Chětro překwapjaca prognoza
Kamjenc. Sakski krajny zarjad za statistiku je w meji 7. regionalizowanu wobydlersku prognozu wozjewił, kotraž saha hač do lěta 2035. Wona natwarja na wobšěrnej analyzy wobydlerskich a infrastrukturnych wuwićow kóždeje jednotliweje komuny minjene 30 lět. We wuslědku statistiskich přepytowanjow liča za wjetšinu městow a wsow w přichodnych 15 lětach z dale a mjenje wobydlerjemi. Tak trochuja za Budyski wokrjes, zo jich ličba wot 300 880 w lěće 2018 na potom 267 340 hač do 261 970 woteběra.
Mjez cyłkownje 57 komunami Budyskeho wokrjesa změje 51 přerěznje dźesać do 15 procentow mjenje wobydlerjow. Jeničce zbywace šěsć komunow so po zdaću přećiwo trendej wuwije. Chětro překwapjace je, zo jedna so tu nimo Arnsdorfa a Ohorna wo štyri dwurěčne gmejny ze slědowacymi prognozami. W Chróšćanskej wočakuja, zo rozrosće ličba wobydlerjow wot 1 035 lěta 2018 na 1 130 hač do 1 160 w lěće 2035. W Njebjelčanskej komunje bydleše před lětomaj 1 180 ludźi, za połdra lětdźesatka ma jich hač do 1 740 być. Gmejna Ralbicy-Róžant měješe 2018 dohromady 1 688 wobydlerjow, po prognozy budźe jich w lěće 2035 hač do 1 740. A gmejna Worklecy rozrosće po wobličenjach wot 1 130 na něhdźe 1 180. Alfons Ryćer
Planuja festiwalej při jězoru
Lětsa wotprajenej zarjadowani chcedźa klětu nachwatać
Hamor (AK/SN). Dwaj wulkej festiwalej pod hołym njebjom chcedźa klětu w lěću w Hamorskej gmejnje wotměć. 5. junija 2021 je na Hamorskim přibrjohu Bjerwałdskeho jězora openair-festiwal „8. Holi-Łužica“ planowane a wot 29. julija do 1. awgusta na Klětnjanskim přibrjohu zarjadowanje „Break The Rules“. Hamorska gmejnska rada je na swojim wčerawšim posedźenju wužiwanske zrěčenje z organizatorom Tonijom Heidu jednohłósnje wotzamknyła.
Hygieniske předpisy wobšěrne
Poněčim so zwučene žiwjenje zaso do wšědneho dnja nawróći. Přiwšěm pak wosebite hygieniske postajenja dale płaća. Druhdy wšak njeje scyła tak jednore je zwoprawdźić.
Wojerecy (SN/MWj). Po 13 tydźenjach nanuzowaneje přestawki stej wot wčerawšeho Wojerowski hród a tamniši měšćanski muzej zaso wotewrjenej. Zo bychu wopytowarjow a sobudźěłaćerjow před natyknjenjom z koronawirusom škitali, płaća při wopyće wšelakich wustajeńcow wobšěrne hygieniske předpisy, zdźěli nawodnica Kerstin Noack. Tak je přistup do muzeja jeno ze škitom za hubu a nós dowoleny, kajkiž trjebaš tež w kupnicach, bibliotekach a druhdźe. Nimo toho smě jenož maksimalnje 30 wosobow naraz w muzeju być. Woni maja wěstotny wotstawk runje tak dodźeržeć, kaž so po wupisanym wodźenskim systemje měć, zo bychu k druhim ludźom w domje tak mało kontakta kaž móžno měli.
Społnomócnjeny za serbske naležnosće města Kamjenca Achim Hojer a ...
Prosće k tomu słuša
Krótkopowěsće (09.06.20)
Dalšej nowoinfekciji
Budyšin. Ličba z koronawirusom natyknjenych wučinješe wčera w Budyskim wokrjesu z dwěmaj nowymaj padomaj 499. Dwaj inficěrowanaj staj so mjeztym zaso wustrowiłoj, štož je nětko dohromady 451. W karantenje je tuchwilu 57 wosobow, dźesać mjenje hač dźeń do toho. Cyłkownje 2 801 karantenu su hižo zakónčić móhli.
Trjebaja wjace darowaneje kreje
Drježdźany. W Sakskej potrjeba darowaneje kreje zaso přiběra. Wotsrjedź meje je naprašowanje z chorownjow za krejnymi produktami w běhu mało dnjow wo hač do 30 procentow postupiło. To rjekny Kerstin Schweiger z krejdarowanskeje słužby sewjer-wuchod Němskeho čerwjeneho křiža powěsćerni dpa. Rezerwy za nuzowe pady tuchwilu hišće někak dosahaja.
Marijiny stołp postajili
Radźićeljo so schadźuja
Njebjelčicy. Přichodna zjawna zhromadźizna zarjadniskeho zwjazka Při Klóšterskej wodźe wotměje so jutře, wutoru, w 19.30 hodź. Zastupjerjo pjeć přisłušnych gmejnow zetkaja so tónraz w sydarni Njebjelčanskeje gmejny při tamnišim sportnišću. Mjez druhim póńdźe wo staw dźěłow za energetiske saněrowanje běrowoweho twarjenja zarjadniskeho zwjazka w Pančicach-Kukowje. We wobłuku hodźiny za naprašowanja budu wopytowarjo swoje naležnosće wotbyć móc.
Susodźa mjez nami
Zhorjelc. Zhorjelski wokrjes přeproša hižo sčasom na kubłanske zarjadowanje we wobłuku lětušich Čěsko-němskich kulturnych dnjow 7. oktobra do Drježdźan. Narěčani su akterojo z dźěćacych dnjowych přebywanišćow, wosebje wjacerěčnych, přijěć na fachowy dźeń sakskeje krajneje centrale za politiske kubłanje. Tež serbscy zajimcy su na zarjadowanje witani.
Policija (08.06.20)
Drohej kolesy fuk
Ćisk. Před kupnicu w Ćisku su njeznaći sobotu popołdnju e-bikaj znački Scott pokradnyli. Přizamknjenej kolesy měještej po informaciji wobsedźerjow hódnotu dohromady 10 000 eurow. Jedna so wo neonzeleno-čorne Genius 710 plus a wo fijałkojto-čorne EGenius Contessa 720 plus. Štóž je něšto wobkedźbował, njech to policiji zdźěli.
Pola frizera pobyli
Wojerecy. Lědma zo smědźa frizerojo zaso dźěłać, su so njeznaći w nocy na sobotu do tajkeho salona we Wojerecach zadobyli. Tam pokradnychu pjeć frizerskich mašinow w hódnoće 500 eurow.
Dejmantnaj mandźelskaj mnohostronsce skutkowałoj
We Worklečanskej kapałce a pozdźišo w Radworskej „Meji“ zhladowaštaj sobotu ćělnje a duchownje čiłaj Jurij Šołta a jeho mandźelska Hilža rodźena Kochec z Noweje Wjeski na 60 zbožownych lět mandźelstwa.
Tež małe serbske wiki planowane
Zo by w starych dźělach městow dale žiwjenje knježiło, pytaja za marketing zamołwići nastajnosći za dobrymi idejemi. We Wojerecach mějachu tajku hižo před lětomaj a ju lětsa wospjetuja.
Wojerecy (AK/SN). Z kulturnymi a kulinariskimi poskitkami wotměwaja nětko w měsće nad Čornym Halštrowom hač do 22. awgusta staroměšćanski bulwar. „Wšitko bě dołho njewěste. Hakle 6. meje móžachu wo spěchowanskich srědkach rozsudźić. Přizwolenje je nam 12. meje předležało“, rozłožuje sobuiniciatorka Dorit Baumeister. Hromadźe z Frankom Graumüllerom dźěła wona za Wojerowski měšćanski management. Staroměšćanski bulwar organizować žada sej wot njeju lětsa wosebje wjele improwizacije a njekomplikowanych rozsudow.
