Dotal bě rěč wo 50 000 eurach za personalne kóšty a 10 000 eurach za zjawnostne dźěło. Runje tele dźěło běše přewodźacy wuběrk města Budyšina při ewaluaciji skutkowanja KuF jako polěpšenjahódne posudźował. Hewak pak maja čłonojo wuběrka skutkowanje KuF za přewažnje spomóžne.
Korony dla njebě móžno wšitke planowane projekty zwoprawdźić, mjez druhim njejsu konferencu wo demokratiji přewjesć móhli. Tak so njedawno na wuradźowanju financneho wuběrka prašachu, hač njejsu pjenjezy z lěta 2020 zbyli. „Njewužiwane pjenjezy dyrbimy Zwjazkej wróćić“, rjekny Budyski měšćanosta za financy, porjadk, kubłanje a socialne dr. Robert Böhmer. Wotličenje za lěto 2020 pak dotal hišće njepředleži. Spěchowanske srědki njemóhli tež na hinaše wašnje wužiwać, dokelž su eksaktnje za mjenowany wotmysł přewostajene.
Pytamy zymske motiwy
Budyšin. Tuchwilna zymička wabi won do přirody. Wšako su dźěći doma a trjebaja zabawu. Prawy to čas, sej zaběru wonka pytać. Chcemy tuž fota wo wašich dožiwjenjach při zabawje w sněze wozjewić. Snadź je tež bórze móžno na lodźe so smykać abo lodohokej hrać. Sćelće nam swoje wobrazy z mejlku na redaktion@serbske-nowiny. de a přidajće k tomu krótku informaciju, što sće dožiwili. My motiwy rady wozjewimy.
BTU z online-poskitkom
Zły Komorow/Choćebuz. Na Braniborskej techniskej uniwersiće wotmě so wčera dźeń digitalneje orientacije. Wysokošulskemu kubłanišću poboku bě Braniborska syć za studijnu orientaciju. Termin na kubłanišću bě wysokošulskemu dnjej w Sakskej přiměrjeny. Přetož w Złym Komorowje kaž tež w Choćebuzu wobstajnje tež wulka ličba zajimcow ze Sakskeje studuje.
