Chórowy koncert na hrodźe

Budyšin. Pod hesłom „Wotewrće wrota šěroko“ chcedźa chór a solisća SLA připosłucharjow dźensa w 19 hodź. na Worcynskim hrodźe a jutře w 17 hodź. w Delnjoserbskim gymnaziju Choćebuz z klasiskimi, tradicionalnymi, ale tež modernymi twórbami wobkuzłać. Koncert přewodźataj Liana Bertók na klawěrje a Helfried Knopsmeier na violoncellu. Nimo znatych němskich a serbskich zaklinča tež pěsnje we łaćonšćinje, italšćinje, pólšćinje a jendźelšćinje.

Hodowna hudźba w fabrice

Hórnikecy. The Christmas-Connection rěka hudźbna skupina, kotraž přeproša zajimcow jutře, 19. decembra, we 18 hodź. do Hórnikečanskeje energijoweje fabriki na koncert. Pjeć nazhonitych hercow chce hosći połdra hodźiny z mjezynarodnymi dohodownymi kruchami swinga, jazza a soula zawjeselić.

Hwězdy nad městom

Budyšin. „Hodowne hwězdy a kralowska swójba“ rěka přednošk, na kotryž su předewšěm swójby jutře kaž tež póndźelu, 28. decembra a wutoru 29. decembra (přeco we 18 hodź.) do Budyskeje hwězdarnje přeprošene. Wosebje nětko w zymje so hwězdy na njebju dołho błyšća.