Krótkopowěsće (19.06.20)
Za dwurěčne wuswědčenja
Podstupim. Šulerska rada wokrjesa Sprjewja-Nysa je iniciatiwu za dwurěčne němsko-serbske wuswědčenja nastorčiła. Jeje předsyda Justin Pigol je ju dźensa na posedźenju Rady za naležnosće Serbow w Podstupimje předstajił. Šulerska rada bě zwěsćiła, zo jenož w Delnjoserbskim gymnaziju Choćebuz a w Bórkowskej šuli „Mina Witkojc“ braniborske zarjadniske postajenje nastupajo dwurěčne wuswědčenja na kubłanišćach ze serbskej wučbu dodźerža.
Dalšu infekciju zwěsćili
Budyšin. Mjez 46 testami su w Budyskim wokrjesu wčera dalšu infekciju z koronawirusom zwěsćili. Cyłkowna ličba natyknjenych je wot wčerawšeho dale 501. Po dźensnišim stawje su tři wosoby schorjene. Aktualnje je 45 wosobow w karantenje.
Rekordne wobydlerstwo
Wiesbaden. Zwjazkowy statistiski zarjad je rekordnu ličbu wobydlerjow Němskeje zwěsćił. Loni zličichu dohromady 83,2 milionaj ludźi, štož je něhdźe 15 000 wjace hač lěto do toho. Najwjetši bě rozrost w Berlinje, porno tomu je so ličba wobydlerstwa w Durinskej, Saksko-Anhaltskej a Posaarskej najbóle pomjeńšiła.
Policija (18.06.20)
Składnosć znjewužiwali
Kamjenc. Njeznaći su předwčerawšim w Kamjencu njekedźbliwosć wobsedźerja wosoboweho awta, kiž bě wokno na prawym boku jězdźidła jeno přizačinjene wostajił, šamale znjewužiwali. Skućićeljo sahnychu přez wokno a wotamknychu durje. Na to spakosćichu ručnu tobołku, w kotrejž běchu 60 eurow, wupokaz a dalše wosobinske wěcy wobsedźerja. W tym zwisku policija na to skedźbnja, zo je minjeny čas wjacekróć k tajkim deliktam dóšło. Šoferojo a sobujěducy měli na to kedźbować, zo w awće žane hódnotne wěcy widźomnje ležo njewostaja.
Triatlon w mjeńšej formje
Chcedźa sportowe zarjadowanje při Třižonjanskim jězoru tež lětsa přewjesć
Łaz (AK/SN). Lětuše triatlonowe wubědźowanje KnappenMan při Třižonjanskim jězoru chcedza korony dla z wobmjezowanjemi a krutymi postajenjemi po móžnosći 29. a 30. awgusta přewjesć. To zdźěli Łazowski wjesnjanosta Thomas Leberecht (CDU) předwčerawšim Łazowskim gmejnskim radźićićelam na posedźenju. Po tuchwilnych planach přewjedu zarjadowanje w mjeńšej formje. Njebudźe pak žanoho wubědźowanja za dźěći, kaž su je hewak poskićeli. Jenož dorosćeni sportowcy sami smědźa so w tak mjenowanym nutřkownym wobłuku pohibo- wać. Wopytowarjo dyrbja za zašlahanjemi wostać. Nimo toho njezměja žane předawanišća zakuskow a napojow za přihladowarjow. „Smy dobreje mysle“, rjekny Leberecht, kiž přihoty z wjacorymi partnerami wobstajnje wothłosuje.
Šulu chcedźa z płunom tepić
Rakecy (JK/SN). Dobre hospodarjenje minjenych lět po konsolidaciji w Rakečanskej gmejnje so wuskutkuje. Na wčerawšim posedźenju gmejnskeje rady, znowa w awli Pawołskeje šule, su nětko šćežku za ponowjenje zakładneje šule runali. Hižo loni běchu tam tepidła a wodowody saněrowali, za lětsa je předwidźane, tepjensku připrawu přetwarić a garderoby wobnowić. Nastupajo tepjenje radźićeljo wčera wobzamknychu, šulske kubłanišćo přichodnje ze zemskim płunom tepić. K tomu předstaji sobudźěłaćer energijoweho předewzaća ENSO projekt, kotryž změje za gmejnu njemało lěpšin.
Nimo toho, zo ENSO wšitko instaluje a w přichodnych 20 lětach tež hlada a wobhospodarja, budźe gmejna za tepjenje čujomnje mjenje pjenjez trjebać. Za nowe 300 kilowattow sylne tepjenje dyrbja hišće hač k šuli płunowód połožić. Trěbne 100 metrow rołow za to ENSO zwoprawdźi, a hišće do noweje tepjenskeje sezony ma wšitko hotowe być. Wudawki gmejna za nowe tepjenje žane njezměje, jeno přetrjebany płun dyrbi wona přichodnje płaćić.
Pućiki w hrodowym parku Smochčanskeho Domu biskopa Bena su ...
Hroženjam wustajeny był
Budyšin (CS/SN). Na spočatku wčerawšeho posedźenja Budyskeje měšćanskeje rady w krajnoradnym zarjedźe porěča organizator přichodnu njedźelu na Budyskich Žitnych wikach planowaneje demonstracije David Vandeven z wuchodosakskeho telewizijneho sćelaka, čehodla je zarjadowanje wotprajił. Kaž rjekny, bě wón jako čłon přewodźaceho wuběrka zarjadowanje, kotrež steješe pod hesłom „Přećiwo namocy a rasizmej“, hromadźe z Torstenom Wiegelom z Kamjentneho domu a Manju Gruhn z Partnerstwa za demokratiju wothłosował. Zhromadnje běchu woni měnjenja, zo je to dobra wěc. Ale po tym zo bě demo připowědźena a wulka Budyska nowina wo předsudkach pisaše, widźeše so Vandeven w socialnych syćach masiwnym hroženjam wustajeny. „Tam stejachu wěcy, kotrež radšo nječitaš“, wón praji. Nimo toho bě kabaretist Uwe Steimle swój wustup wotprajił. „Zo bu jako antisemit wotkołkowany, je jeho jara raniło“, David Vandeven rozprawješe.
Krótkopowěsće (18.06.20)
14 awtorow so wubědźuje
Celovec. 44. dny němskorěčneje literatury zahaja dźensa w korutanskim Celovecu. Dohromady 14 awtorow z Němskeje, Awstriskeje a Šwicarskeje wubědźuje so tam wo 25 000 eurow hódne Myto Ingeborg Bachmann. Sydom jurorow w interneće live wo čitanych tekstach diskutuje. Myto dopomina na basnicu Ingeborg Bachmann (1926–1973) a je jedne z najwažnišich wuznamjenjenjow za němskorěčnu literaturu.
Počesća ekonoma Sena
Frankfurt n. M. Indiski ekonom a filozof Amartya Sen dóstanje 25 000 eurow hódne Měrowe myto Němskeho knihikupstwa. 1933 w Shantiniketanje rodźeny a dźensa w Cambridgu (USA) bydlacy Sen je so čas žiwjenja za sprawnu ekonomiju zasadźał. Jako prěni je pokazał, zo njeje pobrachowaca cyroba přičina wulkeho hłodu, ale jeje wopačne rozdźělenje.
Jednanski porjad wudospołnić
Policija (17.06.20)
Dwójce tak spěšnje jěł
Lěskej. Na zwjazkowej dróze B 156 w Lěskej w Malešanskej gmejnje je policija póndźelu dopołdnja spěšnosć měriła. Při dowolenych 50 km/h jědźeše w běhu pjeć hodźin nimale tysac wozydłow nimo błyskača. 72 šoferow bě přespěšnych. 41 z nich dósta warnowanje, wjac hač třicećo pak dyrbja pokutu płaćić. Najspěšniši bě Škoda ze Zhorjelskim čisłom. Jeho wodźer z 99 km/h po wsy smaleše, potajkim nimale dwójce tak spěšnje kaž dowolene. To woznamjenja 200 eurow pokuty, dwaj dypkaj a měsac nóžkować.
Poskićeja kurs čěšćiny
Chrósćicy. Za posledni tydźeń wulkich prózdnin, wot 24. do 29. awgusta 2020, planuje Rěčny centrum WITAJ intensiwny kurs čěšćiny za młodostnych a dorosćenych z čěskim wučerjom Janom Breindlom w Chrósćicach. Pod dodźerženjom předpisow škita před koronu ma so wšědnje wot ranja hač do zažneho popołdnja poskićeć wučba čěšćiny a popołdnju zarjadowanje k čěskim stawiznam a kulturje. Jedna so wo poskitk za započatkarjow a pokročenych. Wobdźělenje na kursu płaći 100 eurow, šulerjo a studenća płaća 50 eurow. Zajimcy njech přizjewja so w RCW pod abo pod telefonowym čisłom 03591/ 550 400. Na nadrobniše prašenja wotmołwja Jan Breindl pod abo pod tel. čo. 0179/ 24 37 041.
Pokładownja zaso přistupna
Budyšin. Wopyt Budyskeje tachantskeje pokładownje je zaso móžny. Hladajo na koronowe postajenja pak je ličba runočasnje w rumnosćach přitomnych wosobow na pjeć wobmjezowana. Wuwzaće su swójby z wjace hač třomi dźěćimi. Wodźenja tuchwilu móžne njejsu, wopytowarjo maja sej hubu a nós zakryć.
Pytaja hodowny štom
Radźićeljo wo pjenjezach rozsudźili
Běła Woda (AK/SN). Energijowy koncern LEAG dari městu Běłej Wodźe 80 000 eurow za powšitkownowužitne zaměry, z čimž chce towarstwa a iniciatiwy w młodźinskim, dobroćelstwowym, kulturnym a sportowym wobłuku podpěrać. Wo wužiwanju srědkow su měšćanscy radźićeljo na swojim zašłym posedźenju rozsudźili. Na podpěru wjeselić smědźa so mjez druhim stacija młodych přirodowědnikow a technikarjow, dźěćace wočerstwjenišćo při Brusniku, mobilne młodźinske dźěło a generaciske zetkanišćo. Dale podpěraja z pjenjezami wokrjesny zwjazk Němskeho čerwjeneho křiža, towarstwo Mužakowskeje lěsneje železnicy, zwěrjencowe towarstwo, Łužisku socialnu syć a cyły rjad dalšich.
Dohromady dósta měšćanske zarjadnistwo Běłeje Wody 51 próstwow wo spěchowanje. Skupina šěsć radźićelow a dalšich powołanych wobydlerjow je wo rozdźělenju pjenjez rozsudźiło. To bě wšo druhe hač jednore, měnješe radźićel Ronald Krause (SPD). Za njeho bě to jedna z najdlěšich diskusijow, kotrež je hdy dožiwił. Próstwy towarstwow mějachu cyłkowny wobjim 184 000 eurow.
