Krótkopowěsće (13.08.20)
Policija reagowała
Drježdźany. W zwisku z protestami na dalnodróze B 96 w Hornjej Łužicy je policija mjeztym wjace hač 40 chłostanskich jednanjow zahajiła. Při tym dźe po słowach sakskeho nutřkowneho ministra Rolanda Wöllera (CDU) mjez druhim wo zapřimnjenje do nadróžneho wobchada, wo nuzowanje a wo zranjenje ćěła.
Wo podpěru so požadać
Budyšin. Předewzaća z hač do 249 sobudźěłaćerjemi móža so wotnětka wo wukubłansku premiju abo dalše spěchowanja ze zwjazkoweho programa „wukubłanske městna zawěsćić“ na agenturach za dźěło požadać, kaž Budyski zarjad informuje. Próstwu zapodać je móžno přez telefon-hotline 0800/455520 abo internetnje pod www.arbeitsagentur.de/sachsen >> Ausbildungsprämie.
Parkowanišća ze sensorami
Policija (12.08.20)
Šofer Opela zemrěł
Kulow. Wobchadne njezbožo ze smjertnym wukóncom je so předwčerawšim dopołdnja na statnej dróze S 285 mjez Kulowom a Brěžkami stało. Bjeztoho zo by dalše jězdźidło wobdźělene było, zajědźe 84lětny wodźer Opela z puća, přejědźe wobchadnu kupu a zrazy do płotu ležownosće. Dowjezši jeho do chorownje móžachu jenož hišće smjerć muža zwěsćić. Najskerje měješe wón hižo do njezboža medicinski problem.
Wiki lětsa wupadnu
Łaz. 16. Łazowske nazymske wiki w septembru wupadnu, kaž předsydstwo tamnišeho domizniskeho a kulturneho towarstwa informuje. Wiki a dźěćacy swjedźeń běštej 19. a 20. septembra planowanej. „Stajnje spytamy wiki tak organizo- wać, zo su wone kóždemu wopytowarjej rjane dožiwjenje. To pak aktualnych wobmjezowanjow dla lětsa móžno njeje“, pisa předsydstwo towarstwa.
Wotnožku přetwarja
Budyšin. Hdźež hewak ludźi wo pjenježnych posłužbach poradźuja, knježi wot přichodneje póndźele twarska hara. Wotnožku Budyskeje wokrjesneje lutowarnje w Strowotnej studni přichodne tydźenje přetwarja. „Mobilar a technika stej zestarjenej, a dyrbimy jej wuměnić“, zdźěli nawoda předsydstwa lutowarnje Dirk Albers. Kónc oktobra maja twarske dźěła wotzamknjene być. Nimo wjacorych dalšich firmow je tež předewzaće Rječka & Čornak z Kamjeneje wobdźělene.
Wobydlerjam chětro smjerdźi
Zarjadowanja kedźbliwje přihotuja
Wochozy (AK/SN). Tež w času koronapandemije je Wochožanski park błudźenkow dale wotewrjeny. Wo tym informuje Anita Schwitalla ze spěchowanskeho towarstwa parka w aktualnym wudaću Hamorskeje gmejnskeje nowiny. Hižo wot 4. meje móža so zajimcy zaso po parku rozhladować, po tym zo bě wón něšto tydźenjow njepřistupny.
Wjacore zarjadowanja wšak dyrbjachu korony dla wotprajić. Tak wupadnychu mjez druhim nalětni swjedźeń kónc měrca, swójbny swjedźeń jutrownu póndźelu a nalětnja rostlinska bursa 1. meje. Tež holanski swjedźeń 6. septembra so njewotměje. Přiwšěm so wjesela, zo so normalne žiwjenje poněčim do parka wróći. Po znowawotewrjenju zličichu dotal wjace hač hač 15 000 hosći.
Za nazymu nětko kedźbliwje prěnje zarjadowanja přihotuja. Tak chcedźa 27. septembra rostlinsku bursu přewjesć. Zwjazać chcedźa ju z wikami na Wochožanskej nawsy. 25. oktobra bychu rady na halloween přeprosyli. Tón dźeń chcedźa dobyćerjow lětušeho jutrowneho molowanskeho wubědźowanja jako nachwatanje mytować. Parkowa chodojta ma tónle nadawk přewzać.
Dobre wuměnjenja dorostej
Płachtakowanski klub při spjatym jězoru zhladuje na dołhu tradiciju
Budyšin (CS/SN). Tež hdyž runje raz žadyn wětřik njeduje, su čłonojo Budyskeho płachtakowanskeho kluba předewšěm kónc tydźenja w swojim zepěranišću na zapadnym přibrjohu Budyskeho spjateho jězora w Nowych Małsecach (Neumalsitz). Njemóža-li woni płachtakować, wuporjedźeja swoje čołmiki abo wužiwaja desku za standup-padlowanje, štož je nětko wulka moda. Lětsa dyrbi hewak stajnje spočatk septembra wotměwaca so regata na spjatym jězoru korony dla wupadnyć. To čłonow kluba ćim bóle zrudźa, dokelž mějachu loni ze 70 čołmikami rekordne wobdźělenje.
Zelowonjedźelne wiki rozšěrjene
Jedne z mało zarjadowanjow, kotrež so lětsa najebać koronapandemiju wotměja, je zelowa njedźela w klóšterskej zahrodźe w Pančicach-Kukowje. Tam maja něštožkuli nachwatać.
Pančicy-Kukow (SN/MWj). Hdyž su w lěću zela, sad a zelenina w zahrodce a na zahrodźe zrałe, zo móžeš je žnjeć, da je načasu so za to dźakować, štož stwórba dobre daruje. Takle připowědźa Křesćansko-socialny kubłanski skutk zelowu njedźelu 16. awgusta w zahrodźe klóštra Marijineje hwězdy w Pančicach-Kukowje. Tale tradicija zdawa so lěto a woblubowaniša być. Po stach tam zajimcy přichadźeja. Runje lětsa budźe nawal najskerje wosebje wulki. Wšako korony dla telko zarjadowanjow njewabi.
Z powětra hižo derje spóznaješ, kak z křižowanišća mjez Horami ...
Prošu hišće wjace
Namjety zapodać
Wojerecy (AK/SN). Za nowy spěchowanski wotrězk leaderoweje kónčiny Łužiska jězorina móža wobydlerjo, předewzaća, towarstwa a gmejny hišće hač do 28. awgusta próstwu wo pjenježnu podpěru za swoje projekty stajić. „Hač priwatne abo komunalne namjety – móžnosće spěchowanja su přewšo wjelestronske“, informujetej sobudźěłaćerce regionalneho Leader-managementa Sophia Kockot a Kristin Möschk. „Dohromady 300 000 eurow je lětsa k dispoziciji. Předewšěm spěchujemy wuwiwanje poskitkow na polomaj turizm a wólny čas, kaž na přikład wu- abo nowotwar infrastruktury abo hrajkanišćow kaž tež sportnišćow.“
Leaderowemu regionej Łužiska jězorina přisłušeja gmejny Hamor, Halštrowska Hola, Dźěwin, Wojerecy, Łuty, Łaz, Chrjebja-Nowa Wjes, Rěčicy, Slepo, Sprjewiny Doł a Trjebin. Dotal su tam cyłkownje 13 milionow eurow do dohromady 123 projektow inwestowali. Lokalna dźěłowa skupina wo namjetach rozsudźi. Wuměnjenje za spěchowanje je dospołnje wupjelnjeny naprašnik, kotryž nańdu zajimcy runje tak kaž nadrobniše informacije na internetnej stronje ile-lausitzerseenland.de.
