Njebjelčicy (JK/SN). Komunalne a čestnohamtske dźěło njeje za kóždeho. Za to trjebaš lóšt kaž tež wosebity dar a nutřkowny pohon, něšto wuskutkować. Runje to měještaj Křesćan Žur a Daniel Wätzig­, kotrejuž je Njebjelčanski wjes­njanosta Tomaš Čornak (CDU) na minjenym posedźenju gmejnskeje rady z wulkim dźakom rozžohnował. Wobaj staj wjele lět wuspěšne wuwiće gmejny sobu postajałoj.

Křesćan Žur bě wjacore legislaturne periody spušćomny zastupjer wjesnja­nosty a zamó naroki gmejny skutkownje zwoprawdźić. Tajke dźěło bě zwučeny, wšako bě wjele lět sobudźěłaćer za­pósłanca CDU w zwjazkowym sejmje Ulri­cha Klinkerta. Při tym je sej při­swojił wěsty­ wid na politiske kaž tež komu­nalne dźěło a móžeše nazhonjenja w gmejnskim dźěle na dobro gmejny derje­ nałožować. Njeje so tež bojał wjesnjanosće w napjatych situacijach znapřećiwić, swójske měnjenje zwuraznić a je runje tak wopodstatnić. Ke chutnym rozesta­jenjam pak ženje dóšło njeje, wšako bě Žur zdobom diplomat a čłowjek měrneho wašnja.

Wo makowe całty wosobinsce přejara ­njerodźu. W tym nastupanju sym skerje klasiski typ. Hdyž pak widźu wobraz kćějaceho makowišća w Stróži pola Hućiny, njemóžu so dohladać. Kajke rjanosće stwórba w kóždym počasu skići, je prosće wobdźiwajomne. Tež na swójskej za­hrodźe so tele dny nad někotrymi makowymi kćenjemi wjeselimy. Byrnjež z jednoho pjenka byli, wone samo w rozdźělnymaj barbomaj kćěja. Kostrjanc nětko runje tak na mnohich městnach při puću wuhladaš, štož je minjene swjatki zawěsće tón abo tamny pěši abo kolesujo registrował. Rjany napohlad pak myli, zo je po wšěm zdaću dosć ludźi, kotrymž je přiroda smorže. Štóž sej mysli, zo dyrbi swój plastowy kofejowy nopašk abo krónowe wěčka prosće z awta z woknom won ćisnyć, zo by je wotbył, njeje jenož njerozumny, ale w mojimaj wočomaj egoistiski, dokelž sej mysli, zo přiroda jemu samomu słuša. Marian Wjeńka

Sewjernje Slepoho mjez Lěšćanskim a Dźěwinskim pućom nastawa pře­sydlenske městno za Nowy Miłoraz. Płoninu nětko dale wotkrywaja, kaž gmejnscy radźićeljo wčera zhonichu.

Slepo (AK/SN). Na přesydlenskim městnje za Nowy Miłoraz su mjeztym wšitke podzemske roły a kable składźene a hodźa so přizamknyć. To zdźěli twarski nawoda Slepjanskeje gmejny Steffen Seidlich na wčerawšim posedźenju tamnišeje gmejnskeje rady. Na wjacorych městnach tuchwilu Dźěwinski puć rozšěrjeja a plestruja. Dale instaluja nadróžne wobswětlenje a twarja wobchadne kupy. Gmejna zdźěłuje plan, hdźe budu kotre wob­chadne znamjenja stać. Z wobchadnym zarjadom, ze zamołwitym planowanskim běrowom a z policiju plan 11. junija doskónčnje wothłosuja.

Hakle dźensa znowa testuja

Budyšin/Zhorjelc. W Budyskim wo­krje­su je dale 496 z koronawirusom na­tyk­njenych. Hakle dźensa chcedźa kon­tak­tne wosoby inficěrowanych znowa testo­wać. Mjeztym je so 440 ludźi wustrowiło, postajenych je 82 karantenow. Tež w Zhorjelskim wokrjesu wosta dotal při 269 natyknjenych.

Zjawny list ministrej

Njebjelčicy. W zjawnym lisće kultusowemu ministrej Christianej Piwarzej (CDU) skedźbnja předsydka kubłanskeho wuběrka Serbskeho sejma Aneta Zahrodnikowa na brachi zwonka katolskich kónčin. Tak „njepřipóznawaja serbšćinu we Wojerecach jako druhu cuzu rěč, tuž njemóža sej šulerjo a šulerki jeje wuwučowanje na zakładźe wobmjezowanja šulskich hodźin jako prawo wužadać. W Hodźiju njeje so staršim dotal radźiło, přesadźić so ze žadanjom za wotpowědnej serbskorěčnej wučbu“, w lisće rěka.

Bjezdźěłnosć znowa přiběrała