Pokiwy za nazymske rjedźenje na ležownosći a zahrodźe

Kóžde lěto zas! Krasny, ćopły počas so nachila. Dołhož słónco z nami hišće derje měni je načasu so na nazymske dźěła nastajić. Hač na ležownosći abo zahrodźe, wšitko měło na zymu přihotowane być, zo by so njeluboznym škodam zadźěwało.

Hnězdźenske kašćiki rjedźić

Po tym zo je w septembrje tež posledni dorost ptačkow hnězda wopušćił, dźe nětko wo to, w nich žiwe parazity, kaž su tu ptače pchi, roztoče a klěšće, wotstronić, zo njebychu młodźata klětu nadměru wohrožene byli. Za rjedźenje pak njeměli sylne chemiske čisćenske abo samo desinfekciske srědki wužiwać. Wone bychu ptačemu dorostej zadźěwali. Dosaha, hnězdźenski kašćik dokładnje wumjesć. Je-li přewjele parazitow, móžeš jón tež z čistej wodu abo ze sodowej lawgu wurjedźić. Na to ma so kašćik wotnutřka derje­ wusušić, najlěpje na čerstwym powětře.