Wusud sudnistwa w Karlsruhe wuskutkuje so na dźěło koalicije w Berlinje

Berlin (dpa/SN). Po wusudźe Zwjazkoweho wustawoweho sudnistwa nastupajo zwjazkowy etat je financne ministerstwo w Berlinje cyły rjad planowanych wudawkow blokowało. Po tutym puću chcedźa „dočasnemu poćežowanju etata za přichodne lěta zadźěwać“, wčera wječor w ministerstwje zdźělichu. Potrjechene su etaty wšitkich ministerstwow. Tuchwilne financne zawjazki wostanu płaćiwe, nowe pak su zakazane.

Amplowa koalicija SPD, Zelenych a FDP so dale wo tym wadźi, kak wobchadźeć z wusudom sudnikow w Karlsruhe. SPD je swoje žadanje potwjerdźiła, zakonski zakaz zadołženja zběhnyć, zo móhli deficit 60 miliardow eurow wurunać.